7
Estébanubay tu̱choda jiyadaju̱
1 Jadchiy ji̱ta su̱teda caserdótevyeda nutyityu̱ siva: “¿Si̱tenuni̱viy rani̱cha jiryatiy ru̱tayu?”
2 Jadchiy ji̱ta su̱mutya̱jada Estébanubay: “Jirya̱ntya tuva̱chu ramu, vaduy, ratyeryi̱veda, rajye̱vyeda jarye. Sadityadoda Ju̱denu Vándanu̱ vu̱myunatyi̱ Avurá̱bayu, jasityidye savichanu̱yada variy Mesupotámiya mucadimu, netimyu̱ ne savichanu̱yada Ará̱mu variy didye.
3 Su̱teda ji̱ta Ju̱denu siva Avurá̱bay:
‘Ya̱numa sipyatay jimyucadimusidye, jityevay ju̱sa̱siy jarye, tara mucadimuju̱ntidye, jiryatiy ra̱day datyanu ramuju̱ ji.’
4 Sasipyateda ji̱ta Cardéya ja̱nvay mucadimusiy, savichanuvejada Ará̱mu variy. Jadchiy ji̱ta, sadiiyadanumatiy saja̱y, saja̱teda ji̱ta jadchiy jirya mucadimuju̱, jiryatiy jiryevyicha diye sa̱ra̱ju̱ jiyu ramu.
5 Ne sasa̱ryu̱yada Ju̱denu mucadi varidyidyeñi̱, netimyu̱ ne vinu sanumutujiju̱ sasa̱ryu̱yada variyu. Su̱teda ji̱ta variy sivantiy:
Ra̱sa̱y jirya mucadi jiijyu̱ ji, varityi ya̱diiy ramusiy mucadi, jidyedyeñuju̱numa ra̱ma̱cho̱sara varidye.
Ne deti̱ savicha̱da Avurá̱ varidyidye.
6-7 Su̱teda ji̱ta Ju̱denu sivantiy:
‘Jidyedyeñu ra̱chasara tara mucadimu, jasityi rirya̱muchechivyechara jasiy vicha̱da ja̱nvaryi, rirya̱javatyajaya̱sara riy, rirya̱jantyunujaya̱sara variy jasiryi, daryaju̱yu pacha vaata sa̱ra̱ju̱. Ra̱day murichenutaniy rivantidyeryi jasiy vicha̱da ja̱nvantyidye, jiryatiy jimyuchechiy jantyunuvay daryaju̱ riy.’
Su̱teda ji̱ta Ju̱denu:
‘Rivasiy ji̱ta rirya̱sipyatay jidyedyeñuveda jasiy mucadimusintyi, rirya̱jmu̱tyanuvi̱sara variy jiyuntirye.’
8 Ju̱denu jteda siva Avurá̱bay variy:
‘Ya̱jmutyodosiy ti̱ta̱ju̱ riy jidyedyeñu jiryatiy vaduryi, riñuma jachipurya jiryatiy ri̱tatyi darya yivara.’
Ramuni̱tiy jiryatiy sadetuyada Avurá̱bañi̱ Isácubay, sarupedanumatiy, mumurundamiñijyatemusiy su̱mutyododa variñi̱. Daryaday savichadeda Isácubañi̱ jidyenu Jacóbubay varintyi; daryaday savichadeda Jacóbubay varintyiryi jidyedyeñuntidye, jiryatiy vu̱yaju̱ryi, danu̱ju̱y rinchaju̱, riñuma ji̱ta ju̱de varintyidyeryi Judíyu ju̱riiñu tavantyidye.
9 Ritye̱ryu̱tya̱da ji̱ta Jacóbubay dadyeñubañi̱ jityeryi̱bay Jusíbe. Ritye̱ryu̱tya̱da yinnu̱yadamu Ejíptu mucadi ja̱nvamyuni̱.
10 Jasidye savicha̱da Ju̱denu sisa̱, ni̱tiy jantyuyada saparu̱tyajomusiy yiva. Sadityadoda ji̱ta Ju̱denuni̱ Jaravú̱bay, jiryatiy ja̱mu nutyityu̱ Ejíptu mucadimuni̱: ‘Ni̱ni̱ ji̱ta Jusíy si̱tenu datyara, samirya jachityi̱ risa̱ju̱ni̱.’ Jadchiy ji̱ta sabayada Jaravú̱bañi̱ Jusíbe jimyucadi nutyityu̱ju̱, si̱tenu saroriy nutyityu̱ju̱ jarye.
