5
चर्चला वोतुप युक्सिमतिवी कोर्ला
1 ख्युरुङ सिनाङ मी गावाला वोरु मादेन, यिने पपाला दोके टोङ्गु बिन। ख्युरुङ सिनाङ छ्युङातिवाला ति रङगी नुपतिवाला दोके क्यानी खाखो की।
2 मी गामातिवाला रङगी आमाला दोके ताङ पुम्पेजा नाज्युङतिवाला सेम टेङ्बु क्यानी रङगी नुम दोके नासाम तोङ।
3 वुतुङ के युक्सिम फोकुपतिवाला ल्हाटे की।
4 यिने ललाइ युक्सिमकी ति खोरो पुज्युङपुम याङ्ना नातीनातिनीतिवा वोसिन, तिवी राङ तीला दाल्जा किशी। च्यिलासिसिन तिवी खोप्रे खाङ्बा राङ टेङ्बुकी लाका कितुप ताङ खोप्रे पपाआमी ठिलेन च्योलुप लोप्शी। ती ति कोन्छ्योककी थोङ्दाङला ल्यामु यिन।
5 यिने खोरो ति सु साङ मेतुप युक्सिमतिवी वुतुङ के कोन्छ्योकला तिराङ रेवा क्यावु गिवी। तमा ङ्यी ताङ नुप्ज्या खोला राङ गोङ्बा शु शुवा देकिवी।
6 दोजो ललाइ युक्सिमतिवा गा ताङ किर्मुला तिराङ येनी देकिवी सिसिन तिवा सेन्बुला राङ शेप दोके यिन।
7 तुक क्यानी तिवा क्येन मेतुप च्युङ्नी देशी सिनी तिवाला दी येन्देन बिन।
8 ललाइ ललाइकी याङ खोरो छेङ्गाछालीतिवा ताङ खक्छ्येवुला खोरो मिछाङला साङ ल्हाटे मिकिवी। तुकातिवी तेपा कितुप साङ क्युर्नी ज्यकुप गिवी, तमा तिवा तेपा मिकिवुतिवा सिनाङ मङ दुक्टा डिवी।
9 लो खल टुक सिनाङ ल्हक्पा लेपुप युक्सिमतिवाला तिराङ युक्सिम यिन सिनी युक्सिमतिवी मिङ ति थो ग्यप। ती ति ख्योवा च्यिककी मुला तिराङ जेन्दी क्यावु वुङ गोकिवी।
10 तीकी पुज्युङपुमतिवा ल्यामु क्यानी र्होलुप ताङ खोरो खाङ्बा वुङ्गुप डेन्बुतिवाला ताङ्देन क्यावु ताङ कोन्छ्योकला तेपा कितुपतिवाला शब्ज्यी क्यावु ताङ दुक्पाला ख्येलुपतिवाला दाल्जा किटे कितुप ताङ लाका काङ साङ ल्यामु क्यानी मी यम्बाला खोरो किताङ नालु ल्यामु वोतुप ति छ्या तेन्दुप वुङ गोकिवी।
11 यिने नाज्युङ वोतुप पेला राङ युक्सिम फोकुप पुम्पेजातिवाला ति युक्सिम यिन सिनी मिङ थो माग्यक। च्यिलासिसिन तिवा जेन्दी कितुप नासाम शर्नी ख्रीष्टकी थोक्ला शब्ज्यी कितुप क्युर ज्याक्नी जेन्दी कि थुप्किवी।
12 तमा तिवी गोमाला येशू ख्रीष्टला तिराङ शब्ज्यी कितुपला थाक्छ्येतुप ति क्युर ज्याक्नी क्येन फोकिवी।
13 तोजो तिराङ मिन, तिवा खाङ्बा खाङ्बाला युकुप ताङ छेरा कितुप ताङ ताम्ङे क्योलुप ताङ मी लाकाला लाक्पा जिम्बुप ताङ लप मोगोवु ताम्ङेतिवा लपुप डिवी।
14 ती तप्की नाज्युङ वोतुप पेला राङ युक्सिम फोकुप पुम्पेजातिवा जेन्दी क्यानी पेजातिवा क्येनी खाङ्बा शिङ क्यानी सशी। तमा दाक्पी डतिवी दाक्पुला ताम्ङे जोप लाम मेङ्येशी।
15 च्यिलासिसिन ललाइ ललाइ युक्सिमातिवा याङ गोमाला के येशूला तेपा कितुप क्युर ज्याक्नी शैतानकी थाकाला गल वे।
16 यिने तेपा कितुप पुम्पेजातिवी ति ललाइ छेङ्गाछाली युक्सिम वोसिन तीला दाल्जा किटे किशी। तुक क्यासिन चर्चला काङ साङ कले मेख्येल्वी। तमा खोरो मी सु साङ मेतुप युक्सिमतिवाला तिराङ चर्चकी दाल्जा कि थुप्किवी।
चर्चला गोमा कितुप मीतिवाला टोङ्गु
17 चर्चला ल्हाटे क्यानी गोमा कितुप मीतिवाला तेरीकी दोम्बा ङ्यी ताङ्देन कि गोकिवी। खक्छ्येवुला कोन्छ्योककी सुङ ख्याप्टाक कितुप ताङ लोपुप मीतिवाला मङ ताङ्देन की।
18 कोन्छ्योककी सुङला “स्वा ङ्यिलुप लाङगी खला खप्चिल माग्येक।” सिनी सुङ वे। तमा “लाका कितुप मीला तीकी लाका क्यावु ल थोप गोकिवी।” सिनी साङ सुङ वे।
19 मिरा ङ्यी सुमकी पङ्बु मेसिन चर्चला गोमा कितुप मीतिवी तेन्दोकला क्येन तेरुप मीतिवी ताम्ङेला माङ्येना।
20 चर्चला तुका दिक्पा कितुप मीतिवा वोसिन तिवाला मी तेरीकी मिङ्गाला ज्याक्नी तुक कितुप मेवी सिनी लोप। तुक क्यासिन यम्बा तेपा कितुप मीतिवा साङ ज्यिवा किवी।
21 कोन्छ्योक ताङ येशू ख्रीष्ट ताङ कोन्छ्योककी पेन नङ्गुप देवाच्येनकी मीतिवी थोङ्दाङला ङ ख्युरुङला क छ्येम्बु तेरिन। ख्ये मापेवा क्यानी ख्युरुङ ङे सिक्यावु ठिमला वोतुप दोके क्यानी किसा।
22 सुला साङ रिवा क्यानी गोला लाक्पा ज्याक्नी चर्चला गोमा कितुप लाका कि माज्यी। ख्युरुङ दिक्पा कितुप मीतिवी दला माशुक, यिने टेङ्बु क्यानी मिजी क्योङ।
23 गोमाला दोके छ्यु तिराङ थुङ्गुप मिन, यिने ख्योरो खोक्पी थोक्ला ताङ येलुङ येलुङ मानाशी सिनी गुन्डुम छ्याङ साङ चे चेयी थुङ।
24 ललाइ ललाइ मीतिवी दिक्पातिवा ठछ्येली थोङ्गिवी, तमा ठिमला डोप गोमाला के हाक्कोकिवी। यिने ललाइकी दिक्पातिवा ति ज्युक्ला तिराङ थोङ्गिवी।
25 तुक राङ क्यानी मीतिवी क्यावु लाका ल्यामुतिवा साङ ठछ्येली थोङ्गिवी। ललाइकी क्यावु ठछ्येली मेतुप लाका साङ छ्याकला लु मुथुपी, ङ्यिम्ज्यिक ठछ्येली थोङ्गिवी।