Mbeɗe sáka kuni fie 2 Za̰a 1

2 Za̰a

Mbeɗe ndeke ɗi siɗike ká Za̰a ɗaa

Ɓay ká se tul feri ká ɗo ɓil mbeɗe ni key

Mbeɗe key na Za̰a ɗaa ha̰ «má̰y ká Ŋgɛrɛwṵru naa ni ɗo ɓoɗ ɓáy vi-eri.» Ɓayke hii ɓáa mii, má̰y na ɓa nzoɓ mbika lawri ká i mbṵ tul kḭ zaɗ mbḭw, a vi-eri laa lɛ, ɓa nzaa váw sùori ká ɓoɗ ɓoɗ. Za̰a na hii ɓay haŋa nzoɓ mbika lawri hii kḭ ɓa lie ɓa lew, a í ru-ruy ɓaŋguɔ ziŋ nzoɓ úla nzoɓri ká i ya̰a zaɗ kpol kpol ɓáy fe fére ɓari ká ɗo ɓáy zaɗɛ ya se tul Krisi na.

Máa ɓayri ká ɗo ɓil-e

Híi kḭ ɓa fe ká ndaɗ ɓamba: 1.1-6

Báka ɓay ká se tul fe fére nzoɓ úla nzoɓri: 1.7-11

Ɔ́rɔ ɓie ɓay: 1.12-13

Soko ká Za̰a hii ha̰ nzoɓ mbika lawri

1 Ɓi ká mì ɓa ŋgɛrɛ tul peɗ ká tul nzoɓ mbika lawri ká i mbṵ tul kḭ na, mì ɗaa mbeɗe key ha̰ má̰y ká Ŋgɛrɛwṵru naa ni ɗo ɓoɗ ɓáy vi-eri, ɓari ká mì kɔ ri ɓa nzoɓ nun-i*. Ɓa ɓi huo-i hɔy ze, mì kɔ rì ɓa nzoɓ nun-i ya, roo lɛ, ɓa ɓari riw bele ká i tuu tusuɛ ɓay tuu na, 2 ɓay ḭi lɛ, tusuɛ ɓay na ɗaa puo ká ɓil law naari, a saɗ ziŋ naari ɓaŋguɔ. 3 Ndaɗ ɓay haŋa law huoke nda̰w, kɔ́kɔ nun síe nzoɓ nda̰w, rɔɔ ɗɛkɛkɛ taa Bǎa Ŋgɛrɛwṵru ɓáy Vi-e Zezu *Krisi na, ka sáɗ ziŋ naari, ɓay haŋa náa ɗǒkeri ɓil tusuɛ ɓay ɓáy law ini.

Ì kɔ kḭ ɓa nzoɓ nun kḭ

4 Mì ɗo ɓáy bawda suoriya, ɓay ḭi lɛ, mì ziŋ vu-ɔ ha̰nɛri ká i se simseɗ ká maa ɓáy tusuɛ ɓay munu ká Bǎa mbi nzi-ɛ ká ɗi na. 5 A timbɛɗɛ key na, tína kere, mì koɗ mù, náa hiiri kḭ ɓa lie ɓa lew. Ɓay ni ká mì ɗaa ɗo mbeɗe key na, ɓa *bol kusol fie ya, roo lɛ, ɓa bol kusol ká náa ya̰ari ɓayke ɓáy nam ká náa mbíkeri law naari hɔy. 6 Ì kɔ, híi Ŋgɛrɛwṵru na ɓa ɗaa vu mbom ɓo tul bol kusol-eri. A bol kusol ká ì laa ɓayke ɓáy nam ká ì mbíke law-rì hɔy na, ɓe ze ɗo key: ndaɗ ɓay haŋa rì ɗo ɓil law ini ɓaŋguɔ.

Ɗoko tul sùo ɓay

7 Nzoɓ úla nzoɓri ŋgḭi ɓamba i ya̰a zaɗ kpol kpol ká tusiri key. Ɓay ká mii, Zezu *Krisi ví ya̰a sùo ziŋ nzoɓ na, i hii ɓay ya̰aŋa ya. Nzoɓ ká ɗaa fe mini key na, ka ɓa nzoɓ úla nzoɓ, a ɓa nzoɓ tul ŋga̰ni Krisi. 8 Ì nzɛ ɓáy sùo-rì kḭ nda̰w rɔ, ɓay haŋa ɓo peɗ ká ì ɗaa na, ka ɓíɛ gɔr hɔy ya, roo lɛ, ì ya̰a fe tunduo peɗ ɓaarì na ɓay zaɗɛ ŋgiɗ bele. 9 Ì kɔ, nzoɓ ká ɗo tul ɓay ká i fere rì se tul Krisi ya, rɔɔ a se ɓáy taa ɓe ɓoɗ na, ka zuɔ ziŋ Ŋgɛrɛwṵru ya. A nzoɓ ká ɗo tul ɓayke na ku laa lɛ, ka zuɔ ziŋ Bǎa nda̰w, Vi-e nda̰w pi. 10 Ɓe mini ze, zaɗka nzoɓ se luo-rì, rɔɔ a fereri ɓay kḭ ɓoɗ lɛ, ì mgba ni ɓa sùo-rì ya, a í hii soko kara ha̰ ni ya nda̰w, 11 ɓay ḭi lɛ, nzoɓ ká ɓaa ɓay ha̰ kḭri nzoɓ ká mini na mii: «Mu vi ɓáy kere» na†, ɓe hɔy kara, ka ɗo ɓil fe ɗáa ka̰aya nzoɓke na nda̰w.

Wáa ɓay kɔ́m ɓáy soko ɓe

12 Mì ɗo ɓáy feri ŋgḭ-ŋgḭi ɓay ɓáa ha rì, roo lɛ, mì hii ɓay vbíe ɓáy nduo-i hɔy ɗo mbeɗe ha rì ya. Mì hii ɓay séke luo-rì sùo-i ɓay haŋa náa ɓaari ɓay ká nun kḭ. Ɓe nda̰w rɔɔ, suoriya a mbáa ɓil law naari na gba̰y gba̰y ɓáy.

13 Vu tínaŋ-ari‡, ɓari ká Ŋgɛrɛwṵru nan ri ɗo ɓoɗ nda̰w na, i pie ɓáy soko ha̰ mù.

* 1:1 Nzoɓ ndáy ɓay ha̰nɛri i ker í ɓaa mii, ŋgɛrɛ tul peɗ ɗaa mbeɗe key na ha̰ má̰y ká riŋ-ɛ ɓa Kiriya ɓáy vi-eri. A nzoɓ ha̰nɛri laa lɛ, i ker í ɓaa mii, má̰y key na suo bol mbṵ kḭ nzoɓ mbika lawri, a vi-eri laa lɛ, ɓa nzoɓ mbika lawri. † 1:11 Ká zaɗ ni key na ɓaa ɓay se tul soko kḭ hɔy ya, roo lɛ, ɓa ya̰aŋa nzoɓ ká mu kɔ ni taŋ ya, mú pɔŋ faa ha̰ ni fere nzoɓri fe ká zaɗ mbṵ́ kḭ. ‡ 1:13 Nzoɓ ndáy ɓay ha̰nɛri i ker í ɓaa mii, «vu tínaŋ-ari» ɓa nzoɓ mbika lawri ká Za̰a kaw ziŋ ri.