11 Jadchiy ji̱ta ravicha̱da jachi̱nu runda ti̱ta̱ju̱ mucadiva, Ejíptu mucadiva, Caná̱ mucadiva jarye. Jaryi rirya̱ntyuñu̱yada jmyicharavasiy variy, ne vana̱y ridyiyada ta̱riy vu̱myunatyavay riva jmyichara variy.
12 Satuva̱chodanumatiy Jacóbubay: Jasinrya jmyichara Ejíptumu, su̱pa̱jada ji̱ta riy jidyedyeñubay vu̱myunatyavay variy: ‘Jirye̱jiya Ejíptumu jmyicharana̱cho̱.’
13 Rijetyiiñumatiy jiya̱da rumuntiy, variñi̱ ji̱ta ridyetya̱dani̱ jityeryi̱bay Jusíbe jasiy, Jaravú̱bay jarye datya̱da variy ta̱ra nijya̱mi̱ra Jusídye.
14 Su̱pa̱jada ji̱ta Jusíberya jiñiquejada simu jijye̱be: ‘Jiyu ji̱ta ye̱cha risa̱, ti̱ta̱ju̱ ratyeryi̱vedata.’ Riya̱da ji̱ta variy rumuju̱ daraju̱ñijyate vu̱yaju̱y nijya̱mi̱, tadajyo rinchaju̱.
15 Saya̱da ji̱ta Jacóbubay variy raruva̱vaju̱, Ejíptumuju̱. Jasiñuma sadiiyada varidye, ti̱ta̱ju̱ sadadyeñu diimyu̱yada yisa̱ju̱, jiryatiy ta̱riy vu̱myunatyavabedyeryi.
16 Ru̱toda ji̱tara Jacóbu babyi variy jimyucadimuju̱ntiy, Siqué̱myuju̱. Ribeyada bapyo vudi vimura, Avurá̱bay ta̱ryu̱rya vimu, jiryatiy pupaday criquiy murichirya sata̱ryu̱yada Amórubay dadyeñumusirya.
17 Jadchiy ji̱ta rani jti̱ru̱yadadenuma, jiryatiy sani jteda Ju̱denu siva Avurá̱bay:
‘Jidyedyeñu ra̱jasa̱chara rajuuju̱ variy Ejíptumu.’
18 Varicha̱ra̱ju̱ sajayada vadi nutyityu̱bay, jiryatimyu̱ ne sadatya̱dani̱ Jusíbedye.
19 Ni̱ni̱ ji̱ta quivu̱chunu̱yada vu̱myunatyavabe jiyadasiryi, varityi savichaniñu̱yada va̱cha ridyedyeñu jiyadasiyu, sajatyataniñu̱yada variy ridyedyeñuntiyu, vadi rupachusavay, riñuma jasa̱y.
20 Variryundamu day sarupeda Muyusésibentyi, sami̱ dera savicha̱da derapudera Ju̱denu diya. Mu̱nvay jarimyuni̱ sa̱ra̱ju̱ rijye̱vyechoda saja̱y rorimyuyu.
21 Sajatya̱danumatiy saja̱y jiryorimyusiy Jaravú̱bay jtedamuni̱, varicha̱ra̱ju̱ saryeda Jaravú̱bay detubadyeñi̱, ni̱numa ja̱vyechoda si̱tenu jidyenuju̱ varidyeni̱.
22 Jasiñi̱ ridyetyadoda Ejíptu ja̱nvay ti̱ta̱ju̱ tara datya̱dani̱. Ni̱ni̱ ji̱ta sani̱cha jiñu Muyusésiy si̱tenu datyara, sadatya̱damu jiñiquera niquejada, tara jvaayada jarye.
23 Sito̱tadedanumatirya daryaju̱yu vu̱yaju̱y vaata, saya̱da ji̱ta jañu̱ñu ruumu jityevay, Irayénu dadyeñu.
24 Jasiñi̱ sadiñuvejada siva ti̱qui jityenu, su̱vatyi Ejíptu ja̱mi̱ samo̱muni̱; Muyusésibe siryi̱jada variy sayadaju̱, samurichedoda varirya jityenu jvatyicha̱da, jiryatiy su̱vedani̱ Ejíptu ja̱mi̱ daryaju̱.
