Mbeɗe sáka kuni fie Eborori 9

Hul ka̰ni ká tusiri key ɓáy ha̰y ká nulue

1 Zaɗka Ŋgɛrɛwṵru saa kuni taa titire na, ka ha̰ nzoɓri zaɗ saŋmakeri ɓoɗ ɓoɗ ɓay haŋa ri sǒroke ɓa lakun-ɛ, rɔɔ a ha ri ɗaa hul ka̰ni ɓáy huɔ. 2 Hul ka̰nike ku na, i kúŋ ɓil-e ɓáy gari ɓa zaɗ siɗi. Ɓil-e taa mbḭwke ká i ɗi ɓa *zaɗ ká taŋ kaɗaŋ na, i ɗaa huu ndele ká wàa ɓa tɔnɔ say sìi ɗi, rɔɔ tutakra ká i ɗaa maapa zuɔ ɗi ɓa taa Ŋgɛrɛwṵru na ɗo ɗi nda̰w. 3 Ɓil-e ndeke ɗi siɗike ká fal gari ká i kúŋke na, i ɗi ɓa *zaɗ ká taŋ kaɗaŋ ɓamba tasiri. 4 Ká zaɗke ku na, i ɗaa *tutakra úu fe ká mbii lari ká ndṵy zḭriri zḭriri nṵu fal-ɛ na ɓo ɗi. Ká tul-e siya na, i uu fe ká ba̰rɛ fṵ bǔy bǔy ká ɗi. Sanduku *sáka kuni ká mbii lari ká ndṵy zḭriri zḭriri nṵu ɗi kpurukuɗ na ɓo ɗi nda̰w. Ká ɓil-e ku na, suna ká i ɗaa ɓáy lari ká ndṵy zḭriri zḭriri, ká ŋgaw ká i ɗi ɓa manne zuɔ ɓil-e na ɓo ɗi; ká̰w Aro̰n ká luo vay na ɓo ɗi nda̰w, rɔɔ tḭ́i tisawri ká siɗi ká Ŋgɛrɛwṵru vbie bol kusol sáka kuni ɗo ɗi na, zuɔ ɗi nda̰w pi. 5 Ká tul *sanduku sáka kuni na, i fɛl fe ɓa tem nzoɓ riŋ ɗikari ká i rìi leɗ nzaapeɗ Ŋgɛrɛwṵruri ká nulue sìi ɗi. Tem nzoɓkeri ku na kiɛ mii, Ŋgɛrɛwṵru ɗo zaɗɛ ku. Nzaa ta̰y ɓari sìi kḭ ha̰ temke puɗ zaɗ ká i puo fe ɓáy sím fe hɔl ká ɗi ha̰ Ŋgɛrɛwṵru, ɓay haŋa ni ka nda buma ká tul feya̰a nzoɓri. Roo lɛ, ɓa sa̰w síe ká ɓay ríi ɓil-e ɓay ɓáa ɓay fe niri key na ɓáy nzi-ɛ lɛm lɛm riw bele ya*.

6 Zaɗka i leke fe mini ká ɓil hul ka̰nike ká i ɗaa ɓáy huɔ na, nzoɓ fe poyri rìi í se zaɗ taa titire na nam ɓáy nam ɓay ɗáa peɗ ɓari. 7 Roo lɛ, ɓa *ŋgɛrɛnzoɓ fe poy luye huo-ɛ hɔy ze rìi a se zaɗ ká taŋ kaɗaŋ ɓamba tasiri na. Ɓil mbiimbam mbḭw lɛ, ka rìi a se ɗi faa ɓal ba mbḭw hɔy ɓáy sím fe hɔl ɓaŋguɔ a púoke fe ha̰ Ŋgɛrɛwṵru ɓay tul fe ka̰aya taa ɓe kḭ sùo-ɛ pola nda̰w rɔɔ, a puo ɓay tul-e taa ruɔ nzoɓri na ɓáy. 8 Ɓay fe niri key na, Tem Law Pie kiɛ mii, zaɗka hul ka̰ni ká i ɗaa ɓáy huɔ ɗo kɔɓ rɔɓay key na, faa haŋa ruɔ nzoɓri rìi í se zaɗ ká taŋ kaɗaŋ ɓamba tasiri na, tiya, ɓay ḭi lɛ, faake mgbuɗa ɗo hɔy ya ɓáy. 9 Ɓe ze, ɓa tem fe ká kiɛ fe ká ɗo ɓil namri ká vuri key, ɓay ḭi lɛ, fe haŋa hɔyri ɓáy fe poyri ká nzoɓ fe poyri i púoke fe ha̰ Ŋgɛrɛwṵru na, ti wáa ɓil wa̰ra law nzoɓ ha̰ ni *taŋ kaɗ kaɗ ya. 10 Fekeri ku na, i ɗaa ɗo ɓa zaɗ saŋmari ká ɓay tul sùo ká kɛlɛ hɔy, munu ká fe sṵm, ɓáy fe nzɔkɔ, rɔɔ ɓáy kḭri wáa sùori ká ɓoɗ ɓoɗ ɓay táŋke kaɗ kaɗ ká nun Ŋgɛrɛwṵru. Feri key na ka ɗo munu ɓaw kpṵru maa ɓáy nam ká Ŋgɛrɛwṵru a súoke fekeri ɓa fie.

