5
1 Sùo ká ɓuru kǎwke tusiri key na ɗo munu ɓa hul puɗi kaʼa ɓíɛ. Ze a ɓíɛ na hɔy kara, ɓuru kɔ nda̰w, Ŋgɛrɛwṵru a haŋa ɓuru sùo fie ká nulue. Sùo fieke ku na ɓa hul ká nduo nzoɓ ze mbuo ya, roo lɛ, ɓa Ŋgɛrɛwṵru kḭ ze mbuo, a ɓa fe káʼa ɗoko ɓaŋguɔ.
2 A timbɛɗɛ key na, ɓuru rɛ sùo ɓuru ɓay haŋa Ŋgɛrɛwṵru ka mbi sùo ká ɗo ɓaŋguɔ ká ɓa hul káw ɓuru ká nulue na, a ɗaa nduo sùo ɓuru munu ɓa gari fie.
3 Ɓe munu rɔɔ, gari fie na nduo sùo ɓuru lɛ, suo ɓuru na a ɗoko hɔy hɔy ya.
4 Ɓa tusuɛ, sùo ɓuru ká ɓuru kǎwke tusiri key na, ɓuru rɛ ɓay fe sɛkɛri ká ɓuru kɔ ká timbɛɗɛ key. Ɓuru rɛ ɓay haŋa Ŋgɛrɛwṵru ka naa tá̰w sùo ɓuru key na ya, roo lɛ, ɓuru hii ɓay haŋa ni ka fɛ́rɛ ɓuru, a ha̰ ɓuru sùo fie káʼa ɗoko ɓaŋguɔ. Ɓe mini ze, sùo ɓuru ká tusiri key ká ɗo ɓa fe huɗe na, káʼa fɛ́rɛ ha̰ sùo fie káʼa ɗoko ɓaŋguɔ na ro re mbay ká tul-e.
5 Nzoɓ ká leke faa fe key na, ɓa Ŋgɛrɛwṵru. Ka ha̰ ɓuru Tem Law Pie ɓe ɓay kíɛke mii, fe kereri riw bele káʼa waa ɓay tul ɓuru na, ɓuru zíŋ.
6 Ɓe ze, ɓuru mgba law ɓuru ŋgɔ-ŋgɔŋ ɓaŋguɔ. Ɓuru kɔ nda̰w, zaɗka ɓuru ɗo ɓil naysuo key lɛ, ɓuru ɗo ɗi ɗi ɓáy zaɗ káw ɓuru ká ɗo lakun Ŋgɛrɛmbay.
7 Ze munu hɔy kara, ɓuru kaw ɓáy faa law ɓuru ká ɓuru ɗaa ɓo tul Ŋgɛrɛwṵru ɓo, ɓáy faa feri ká ɓuru kɔ ɓáy nun ɓuru ya.
8 Ɓa tusuɛ, ɓuru na ɓuru mgba law ɓuru ŋgɔ-ŋgɔŋ ɓaŋguɔ. Tusuɛke lɛ, ká ɓil wa̰ra law ɓuru na, ɓuru hii ɓay pɔ́ŋ naysuo key ɓay zɔ́l ɓay vǎa káw lakun Ŋgɛrɛmbay.
9 Ze ɓuru ɗo ɓil naysuo ká tusiri key, mase ɓuru se na luo Ŋgɛrɛmbay hɔy kara, fe ká ndaɗ ɓamba tasiri ká law ɓuru mgba ɗi na, ɓa ɗáa fe ká rii law-ɛ.
10 Ì kɔ, naari riw bele na, náa ɗokori pol *Krisi ɓay haŋa ni ka kuŋ sal ɓay ka zúɔ tul naari ɓay haŋa nzoɓ ha̰a ha̰a lɛ, ka zíŋ fe tunduo ká maa ɓáy zaɗ fe ɗáa ɓe, ká ɓa kere mase, ndaya ɓáy nam káʼa ɗǒke ɓil naysuo ká tusiri key ɓáy na.
Peɗ ɗáa ha̰ nzoɓri zuɔ ziŋ Ŋgɛrɛwṵru ɓáy faa Krisi
11 Ɓuru na, fe ká ɓa hḭ́ɛ Ŋgɛrɛmbay na, ɓuru kɔ ɓayke ta-taŋ. Ɓe mini ze, ɓuru nzaa faa ɓay haŋa ɓayke ka mgba law nzoɓri. Ŋgɛrɛwṵru sùo-ɛ na tuu ɓuru ta-taŋ. Mì ker mí kɔ lɛ, ká ɓil wa̰ra law-rì na ì tuu mì ta-taŋ nda̰w.