25 Mitya sajachipiya̱jada Muyusésibe: ‘Ridyetya dyetya ratyevay: Rimusiy sa̱ra̱y Ju̱denu riyada,’ ridyetyaru̱yadatya daryaju̱ ridye.
26 Ratarya rundamu, su̱nu̱yada nani̱vatyi rityenuju̱yu, sani jdutyaru̱yada samirya nanunique̱yada, su̱teda variy nadiva: ‘¿Nu̱tyu mityijyi tenuju̱dye sa̱ni̱cha? ¿Ta̱raju̱ra sa̱nupochuvá̱dyeyu, ta̱raju̱?’
27 Ni̱tiy pochodara jityenu mo̱ jaryi, sajatya̱da variñi̱ Muyusésibe: ‘¿Chi̱ra rañi bay nu̱ntyityu̱ju̱ dajyi, cadnaduju̱ jarye?’
28 Su̱teda ji̱ta variy sivantiy: ‘¿Yivaryu̱tyantidyerye, yivaryu̱y? nu̱tyu yivaje rurundamuni̱ Ejíptu ja̱mi̱ntiy.’
29 Satuva̱chodanumatiy Muyusésiberya saniquejada, sabayada ji̱ta variy jadchiy. Savichanuvejada Madiyá̱mu, nu̱tyu raruva̱ ja̱mi̱ varidyeñi̱. Jasiy sadetuñuvejada danu̱ju̱y vanuju̱y.
30 Jadchiy ji̱ta, daryaju̱yu vu̱yaju̱y vaatamusiy, samu̱ti̱jada Ju̱denu jpa̱nu variy mitya tomu, musimyu jiryatiy Sinayí jtyatarara. Sadityadoda variy Muyusésibeyu, jiidañube, nu̱tyu nutasaranube rani nu̱ya̱.
31-32 Sati̱tta̱da Muyusésibe varirya. Sani tuudiyadanumatirya jiiday, sani ntatyidye ya̱diy samiy variy riva, satuva̱choda ji̱ta varirya saniquejada Ju̱denu:
‘Nu̱tyu rañi rañi̱cha Ju̱denu, Avurá̱vedabay ta̱riy munatyavay Ju̱denu, Isácubay, Jacóbubay jarye.’
Samuchutyedanuma variy jichuvu̱yadamu day, ne su̱nu̱ryu̱yada variy sana̱cho̱nu̱day.
33-34 Su̱teda ji̱ta Ju̱denu variy siva:
‘Ya̱sipyatara jichaapatu jiñumutuvasiy, ne yinu̱y Ju̱denuju̱ jiintyasarara jirya mucadi day, ju̱bachara saapatuta radeda rancha. Ta̱rimya̱ radyi riva, ratyuva̱chuma̱ntirya rañijya̱nvay jantyuyada Ejíptumuntiy. Ratyuva̱chuma̱ra ripyaru̱tya̱da, varicha̱ra̱ju̱ ri̱musa̱siy, ra̱tidye jantyuñuvi̱ jiryiva.’
Sanatuyada ji̱ta variñi̱:
‘Varenuma, ra̱tidye jpa̱ Ejíptumuju̱ ji.’
35 Daryamuni̱day riñi jatya̱da satevabe Muyusésibe ta̱rintyiyu, jiryatiy ru̱teda variy siva:
‘¿Chi̱ rañi bay nutyityu̱ju̱ dajyi, cadnaduju̱ jarye?’
Ni̱day su̱pa̱jada Ju̱denuntiy, ni̱tidye ra̱cha nutyityu̱ntiy, riyada ra̱yasi̱ jarye sa̱cha, Ju̱denu jpa̱nu jtedamu, jiryatiy sadityadoda nutasaranujuunubesiyu.
36 Ni̱ni̱ Muyusésibe sipyata̱da Ejíptumusiryi Avurá̱bay dadyeñu, ti̱ttasaramusiy, mityamusiy datya̱data jvaayadamusiy jarye, jiryatiy sivaayada Ejíptumura, Varadaja̱ jmityo̱mu jarye, mitya tomu jarye, daryaju̱yu vu̱yaju̱y vaata sa̱ra̱ju̱.
