18
Ni ka tnii de Jesús ma
(Mt 26:47‑56; Mr 14:43‑50; Lc 22:47‑53)
1 Nuu ni jinu ni jikan‑ta'vi ya sukan, Jesús ma, ni kee ya ji'in tee ka ndikin ya ma, sukan‑va'a ki'in ya in‑ka yu'u yuu nani Cedrón ma ichi nuu iyo in huerta ma, te ni kivi Jesús ma ji'in tee ka ndikin ya ma.
2 Te Judas ma, tee yikuu ke'en‑su'va ya ma, jini de yukan, vaa kua'a jichi ni ka yo ndatna'a de ji'in ya yukan ma.
3 Sani te ni kenda Judas ma, ji'in in yukun soldado, ji'in jaku tee ka jito veñu'u ma. Ñayii ya'a ni ka tetniñu tee ka tatnuni nuu sutu ma, ji'in tee ka kuu fariseo ma. Te jaku de ka yinda'a ja ndú'va ñu'u ja jin kundijin nuu de ma, te jaku de ka yinda'a iti suja ka ndu'va ñu'u, te ka ndiso xeen de.
4 Kovaa Jesús ma, jâ jini ya ndaka nde a ko kuu ja ndo'o ya ma, te ni kee ya, te ni jikan‑tnu'u ya:
―¿Na in ka ndanduku ni? ―kúu ya jiña'a ya.
5 Te ni ka ndakone'e de:
―Tee kúu Jesús ñuu Nazaret ma ―ka kuu de ka jiña'a de.
Jesús ma, jiña'a ya:
―Saña kúu ―kúu ya jiña'a ya.
Te Judas tee yikuu ke'en‑su'va ña'a ma, suni ni iyo de yukan ne'un ñayii ma.
6 Nuu ni jiña'a Jesús ma: “Saña kúu”, kua'a ni ka ndakaka yata de, te ni ka kotuu de nuu ñu'ú ma.
7 Jesús ma, ni ndakan‑tnu'u tuku ña'a ya:
―¿Na in ka ndanduku ni? ―kúu ya jiña'a ya.
Te ni ka ndakone'e tuku de:
―Tee kúu Jesús ñuu Nazaret ma ―ka kuu de ka jiña'a de.
8 Jesús ma, jiña'a tuku ya:
―Jâ ni ka'an sa ja saña kúu. Nú ka ndanduku ni saña, jin kua'a ni tnu'u jin koo maa tee ya'a ―kúu ya jiña'a ya.
9 Sa'a ni kuu, sukan‑va'a ko kuu sukan ni jiña'a maa Jesús ma: “Yuva sa, ñayii ni taa ni a, ñatuu ni skenaa sa ni‑in i.”
10 Te Simón Pedro ma, neva'a de in yuchi kúu espada. Sani te ni kene'e de, te ni jan ka'nde‑ni de so'o kua'a in tee nani Malco tee jinukuechi nuu tee tatnuni nuu sutu ma.
11 Jesús ma, jiña'a ya Pedro ma:
―Ndachunee va'a ni yuchi kúu espada ni a nuu ñunee i ma. Nú Yuva sa ma, kúni ya ja ndo'o neni sa a, ¿naku xi ma ndo'o sa? ―kúu ya jiña'a ya.
Ni ka jan xsia'a i Jesús ma nuu tee kúu Anás ma
(Mt 26:57‑58; Mr 14:53‑54; Lc 22:54)
12 Te tee ka kuu soldado ma, ji'in tee tatnuni nuu de ma, ji'in tee ka jito veñu'u ma, ni ka tnii de Jesús ma, te ni ka ju'ni de ya.
13 Te ni jan koo de ji'in ya xinañu'u ve'e tee kúu Anás ma, vaa yuva xiso tee kúu Caifás ma kúu de, te Caifás ma kúu tee tátnuni nuu sutu ma kuiya yukan.
14 Maa tee kúu Caifás ma kúu tee jiña'a nuu ñayii judío ma ja va'a‑ka maa ñayii ma jin ko kuu, nuna kûu in tee nuu tniñu ndaka ñayii ñuu ma.