12 Ɓuru ti tiika sa̰w ndáka giri sùo ɓuru kḭ sùo ɓuru ká luo-rì ya. Roo lɛ, ɓuru ha rì faa ɓay haŋa rì nda giri sùo-rì ɓay tul ɓuru. Ɓe nda̰w rɔɔ, ì zíŋ mbii ɓay ká ɓay yḭ́iŋra ha̰ ɓari nzoɓri ká i ɗaa riŋ ɗika ɓo tul fe ká kɛlɛ hɔy taŋ ɗáa riŋ ɗika ɓo tul fe ká ɗo ɓil law nziiya na.
13 Ze ɓa tusuɛ (munu ká nzoɓ ha̰nɛri ɓaa mii,) ɓuru ɓa kɔ̀kɔ lɛ, ɓa ɓay ká ɗo sakra ɓuru ɓáy Ŋgɛrɛwṵru ɓo, ɓayke ɗo nzaa-rì ya. A ze ɓo, kér ɓay ɓuru na ɗo ɓáy zaɗɛ laa lɛ, ɓa fe kere ká ɗo ɓay tul-rì.
14 Ì kɔ, law ini *Krisi na re mbay ká tul ɓuru ha̰ ɓuru ɗáake peɗ ɓuru na ɓáy faake, ɓay ḭi lɛ, ɓuru kɔ ta-taŋ mii, ɓe na ka hu ɓay tul nzoɓri riw bele. Ɓe ze, ha̰ nzoɓri riw bele huke ziŋ ni.
15 Krisi na hu ɓay tul nzoɓri riw bele ɓay haŋa ɓo, nzoɓri ká i kaw ɓáy kumnun na, i ɗaa feri ɓáy tul-ri mbǎa, roo lɛ, i ɗaa feri ɓay tul ɓe káʼa hu nda̰w rɔɔ, a tḭi saa luɔ huɗ a kaw ɓáy kumnun ɓay tul-ri na.
16 Ɓe ze, timbɛɗɛ key na, ɓuru kɔ nzoɓri faa mbḭw munu ká nzoɓri ká tusiri key kɔ na mbǎa. Ze, pola lew ɓuru kɔ na Krisi ɓa nzoɓ naysuo hɔy kara, timbɛɗɛ key ɓuru kɔ ni munu mbǎa.
17 Ɓe mini ze, nzoɓ ká zuɔ ziŋ Krisi na, ka vi ɓa nzoɓ fie. Tá̰w feri ká piɛɗke lew na zekre kaɗ, a ha̰ fe fieri laa ro ze ví suo bol-e.
18 Fekeri riw bele ku na, ɓa fe ɗáa Ŋgɛrɛwṵru. Ka ɗaa ha̰ náa zuɔri ziŋ ni ɓáy faa Krisi. Rɔɓay, ka ha̰ peɗ haŋa nzoɓri zuɔ ziŋ ni na zuɔ nduo ɓuru.
19 Tusuɛke lɛ, ɓáy faa ɓe na, Ŋgɛrɛwṵru ha̰ nzoɓri riw bele zuɔ ziŋ ni, a ndǎke buma ziŋ ri taŋ fɔ́ŋ fal fe ɗáa ka̰aya ɓari. Ɓe na kḭ ze, ka ɗaa peɗ haŋa nzoɓri zuɔ ziŋ ni na zuɔ nduo ɓuru ha̰ ɓuru ka-káake.
20 Ɓe mini ze, ɓuru na ɓuru ɗaa peɗ munu ɓa nzoɓ súo bol Krisi. Zaɗka ɓuru koɗ rì ɓáy riŋ Krisi mii, kóɗ ŋguɔ hɔy, ì zúɔ ziŋ Ŋgɛrɛwṵru na, rìi fe ká Ŋgɛrɛwṵru ɓo rì ɓáy faa ɓuru.
21 Krisi na ɗaa feya̰a ndḭi kara ba mbḭw ya. Roo lɛ, Ŋgɛrɛwṵru ha̰ ni suo bol naari nzoɓ fe ɗáa ya̰ari, ɓay haŋa ɓo, ɓáy faa zúɔ ziŋ Krisi na, Ŋgɛrɛwṵru ka ndǎke buma ziŋ naari a ha̰ náa víri ɓa nzoɓri ká i ɗo ɓáy zaɗɛ nzɛɗɛm ká nun-ɛ.