37 Ni̱day Muyusésibe jteda ruuva Irayénuvedabantyi:
‘Jiryiva tu̱chu̱ju̱ sa̱bay Ju̱denu ti̱qui jiryetye. Daryaday sa̱chantiy nu̱tyu ray daryantiy.’
38 Ni̱day Muyusésibe vicha̱da riquebyimu nijya̱nvay mitya tomu, savicha̱da variy sisa̱ Ju̱denu jpa̱nuntiy, jiryatiy saniquetta̱da variy Sinayí musinchani̱. Savicha̱da variy ruusa̱ ta̱riy vu̱munatyavantyi, ni̱ni̱ jmutya̱jadara niquejada, ju̱na̱re jnu̱yadaju̱, sa̱tidye sa̱y jiryerya.
39 Dantyamu̱y ne rityuva̱churu̱ñu̱yada ta̱riy vu̱myunatyavay simu, ne rivya̱ta̱da jintyityu̱ju̱ variñu̱nñi̱. Riñi jachipiya̱jada ta̱rya̱da variy Ejíptumuju̱.
40 Ru̱teda ji̱ta variy siva sataryi̱bay Arú̱bay:
‘Ya̱jvaay ju̱denu nu̱jyu̱cu̱, ni̱tiy ra̱jiyanta nu̱y. Jityeryi̱ Muyusésiy jiryatiy sasipyata̱siy Ejíptumusiy nu̱y, ne nu̱dyetya nu̱tyuñi̱ntiy sadatyá̱siy, tama̱ siti̱ nu̱dyimunu̱day, tama̱.’
41 Jadchiy ji̱ta ruuvaayada variryundamuni̱ nu̱tyu voca denu, ru̱veda ji̱ta variryi yasi̱veda, rirya̱tidye jnutatya variy óru teramusiy jvaachi̱muju̱ riy; riichana̱tya̱da variñi̱ jiryatiy ru̱ndejada si̱tenu jijyomututani̱.
42-43 Sa̱numityeda ji̱ta Ju̱denu variy rirya̱jisiy:
‘Dañuma rirya̱tuva̱chu ruumu jdarichijyuu.’
Nu̱tyu daryani̱ rani̱cha nu̱chara sacateraniy Ju̱denuju̱ tu̱chu̱bay:
‘¿Jirya̱ntya tuva̱chu, Irayénuveda, tama̱ jiryeñi jnutatyanu̱tyi yivi̱ ray, tama̱, jiryatiy jiryeñi jvajeya̱nu̱tyi daryaju̱yu vu̱yaju̱y vaata sa̱ra̱ju̱, mitya tomu ricyu̱? Vinu rani̱day Modócu sa̱tu roriy jiryenchutityintyi, jdarichiy jantyasi̱ jarye risa̱ju̱, Rejánu jtyati̱ ju̱denu varidyeñi̱. Ni̱ni̱ jiryeyasanta daryaju̱ dayu, jiryatiy jiryi̱ndenu yitadyeñi̱. Ramuni̱tiy ra̱sipyata jiyusiy jirye, ra̱tidye jpa̱ Babinóniya jiyadaju̱ jirye.’
44 Ravicha̱da ji̱ta nu̱tyu donajaryoriy ta̱riy vu̱myunatyavabemyu, mitya tomu, jadchityidye rijechipityaja̱jada variñi̱ Ju̱denu. Daryani̱ ruuvaayada ti̱ta̱ju̱ntirya jiryatiy sadatyadoda Ju̱denuni̱ Muyusésibe daryá:
‘Darya ni̱day ya̱jvaatyanintyirya daryatiy jidyi rivantiy.’
45 Raday donajaryoriy ru̱mutya̱jada ta̱riy vu̱myunatyavabentyi, jiryatiy rijeyada variy vatajuu Josuvébatya jirya mucadimu, jiryatiy Ju̱denu jatya̱da riy tanijya̱nvay rirya̱jisiy jadchiy. Rumu ru̱toda varirya nu̱tyu donajay jasi̱jay jiryoriitya̱ju̱, daryaday ruuvaatyityiyada Davyíbe rundasa̱ra̱ju̱ntiy.
46 Ni̱ni̱ Davyíbe samirya jachityi̱ Ju̱denuju̱, sani roriiryu̱yada Ju̱denu vichajoju̱ jasiy, rimyunatyi̱vedabay Ju̱denujiju̱.
