9
1 Te suni jiñaꞌa ya:
―Kaꞌan ndaa san ja sava ni ja ka oo ni yaꞌa, chi ma vi kuu ni guaa ndee vi kuni ni naxa tatnuni ia Dios ja vaji jin jakaꞌnu ya ―jiñaꞌa ya.
Ni ndasama naxa kaa Jesús
2 Nuu ni yaꞌa iñu kiuu, te ni jaka ña Jesús jin Pedro vi Jacobo vi Juan, te kuaꞌankuei ya in yuku sukun, te yun ni ndasama kaa ya jin nuu tee yun.
3 Te vi yeyeꞌe saꞌun niꞌnu ya jayaa na kuinio yuaꞌa, ja vi ni in ñayiu ndakate ñuyiu yaꞌa, tu na in kuu ja siun ndasaꞌa yaa.
4 Te ni ka jini de ja ni ka ndatuu Elías jin Moisés, ka ndatnoꞌo de jin Jesús.
5 Yun te jiñaꞌa Pedro nuu Jesús:
―Mastru, guaꞌa kuu ja yaꞌa ka oo san, te na vi saꞌa san uni veꞌe kuii, in koo maa ni, te inka koo Moisés, te inka koo Elías ―jiñaꞌa de.
6 Chi ni ka yuꞌu de, te tu ni jini Pedro nagua kuu ja kaꞌan de.
7 Yun te ni kuun in viko, te ni chisaꞌu ña jin de, te ndee nuu viko yun ni kee in tnoꞌo, te jiñaꞌa:
―Suchiaꞌa kuu seꞌe maa rin ja kutoo ndevaꞌa rin jin, te vi konini tnoꞌo kaꞌin ―jiñaꞌa tnoꞌo yun.
8 Te nuu ni ka ndakondiaꞌa de nii nuu ka oo de yun, te tu na in ni ka jini ka de, chi maintnoꞌo ni ka Jesús oo.
9 Te nuu manukuei de jin ya nuu yuku yun, te ni tatnuni ya ja ma vi ndakani de nuu ni in ñayiu ja siun ni ka jini de, chi guaa ndee na ndateku maa ya ja kuu ya Seꞌe Teyii neꞌu ndiyi.
10 Te yun guaa ni ka tavaꞌa ni maa de jin anu de ndiꞌi yun, su ni ka jikan tnoꞌo tnaꞌa de na tnoꞌo kuu ja kaꞌan Jesús ja ndateku ya neꞌu ndiyi.
11 Yun te ni ka jikan tnoꞌo de Jesús, te ka jiñaꞌa de:
―¿Nau ja ka kaꞌan tee ka kaxtnoꞌo Ley Moisés ja vi nini kuu ja xtnañuꞌu ka Elías ndii, te saa kii Kristu? ―ka jiñaꞌa de.
12 Te jiñaꞌa ya:
―Jandaa ndija ja xtnañuꞌu ka Elías ndii, te suu de ndasavaꞌa ndiꞌi. Su nuu saa, ¿te nau ja yoso nuu tutu ii ja sein ja kuu san Seꞌe Teyii, chi tnaꞌa san kuakuaꞌa tnundoꞌo, te vi skexiko ña ñayiu?
13 Su kaꞌan san ja Elías, chi ja ni kii de, te ni ka saꞌa ña de jin tee yun ndiꞌi nagua ka kuini maa de, nagua kaꞌan nuu tutu ii ja saa ndoꞌo de ―jiñaꞌa ya.
Ni ndasaꞌa Jesús in suchi yii ñuꞌu ña espíritu kueꞌe
14 Te nuu ni ndentakuei ya nuu ka oo sava ka tee ka skuaꞌa jin ya, te ni ka jini ya ja ka oo kuaꞌa ndevaꞌa ñayiu ja ni ka jionduu ña jin tee ka skuaꞌa jin ya. Te suni ka oo tee ka kaxtnoꞌo Ley Moisés ja ka tee tnaꞌa jin de.
15 Te nuu ni ka jini ñayiu yun ja vaji ya, te ndiꞌi ni ka saꞌu kuii ini, te ni ka jinoi nuu oo ya ja vi ndakantnoꞌo ñai jin ya.
16 Te ni jikan tnoꞌo ña ya jin tee ka skuaꞌa jin ya:
―¿Nagua ka tee tnaꞌa ni jin tee yun? ―jiñaꞌa ya.
17 Te ni kaꞌan in tee oo jin ñayiu kuaꞌa yun, te jiñaꞌa de:
―Mastru, vaji san nuu ni jin seyii san ja ñuꞌu ña espíritu kueꞌe, te ni saꞌa ñiꞌi ña jin.
