19
Ni jinokuei ñayiu Israel yuku Sinaí
1 Te nuu uni yoo ja ni ndekuei ñayiu Israel ñuu Egipto, te vi maa kiuu yun ni kentakuei yuku Sinaí.
2 Chi nuu ni ndekuei Refidim, te ni kentakuei yuku Sinaí, te yun ni ka jakin ñayiu Israel veꞌe saꞌuin jaꞌa yuku yun.
3 Te ni kaa Moisés ja nukuntnaꞌa de jin ia Dios, te ndee nuu yuku yun ni kana Jitoꞌo nuu de, te jiñaꞌa ya:
―Suaꞌa kuñaꞌa ron nuu tatatnoꞌo Jacob ja ka kui ñayiu Israel:
4 “Ni ka jini maa ron naxa ni saꞌa rin jin ñayiu Egipto, vi naxa ni ndakuiso ña rin jin ron na kuinio in yata ndijin yaꞌa naꞌnu, te ni ndisiaꞌa ña rin ndee nuu oo rin.
5 Te vitna nuu ja vi kuantnoꞌo ron tnoꞌo kaꞌan rin, te vi skunkuu ron tratu saꞌa rin jin ron, nuu ja saa te vi kokuu ron ñayiu ñuu maintnoꞌo ni maa rin neꞌu ndiꞌi ñuu ja oo ñuyiu, chi ndiꞌi oo nuu ndaꞌa maa rin.
6 Te vi kokuu ron sutu nuu tatnuni rin vi in ñuu vii rin.” Ndakani ndiꞌi tnoꞌo yaꞌa nuu ñayiu Israel ―jiñaꞌa ya.
7 Yun te ni ndajiokuiin Moisés, te ni kana de tee ka kuu nijaꞌnu nuu ñuu, te ni ndakani de ndiꞌi tnoꞌo ja ni tatnuni Jitoꞌo nuu de ja kaxtnoꞌo de.
8 Te ndiꞌi ñayiu ñuu ni ka kaꞌan invaa ni tnoꞌo, te ka jiñaꞌi:
―Vi saꞌa san ndiꞌi nagua ni tatnuni Jitoꞌo.
Te ni jaꞌan Moisés nuu Jitoꞌo, ni ndakani de nagua ni ka kaꞌan ñayiu ñuu.
9 Yun te jiñaꞌa Jitoꞌo nuu Moisés:
―Jaa rin nuu oo ron in maꞌñu nuu ndututu nee viko, nagua ja na vi konini ñayiu ñuu nuu kaꞌan rin jin ron. Te saa nagua ja siun ni vi kokandijai nuu ron ―jiñaꞌa ya.
Te ni ndakani tuku Moisés nuu Jitoꞌo nagua ni ka kaꞌan ñayiu ñuu.
10 Te jiñaꞌa Jitoꞌo nuu Moisés:
―Kuaꞌan te ndasavii ron ñayiu ñuu vitna vi xtnee, te na vi ndakatei saꞌuin.
11 Te na vi kotuaꞌi nuu uni kiuu, chi nuu uni kiuu te jaa maa rin ja kuu rin Jitoꞌo siki yuku Sinaí, nuu vi kuni ndiꞌi ñayiu ñuu.
12 Te chikorra ron nii jaꞌa yuku yaꞌa, nagua ja ma vi yaꞌa ñayiu. Te kuñaꞌa ron ja ma kakuei yuku yaꞌa, te ni ma vi jinkani jaꞌi nuu yikuaꞌa yun, chi nani kuu ja jinkani jaꞌa, te vi jandaa ja kuu.
13 Te ni in ma kuu vi keꞌe jin ndaꞌa yuku yaꞌa, chi nuu tuu, te vi kaꞌni ron jin yuu axi jin kuji, kuu ni ñayiu axi kuu kiti, te ma vi koteku ka, chi vi kuu. Su maa ni nuu vi konini ron ja vi kani kuiti ndaꞌi trompeta, te kuu kakuei ñayiu nuu yuku yaꞌa ―jiñaꞌa ya.
14 Te vi nani ni nuu Moisés nuu yuku yun, te ni ndasavii de ñayiu ñuu, te ni ka ndakatei saꞌuin.
15 Te jiñaꞌa Moisés nuu ñayiu ñuu:
―Vi saꞌa tuaꞌa ni maa ni nuu uni kiuu, te ma vi nitnaꞌa ni jin ñasiꞌi ―jiñaꞌa de.
16 Te nuu neꞌe kiuu kuu uni, te vi jandute, te kaꞌndi kani tajan, te nee ñuñuꞌu ni jinkoo in viko nuu yuku yun. Te vi xenxeen ndaꞌi trompeta, te vi suaꞌa ka niꞌi ndiꞌi ñayiu ka oo yun ja ka yuꞌi.
17 Yun te ni keneꞌe ña Moisés jin ñayiu ñuu veꞌe saꞌun nuu ka oi yun, te kuaꞌankuei ja vi nukuntnaꞌi jin ia Dios, te ni ka junkuiin jaꞌa yuku yun.
18 Te ninii yuku Sinaí ni kana ñuaꞌa, chi ni kuun Jitoꞌo siki yuku yun jin ñuꞌu, te makakaa ni ka ñuaꞌa na kuinio nuu kana ñuaꞌa in jitnu, te ndiꞌi yuku yun kisi xeen ndevaꞌa.
19 Te vi saa vi saa kuaꞌan makujaa ka ndaꞌi trompeta yun. Te ni kaꞌan Moisés jin Dios, te vi niꞌi kuiti kaꞌan ya.
20 Te ni kuun Jitoꞌo ndee nuu yuku yun, te ndee yun ni kana ña ya jin Moisés, te ni kaa de.
21 Te jiñaꞌa Jitoꞌo nuu Moisés:
―Mandee te kaꞌan ron nuu ñayiu ñuu ja ma vi yaꞌi nuu yikuaꞌa yun ja vi kondiaꞌi Jitoꞌo, chi nuu tuu, te kuaꞌa ndevaꞌa mai vi kuu.
22 Te suni na vi ndasavii sutu maa de ja vi kitnaꞌa ña de jin rin, chi nuu tuu, te xnaa rin de ja kuu rin Jitoꞌo ―jiñaꞌa ya.
23 Te jiñaꞌa Moisés nuu Jitoꞌo:
―Ma vi kuu ini ñayiu ñuu ja kanakuei yuku Sinaí yaꞌa, chi ni tatnuni maa ni nuu san nuu kachi ni: “Chikorra nii jaꞌa yuku yaꞌa, te saꞌa ii ron”, ni kachi ni ―jiñaꞌa de.
24 Te jiñaꞌa Jitoꞌo:
―Su mandee te kuñaꞌa ron nuu Aarón ja kanakuei ron jin de, su ndia sutu vi ñayiu ñuu, chi vini ma vi yaꞌi nuu yikuaꞌa yun ja kanakuei nuu oo rin, chi kana saa xnaa rin jin ―jiñaꞌa ya.
25 Yun te ni nuu Moisés, te ni ndakani de nagua ni kaꞌan ya nuu ñayiu ñuu.