47 Sadenubay Sadumú̱bajyu̱numa rama̱cho̱jada roriiyada day, ni̱numa ra̱jvaadyerya vichajo sa̱jiju̱ Ju̱denu day.
48-50 Ju̱denu na̱vay vichi̱, ne vicharu̱y ravimu jiryatiy nijya̱mi̱ jomututa jvaacharara, nu̱tyu su̱teda Ju̱denuju̱ tu̱chu̱bay darya:
‘Jarichu ramya̱sajo, mucadi ji̱ta rañumutujiju̱. ¿Nu̱tyura roriy rirya̱jvaay raryorijyu̱, nu̱tyura roriy?’
Su̱teda Ju̱denu variy:
‘¿Mirya vichajomu rirya̱jiitutyanirye, mirya vichajomu? Nu̱tyu rañi̱day rañi jvaayada rajyomututa ti̱ta̱ju̱ra, mucadi, jarichu ti̱ta̱ju̱.’ ”
51 Jadchiy ji̱ta sariryi̱jada Estébanubay ju̱na̱rya niquejada: “¡Ne vana̱y tuva̱chuvatye jiryetye! ¡Jaryi surra jachityavañi̱ jiryedye, tu̱yupuryimyi risa̱ju̱ jirye! Dantyamu̱y ne jiryetyuudityaniryu̱y Ju̱denu Jnutu dayu. Nu̱tyu ta̱riy vu̱myunatyavabetyi vichanu̱yada daryantiy, daryaday jiryevyichantiy.
52 ¿Mi̱ra Ju̱denuju̱ tu̱chuvay tenubay ne rirya̱rupantanu̱yada ta̱riy jiryemyunatyavabe, mi̱? Riñi jvañu̱yada riva daryi, jiryatiy rityu̱chunu̱yada daryaju̱ ruuvara: Sa̱day jniy vase jvaarya. Diyete, sani jnimya̱tiy ji̱ta, jiryi̱vay variy saniya̱resiyu.
53 Nu̱tyu jiryeñi rañi jmutya̱jadara Ju̱denu datyadoda, Ju̱denu jpa̱nu jmu̱tya̱damu jiryeñi jmutya̱jadara, dantyamu̱y ne jiryetyuva̱churu̱y ramu day, nu̱tyu jiryeñi̱day rañi jvatyiñi̱ Jesús.”
Estébanubay diiyada
54 Rityuva̱chodanumatiy japuvedara darya niquejada, jaryi riñique̱tta̱da varirya, richu̱mutuyada varirya jijya̱da jiñique̱yadamu sana̱cho̱ju̱ Estébanubay.
55 Estébanubavya samu̱chadeda Ju̱denu Jnutu, su̱nu̱yada ji̱ta jarichuvimu variy, sadiyada ji̱ta variy riva Ju̱denudá. Sadiyada variy siva Jesúsntiy, jiryatiy saradeda Ju̱denu nutyityudamyuju̱.
56 Su̱teda ji̱ta Estébanubay variy: “¡Jirya̱jnu̱y! Rañi dimya̱ riva jarichu muttarya day, radyi siva Nijya̱mi̱denu, jiryatiy saraniy santyityudamyuju̱ Ju̱denu.”
57 Riche̱ñe̱ya̱jada japuveda variy, rimyutadoda varirya jityu̱yu, richiryi̱jada ji̱ta variy simu Estébanubay.
58 Rirya̱ra̱cheda ja̱mu vicha̱damusiy bimuju̱ni̱, jasityi rijecheda variy ravichu̱tani̱. Richipyata̱da sanchiy tu̱chuvay varirya jichujay, ribeyada variy sanumutu tuunu vadero̱nura, jiryatiy ravicha̱da si̱tya Sávuru.
59 Rijechedanumatiñi̱ Estébanubay ravichu̱ta, varicha̱ra̱ju̱ sajoráyada sanijyu̱ Jesús: “Ye̱jiriy yimuju̱ni̱ ri̱ntu, Nutyityu̱.”
60 Sa̱dasidyoda ji̱ta varintyiyu, sasa̱ñe̱ya̱jada varintyi: “Nutyityu̱, ne ya̱va̱ta ruuvara ramurichirya jijyuuchuveda.” Saniquejadanumatirya jirya niquejada, sadiiyada variy rivasiy. Sajachipiya̱jada Sávurubay variy: “Jo, samirya day riñi jvañi̱.”