15
Ɔ́rɔ ɓie ɓíɛ ká mbi ɓáy zaɗ ká tɔnɔ say
1 Falɛ ku lɛ, mì kɔ fe ká kiɛ fe kḭ ká nulue ká ɓa hḭɛ zikiki a ndaɗ kɔ́kɔ. Leɗ nzaapeɗ Ŋgɛrɛwṵruri ká tɔnɔ say mgba ɓíɛ ká mbi ɓáy zaɗ tɔnɔ say ɗo nduo-ri. Ɓa ɔ́rɔ ɓie ɓíɛ ká mbi ɓáy zaɗ ro zu, ɓay ḭi lɛ, ɓáy faa ɓíɛ ká mbi ɓáy zaɗ ku na ze hɛrɛ Ŋgɛrɛwṵru ɔ ká ɗi.
2 Mì kɔ fe rìi bawda maambii ká ɗo ka̰rara ká zukri kḭ ɓáy huu; a mí kɔ ɓari ká i haw yṵm ká tul fe mgbam ká ɗo yer, ɓáy tul fe ká i mbuo rìi ni, rɔɔ ká tul ɓe na ká suy ɓe suo bol riŋ-ɛ na. I ɗo siya ká tul bawda maambiike, í mgba nzaŋa ká Ŋgɛrɛwṵru ha ri ɗo nduo-ri gbiri gbiri,
3 a í ɗi sim ká *Moyze, nzoɓ peɗ Ŋgɛrɛwṵru ɗi ká pola lew, ɓáy sim ká Vu Baɗu ɗi mii:
«Ŋgɛrɛmbay Ŋgɛrɛwṵru Nzoɓ Hṵrusuo Luye,
fe ɗáa ɓori na ɓa hḭɛ zikiki a ndaɗ kɔ́kɔ!
Mbay tul nzoɓri ká sa̰w puo ɓari ɓoɗ ɓoɗ bele,
feri ká mù leke ɓay ɗáa na,
ɗo ɓáy zaɗɛ a maa ɓáy tusuɛ ɓay.
4 Ŋgɛrɛmbay, wa̰a, nzoɓ ve nda̰w rɔɔ ti hḭ́ɛ mù ya lɛ?
Nzoɓ ve nda̰w rɔɔ, a sáŋ ɗáa riŋ ɗika ɓo tul-a lɛ woo?
Ɓa tusuɛ, ɓa ɓo huo-ɔ kḭ hɔy ze mù taŋ kaɗaŋ.
Nzoɓri ká sa̰w puo ɓari ɓoɗ ɓoɗ riw bele na i vika luo-ɔ
í huku pol-a ɓay rúo mù,
ɓay ḭi lɛ, fe ɗáa ɓori ká ɗo ɓáy zaɗɛ na
ɗo zaɗ hie ká nun nzoɓri riw bele.»
5 Falɛ ku lɛ, mì kɔ *hul ka̰ni Ŋgɛrɛwṵru ká nulue ká *zaɗ ká taŋ kaɗaŋ ɓamba tasiri ɗo ɓil-e na mgbuɗa ɗo hɔy.
6 A lɛ, leɗ nzaapeɗ Ŋgɛrɛwṵruri ká tɔnɔ say ká i mgba ɓíɛ ká mbi ɓáy zaɗ ká tɔnɔ say ɗo nduo-ri na, i tḭi saa hul ka̰nike. I nduo gari ká ndaɗ ɓamba a ndṵy a puu kpala kpala; i ɗaa sal ɓil ká i ɗaa ɓáy lari ká ndṵy zḭriri zḭriri na tekre nzaa law-ri.
7 Lɛɛ, fe mbḭw ká sakra fe ɗoko ɓáy kumnunri ká niŋ na, ha̰ leɗ nzaapeɗ Ŋgɛrɛwṵruri ká tɔnɔ say na, tuŋguo tɔnɔ say ká i ɗaa ɓáy lari ká ndṵy zḭriri zḭriri. Tuŋguoke ku na him hɛrɛ Ŋgɛrɛwṵru Nzoɓ Káw Ɓáy Kumnun mbiimbam ɓáy mbiimbam ɓaŋguɔ na, mbaa ɗi maa ri mbḭw mbḭw bele.
8 Báyḭi lɛ, zuu huu ká kiɛ riŋ ɗika Ŋgɛrɛwṵru ká ɗo, ɓáy hṵrusuo-ɛ na ya̰a ɓil hul ka̰nike kpol kpol bele ha̰ nzoɓ mbḭw mini kara maa ɓay ríi ɗi ya kpṵru maa ɓáy ɓíɛ ká mbi ɓáy zaɗ ká tɔnɔ say ká leɗ nzaapeɗ Ŋgɛrɛwṵruri ká tɔnɔ say i víke na ɔ bele nda̰w rɔ.