Ni ka'an Pedro ma ja masu jini de Jesús ma
(Mt 26:69‑70; Mr 14:66‑68; Lc 22:55‑57)
15 Simón Pedro ma ji'in in‑ka tee ni ka yo ndikin Jesús ma, kuan koo de. In‑ka tee ni yo ndikin Jesús ma, jini tna'a de ji'in tee tátnuni nuu sutu ma, te chukan kúu ja ni kivi de ji'in Jesús ma ini ve'e ma.
16 Kovaa Pedro ma, ni kendoo de ye'e ke'e ma. Te chukan kúu ja ni kee tee ndikin Jesús ma, tee jini tna'a ji'in tee tatnuni nuu sutu ma, te ni jiña'a de nuu ña'a jito ye'e ma, te saa ni kuu ni kivi Pedro ma.
17 Ña'a jito ye'e ma, ni jikan‑tnu'u ña Pedro ma:
―¿Masu ndijin tna kúu tee ka ndikin tna'a ji'in tee kúu Jesús ya? ―kúu ña jiña'a ña.
Pedro ma, ni ndakone'e de:
―Ña'a, masu saña kúu ―kúu de jiña'a de.
18 Kovaa vijin xeen ma, te tee ka jinukuechi ma, ji'in tee ka jito veñu'u ma, ni ka xndu'va de ñu'u, te ka yikuu de ka nduvixi de. Suni Pedro ma, yituu tna de yukan ne'un tee ma, ndúvixi de yu'u ñu'u ma.
Tee kúu Anás ma, ni xndichi de Jesús ma
(Mt 26:59‑66; Mr 14:55‑64; Lc 22:66‑71)
19 Tee tátnuni nuu sutu ma, ni keja'a de jikan‑tnu'u de Jesús ma siki tee ka ndikin ya ma ji'in siki tnu'u káxtnu'u ya ma.
20 Jesús ma, jiña'a ya:
―Saña chi ni yo ka'an ndijin sa nuu ndaka ñayii ñuu ñayivi a. Ndimaa ni yo kaxtnu'u sa ini veñu'u lilikin ma ji'in ini veñu'u ka'nu ma nuu ka ndututu ndaka ñayii judío a. Te masu nawa ni yo ka'an yu'u sa.
21 ¿Nava'a ka jikan‑tnu'u ña'a ni? Jin kakan‑tnu'u ni nuu ñayii ni ka jiniso'o ja ni ka'an sa ma, te ñayii yukan, jin ka'an i nde a ni yo kaxtnu'u sa nuu i ma. Vaa ñayii ma chi ka jini i nawa ni yo ka'an sa ma ―kúu ya jiña'a ya.
22 Nuu ni ka'an Jesús ma sukan, in tee jito veñu'u ma, ni wa'a de in yikinuu ya ma, te jiña'a de:
―¿Sukan ndákone'e ni nuu tee tátnuni nuu sutu a? ―kúu de jiña'a de.
23 Jesús ma, ni ndakone'e ya:
―Nú ni ka'an sa in ja u'vi, ka'an ni nde a kúu. Te nú ni ka'an sa ja va'a, ¿nava'a káni ña'a ni? ―kúu ya jiña'a ya.
24 Sani te Anás ma, ni tetniñu de ya nuu tee kúu Caifás tee tátnuni nuu sutu ma.
Pedro ma, ni ka'an de in‑ka jichi ja masu jini de Jesús ma
(Mt 26:71‑75; Mr 14:69‑72; Lc 22:58‑62)
25 Te Pedro ma, yikuu‑ka de ndúvixi de yu'u ñu'u ma. Te ni ka jikan‑tnu'u i de:
―¿Masu ndijin kúu in tee ni ka yo ndikin tee kúu Jesús ma? ―ka kuu i ka jiña'a i.
Pedro ma, ni ndakone'e de:
―Ña'a, masu saña kúu ―kúu de jiña'a de.
26 Sani te in tee jinukuechi nuu sutu ma, tna'a tee ni ja'nde Pedro ma so'o de ma, ni jikan‑tnu'u de:
―¿Te masu ni jini ña'a sa huerta ma ji'in de ma? ―kúu de jiña'a de.