18 Te ndee ni nuu ni kuu ja ndakakiꞌi ña, te skana ña nuu ñuꞌu, te kisi ña, te jaa ti iñu yuꞌi vi kaꞌñi noꞌi, te kuaꞌin makuxii saꞌa. Te ni kaꞌan san jin tee ka skuaꞌa jin ni ja na vi tanundaꞌa de vi tau de, su tu kuu vi saꞌa de ―jiñaꞌa de.
19 Yun te jiñaꞌa ya:
―Tatatnoꞌo kueꞌe ja tu ka kandija, ¿nasaa ka kiuu guaa koo san jin ni? ¿Nasaa ka kiuu guaa kuandee ini san? Vi kisiaꞌa ni jin yaꞌa nuu saa ―jiñaꞌa ya.
20 Te ni ka jinsiaꞌa de jin nuu ya. Te nuu ni jini ña espíritu yun jin Jesús, te ni kisi ndevaꞌa ña jin suchi yii yun, te ni ndonsoi ndee nuu ñuꞌu, te jiotutuu ni kai vi jaa ti iñu yuꞌi.
21 Yun te ni jikan tnoꞌo ña Jesús jin tatai:
―¿Na kuu saa tiempu ndoꞌi siaꞌa? ―jiñaꞌa ya.
Te jiñaꞌa de:
―Ndee nuu lului.
22 Te kuaꞌa jichi tnaa ña nuu ñuꞌu vi nuu ndute ja kaꞌni ña. Su nuu ja kuu saꞌa ni joo, te kundaꞌu ini ña ni jin san, te chituu ña ni ―jiñaꞌa de.
23 Te jiñaꞌa Jesús:
―Nuu ja kuu kandija maa ni, chi ndiꞌi ni ja kuu nuu ñayiu kandija ―jiñaꞌa ya.
24 Yun te vi ñama kuiti ni kana tata suchi yii yun, te jiñaꞌa de:
―Kandija san, te chituu ña ni na kandija guaꞌa ka san ―jiñaꞌa de.
25 Te nuu ni jini Jesús ja kuaꞌan ka kututu kuaꞌa ndevaꞌa ñayiu, te ni kaꞌan xeen ya nuu espíritu kueꞌe yun, te jiñaꞌa ya:
―Tatnuni rin nuu ron ja kuu ron espíritu ñiꞌi vi soꞌo ja kana ron ini anu suchiaꞌa, te kiꞌin ron, te ma ndajiokuiin uun ka ron ja ndee ron nuu anui ―jiñaꞌa ya.
26 Yun te ni kana koꞌo espíritu yun, te ni kisi ndevaꞌa ña jin, te ni kee kuaꞌan. Te suchi yun, chi vi na kuinio ja vi ni jiꞌi saꞌuin, te kuaꞌa ñayiu ni ka kaꞌan ja ni jiꞌi.
27 Su ni tnii Jesús ndaꞌi, te ni ndoneꞌe ña ya, te ni nukuiin.
28 Te nuu ni kiuu Jesús ini veꞌe, te ni ka jikan tnoꞌo ña tee ka skuaꞌa jin ya nuu ka oo maa ni de jin ya:
―¿Te nau ja tu ni kuu vi tau sein espíritu kueꞌe yun? ―ka jiñaꞌa de.
29 Te jiñaꞌa ya:
―Saa, chi tachi kaa siaꞌa, chi nini kuu ja ndakuatuo vi konditeo, te saa kundeo ja kana ―jiñaꞌa ya.
Ni kaxtnoꞌo tuku Jesús inka jichi ja kuu ya
30 Yun te ni ndekuei ya yun, te kuaꞌankuei ya ichi ñuu ja tnii Galilea. Te tu kuini Jesús ja vi kuni ni in ñayiu.
31 Chi kaxtnoꞌo ya nuu tee ka skuaꞌa jin ya, te jiñaꞌa ya:
―Sein ja kuu san Seꞌe Teyii, chi vi sinotuu ña nuu ndaꞌa ñayiu ñuyiu, te vi kaꞌni ña, su nuu uni kiuu ja ni jiꞌi san, te ndateku san ―jiñaꞌa ya.
32 Su tu ni ka jinkuiꞌnu ini de na tnoꞌo kuu ja siun kaꞌan ya, su ka yuꞌu de ja vi kakan tnoꞌo ña de jin ya.
Ni kaxtnoꞌo Jesús na in kuu kaꞌnu ka
33 Yun te ni jinokuei ya ñuu Capernaúm, te nuu ja ka oo ya in veꞌe, te ni jikan tnoꞌo ña ya jin tee ka skuaꞌa jin ya:
―¿Nagua ka tee tnaꞌa ni ichi vajikueio? ―jiñaꞌa ya.