11 Roo lɛ, *Krisi na vi ro, a ɓa ŋgɛrɛnzoɓ fe poy luye ɓay haŋa naari fe kereri ká ɗo ro na. Ɓil hul ka̰ni káʼa ɗaa peɗ ká ɗi na, ɓa nduo nzoɓ ze ɗaa ya, a ɓa fe ká ɗo tusiri key ya, roo lɛ, ɓa hul ka̰ni taa tusuɛke ká nulue ká ndaɗ kal hul ka̰ni ká tusiri, a ɓa kere ɓamba tasiri kal tul-e nda̰w. 12 Zaɗkaʼa rìi ɗi na, ka rìi ba mbḭw kḭ hɔy ɓáy sím ɓe kḭ sùo-ɛ, a tǐnake naari saa ɓil feya̰a wṵ̌m ɓo, ka rìi ɓáy sím balri ɓáy sím vu bǎa ndayri ya. 13 Sím balri ɓáy sím bǎa ndayri ɓáy sḭ́ɛ máa nday ká i tay í mḭɛ zuɔ tul nzoɓri ká i zaa fe ḭ̌mri na, wàa sùo-ri ká kɛlɛ taŋ kaɗ kaɗ. 14 A munu ku wa̰a, maa ɓay sím Krisi, ɓe káʼa mbi sùo-ɛ sùo-ɛ kḭ ha̰ Ŋgɛrɛwṵru ɓa vuy *fe poy ká ɗo ɓáy zaɗɛ peɗeɗe ɓáy faa Tem ká ɗo ɓaŋguɔ na, ti wáa ɓil wa̰ra law naari ha̰ ni taŋ kaɗ kaɗ ɓay tul fe ɗáa ka̰aya ká se ziŋ naari ɓa zaɗ huɗ, ɓay haŋa náa ɗáari peɗ ha̰ Ŋgɛrɛwṵru, Nzoɓ Káw Ɓáy Kumnun na ya mina lɛ woo! 15 Ɓe ze, Krisi na ɓa nzoɓ ɗoko sikɗa nzoɓri ɓáy Ŋgɛrɛwṵru, ɓay haŋa ɓo nzoɓri ká Ŋgɛrɛwṵru ɗi ri ɓa taa ɓe na, i ziŋ fe kereri ká ɗo ɓaŋguɔ káʼa waa ɓay tul-ri. Fe niri key na ɗo ɓay tul-ri, ɓay ḭi lɛ, Krisi hu a naa ɓay ká tul nzoɓri ká i ɗaa fe ndaya, í wǎɗke tul *bol kusol sáka kuni taa titire na.