27 Pedro ma, jiña'a de in‑ka jichi ja masu jini de Jesús ma. Te maa ora yukan‑ni ni kana li'li ma.
Ni ka jan ndaxsia'a i Jesús ma nuu nda'a Pilato ma
(Mt 27:1‑2, 11‑14; Mr 15:1‑5; Lc 23:1‑5)
28 Ni ka nde koo tee judío ma ji'in Jesús ma ve'e tee kúu Caifás ma, te kuan koo de ji'in ya palaciu nuu yinee tee ñuu Roma ma ja tátnuni de ma. Vaa jâ ve ndii ma, te tee judío ma, masu kuu‑ka jin kivi koo de ini palaciu ma, vaa nú ña'a te masu jin koo vii de nuu Su'si ma, te masu kuu jin kuxini de kivi Viko Pascua ma.
29 Chukan kúu ja Pilato ma, ni kee de ja ka'an de, te jiña'a de:
―¿Na nde a ka xtekuechi ni tee ya'a? ―kúu de jiña'a de.
30 Ni ka ndakone'e de:
―Nute masu in tee sa'a ja u'vi kúu de, masu ki koo sa ki xsia'a sa de nuu nda'a ni a ―ka kuu de ka jiña'a de.
31 Pilato ma, jiña'a de:
―Jin ndakueka maa ni de, te jin ka'nde ni tniñu de sukan ka sa'a maa ni a ―kúu de jiña'a de.
Te tee ka kuu judío ma, ni ka ndakone'e de:
―Kovaa saña ja ka kuu sa ñayii judío a, masu kuu jin ka'ni sa ni‑in ñayii ―ka kuu de ka jiña'a de.
32 Chukan kúu ja ni kuu sukan ni ka'an Jesús ma siki ja naxe kûu ya ma.
33 Pilato ma, ni ndivi tuku de ini palaciu ma, te ni kana de Jesús ma, te jikan‑tnu'u de ya:
―¿Ndijin kúu rey ñayii judío ma? ―kúu de jiña'a de.
34 Jesús ma, jiña'a ya:
―¿Maa ni jani ini ja ká'an ni a, xi nde in ni ska'an ña'a? ―kúu ya jiña'a ya.
35 Te ni ndakone'e Pilato ma:
―¿Xi ñayii judío ma kúu saña? Maa ñayii ñuu ni a, ji'in tee ka tatnuni nuu sutu ma ka kuu tee ni ka ki ndi xsia'a ña'a nuu saña. ¿Nawa ni sa'a ni? ―kúu de jiña'a de.
36 Jesús ma, ni ndakone'e ya:
―Nuu tátnuni sa ma masu ñuu ñayivi a kúu. Nute ya'a kúu, koneva'a sa ñayii jin kunukuechi nuu sa, te jin kanaa i, sukan‑va'a saña, ma jin tnii ña'a ñayii judío ma. Kovaa nuu tatnuni sa ma masu ñuu ñayivi a kúu ―kúu ya jiña'a ya.
37 Sani te ni jikan‑tnu'u tuku ña'a Pilato ma:
―¿Nú sukan, te rey kúu ni? ―kúu de jiña'a de.
Jesús ma, ni ndakone'e ya:
―Maa ni ni ka'an ja rey kúu sa. Vee sa, te ni kâku sa ñuu ñayivi a, sukan‑va'a ka'an sa nde a kúu ja ndaa. Te ndaka ñayii ka sa'a ja ndaa ma, ka niniso'o i ja ká'an sa ma ―kúu ya jiña'a ya.
38 Te Pilato ma, jiña'a de:
―¿Nde a kúu ja ndaa ma?
Ni ka kundee maa ñayii ma, te ni tatnuni Pilato ma ja jin ka'ni i Jesús ma
(Mt 27:15‑31; Mr 15:6‑20; Lc 23:13‑25)
Ja ni jinu ni jikan‑tnu'u de ya sa'a, ni kee de in‑ka jichi, te ni ka'an de ji'in tee judío ma, te jiña'a de:
―Saña, ñatuu ni ndani'i sa ni‑in kuechi tee ya'a.
39 Kovaa ka neva'a maa ni costumbre ja saña ndaxsiaa in tee yinee vekaa ma ne'un kivi Viko Pascua a. ¿Ka kuni ni ja ndaxsiaa sa tee kúu rey nuu ñayii judío a? ―kúu de jiña'a de.
40 Ndaka ñayii ma, ûni ka kayu'u i ka jiña'a i:
―¡Tee jiña chi ña'a! ¡Ndaxsiaa ni tee kúu Barrabás ma! ―ka kuu i ka jiña'a i.
Te tee kúu Barrabás ma chi in kui'na kúu de.