34 Su tu ni ka kaꞌan saꞌun de, chi ichi nuu kuaꞌankuei de ka tee tnaꞌa de ndee de guaa kokuu kaꞌnu ka.
35 Yun te ni jinkoo ya, te ni kana ya ndi uxi uu tee ka skuaꞌa jin ya, te jiñaꞌa ya:
―Nuu ja ndee ni kuini ja kokuu ni tee xtnañuꞌu, te kuini ja kokuu ni tee sandiꞌi ni ka nuu ndiꞌi ni, te kokunukuechi ni nuu ndiꞌi ni.
36 Yun te ni tnii ya ndaꞌa in suchi luluu, te ni jani ña ya maꞌñu ndiꞌi de, te ni kanundee ña ya jin, te jiñaꞌa ya:
37 ―Na ñayiu jantaꞌu in suchi luluu ja jaꞌa maa san na kuinio suchi yaꞌa, te jantaꞌu ñai jin maa san. Te na in jantaꞌu ña jin maa san, te masu maintnoꞌo maa san jantaꞌui, chi suni jantaꞌui ia ni tetniuu ña jin san ―jiñaꞌa ya.
Na ñayiu tu ndakoo sikio te chituu ñai jion
38 Yun te jiñaꞌa Juan:
―Mastru, ni ka jini san in tee ja jin sivi ni, te skunu de tachi ka ñuꞌu ña jin ñayiu, su tu ni ka jandetu san ja kosaꞌa ka de, chi masu in ni ka skuaꞌo jin de ―jiñaꞌa de.
39 Su jiñaꞌa Jesús:
―Ma vi kasi niꞌnu ni, chi tu na in ñayiu saꞌa in tniuu kaꞌnu jin sivi san, te yata yun te kaꞌan kueꞌe de siki san.
40 Chi na in tu ndakoo sikio, te oi chituu ñai jion.
41 Te nani kuu ñayiu ja tai visi in yajin ndute vi koꞌo ni ja ka oo ni jin san, te kaꞌan ndandaa san ja ma skunai, chi niꞌi yaꞌui.
Ma vi saꞌo ja junkuei ñayiu nuu yika kuechi
42 ’Te nani kuu ñayiu saꞌa ja in suchi luluu ja kandija ña jin san, kanakaui nuu yika kuechi, te vi guaꞌa ka kokuu ja na vi kuꞌni in yoso molinu sukuin, te vi tnaa ña ndee nuu kunu ka kaꞌa ndute mar.
43 Te nuu ja ndaꞌa ni saꞌa ja kanakau ni nuu kuechi, te kaꞌnde ni, chi guaꞌa ka kuu ja tikundu ni, te ndiuu ni nuu koteku ni, masu ja koo vaꞌa nduu ndaꞌa ni, te kiꞌin ni nuu andeya, nuu kai ñuꞌu ja ma ndaꞌva saꞌun,
44 nuu tu ka jiꞌi tindaku, te ni tu ndaꞌva saꞌun ñuꞌu.
45 Te nuu ja siꞌin ni saꞌa ja kanakau ni nuu kuechi, te kaꞌnde ni, chi guaꞌa ka kuu ja tikundu ni, te ndiuu ni nuu koteku ni, masu ja koo vaꞌa nduu siꞌin ni, te kiꞌin ni nuu andeya, nuu kai ñuꞌu ja ma ndaꞌva saꞌun,
46 nuu tu ka jiꞌi tindaku, te ni tu ndaꞌva saꞌun ñuꞌu.
47 Te nuu ja nduchi nuu ni saꞌa ja kanakau ni nuu kuechi, te tau ni, chi guaꞌa ka kuu ja kiuu ni nuu tatnuni ia Dios jin invaa ni nduchi nuu ni, masu ja koo vaꞌa nduu nduchi nuu ni, te kiꞌin ni nuu andeya,
48 nuu tu ka jiꞌi tindaku, te ni tu ndaꞌva saꞌun ñuꞌu.
49 Chi ndiꞌi ni ni saꞌa tuaꞌa ña ia Dios jin ñuꞌu ja kuu tnundoꞌo, nagua ka savaꞌa ñayiu ndiꞌi kuñu ja kai nuu ka sokoi nuu ya ja kuu axe saꞌa ñii.
50 Chi jaguaꞌa kuu ñii, su nuu ja na nduu uun ñii yun, ¿te naxa vi saꞌa ni ja nduu axe inka jichi? Nuu saa, te vi kokuu ni ñayiu guaꞌa nagua oo guaꞌa ñii, te vi koo mani ni jin in in ni ―jiñaꞌa ya.