16 A ɓay ká se tul nzoɓ ká kḭi fe pile ɓe na, ka hu ro lɛ, i leke kḭ fe pile ɓeri na ɓáy. 17 Tusuɛke lɛ, fe pile na nzoɓke hu ya ɓáy lɛ, ɗaa fe ya ɓáy, a zaɗka ɓo ka hu ro lɛ, tii sa̰w ɗáa peɗ ɓáy. 18 Ze titire kuni ká Ŋgɛrɛwṵru saa ziŋ nzoɓri na hɔy kara, tii sa̰w ɗáa peɗ ká fal sím fe hɔlri. 19 Pola lɛ, ɓáy nam káʼa sáake kuni na, *Moyze ɗo pol ruɔ nzoɓri a kḭi fe ká ɓay haŋa ri ɗaa na ɓáy nzi-ɛ nzi-ɛ riw bele maa ɓáy bol kusol ká Ŋgɛrɛwṵru ha̰ na. Falɛ lɛ, ka mbi sím vu bǎa ndayri ɓáy sím balri ká i i na, a zukri ɓáy mbii. Ka fɛ vay puu ká i ɗi ɓa izoɓ a siŋ ɓáy sṵy baɗu sḭ́ɛ, a ɗaa nduo sím na rɔɔ a mḭɛ zuɔ tul mbeɗe bol kusol, ɓáy tul ruɔ nzoɓri riw bele, 20 a ɓaa mii: «Ɓe ni key na, ɓa sím ká Ŋgɛrɛwṵru kǐɛke kuni káʼa saa ziŋ rì a mbi nzi-ɛ ɓay haŋa rì ɗaa vu mbom ɓo ɗi†.» 21 Faa mbḭw munu nda̰w ze, ka mǐɛke sím zuɔ tul hul ka̰ni ɓáy feri riw bele ká i ɗáake peɗ rúo Ŋgɛrɛwṵru. 22 Ɓaa tusuɛ kḭ, munu ká i ɗaa ɗo ɓil *mbeɗe bol kusol Moyze na, i mḭɛ sím zuɔ tul ruɔ feri bele ha ri taŋ kaɗ kaɗ. Zaɗka sím uo ya lɛ, ndáka buma ká tul feya̰a na tiya.

Krisi ɓa vuy fe poy ká naa feya̰a nzoɓri

23 Zaɗka ɗo nun haŋa feri ká ɗo ɓil hul ka̰ni, ká ɓa tem fe taa tusuɛkeri ká nulue na, ka táŋ kaɗ kaɗ ɓáy sím fe hɔlri lɛ, ɗo nun haŋa fe taa tusuɛkeri ká nulue na, ka táŋ kaɗ kaɗ ɓáy *fe poy ká ndaɗ ɓamba kal fe poy ká i puo ɓáy sím fe hɔlri na. 24 Tusuɛke lɛ, *Krisi na rìi a se ɓil hul ka̰ni ká nduo nzoɓ ze ɗaa ya. Hul ka̰nike na ɓa tem hul ka̰ni taa tusuɛke. Roo lɛ, ka rìi a se nulue kḭ, ɓe ze ɓa zaɗ káʼa ɗo ɗi timbɛɗɛ ká pol Ŋgɛrɛwṵru ɓay tul naari. 25 Ka rìi ɗi a puo fe faa ɓal ŋgḭ-ŋgḭi munu ká *ŋgɛrɛnzoɓ fe poy luye Ziɓri rìi a se *zaɗ ká taŋ kaɗaŋ ɓamba tasiri mbiimbam ɓáy mbiimbam ɓáy sím fe hɔlri na ya, 26 ɓo munu ya lɛ, ɓáy nam ká Ŋgɛrɛwṵru ɗáake tusiri hɔy na, káʼa kɔ́kɔ sɛkɛ fe faa ɓal ŋgḭ-ŋgḭi. Roo lɛ, timbɛɗɛ ká ɓa ɔ́rɔ ɓie sewri ká náa ɗori ɗi key na, Krisi vi ba mbḭw hɔy ɓay gbṵ́ nzaa feya̰a ɓáy faa sùo-ɛ káʼa mbi ha̰ huɗ ɓa vuy fe poy. 27 Nzoɓri riw bele na, i huka faa ɓal ba mbḭw hɔy; falɛ lɛ, Ŋgɛrɛwṵru a kúŋ sal ɓay zuɔ tul-ri. 28 Ɗo faa mbḭw munu nda̰w, ɓe Krisi na, ka mbi sùo-ɛ ɓa vuy fe poy a hu ba mbḭw kḭ hɔy ɓay náake feya̰a ruɔ nzoɓri. Yḭ́i ɓe taa kḭ ku lɛ, káʼa náa feya̰a nzoɓri mbǎa, roo lɛ, káʼa yḭ́i ɓay ya̰aŋa nzoɓri ká i kaw tul ɓal-ri í giyaŋ ni kekeke.

* 9:5 9.5 Ì kḭi mbeɗe Tḭ́i kɛlɛ 25-26. † 9:20 9.20 Tḭ́i kɛlɛ 24.8.