3
Savichasara Jesús jaryiñu̱ Muyisésibemyusiy
1 Ramuni̱tiy, ratyeryi̱veda, jiryatiy jiintyasavañuma Ju̱denumuju̱ vu̱y, jiryatiy sanatuyada yisa̱ju̱ vu̱y, vurye̱ntya jnu̱y samiy sana̱cho̱ Jesús ni̱tiy vichasara Ju̱denu nusu̱byi vuryimuju̱, Ju̱denu mo̱mu jarye savichasara vuryeyada rá̱ñu, jiryatiy vu̱tyuva̱chu vatajuu simu.
2 Daryatiy savicha̱da Muyisésibe siityera Ju̱denuju̱ ti̱ta̱ju̱ sansu̱yadamu, sanijya̱nvay cabyiva, daryani̱day savichasara Jesús siityera saju̱ ni̱tiy jpa̱jadani̱.
3 Jesús ji̱ta raryi jmutya̱ jaryivya̱ju̱ra vanda Muyisésibemyusiy, daryani̱ vu̱ryi jnu̱y jaryi jvadichi̱ni̱ jiryoriy jvaañu jiryorimyusiy.
4 Nu̱ñi taroriqui ti̱qui jvaañu tara, Ju̱denu ji̱ta ju̱dejada ti̱ta̱ju̱ra.
5 Savicha̱da Muyisésibe siityera Ju̱denuju̱, nu̱tyu samiy muchechiy savicha̱da daryaju̱ Ju̱denu siityari̱vajyuu cabyimu, sa̱tidye tu̱chu vijyo̱mujachera jiryatiy sani jteda yaniquera.
6 Jesucrístu ji̱ta vichasara siityera Ju̱denuju̱ nu̱tyu sadenu jichiityari̱vajyuu nusu̱yadaju̱, jiryatiy vu̱ñi̱ vu̱ñi̱cha, vu̱ryityi jiriryi̱ surravay rabaryi̱jadasa̱ra̱ju̱ra vu̱yntuyada Crístujiju̱, jiryatiy vu̱jechipiya̱ ranijyu̱ vuryi̱chana̱tya̱damu.
Jiituyada jiryatiy Ju̱denu siityari̱vajyuuju̱ra
7-8 Ramuni̱tiy su̱tachara Ju̱denu Jnutu darya vuryiva:
“Jiryeñumatiy tuva̱chu diyera Ju̱denu niquejada, ne jirya̱suru̱chura jijechiy rayaro̱ju̱ nu̱tyu sanijya̱nvatyi suru̱choda jivyara jachipiya̱jadamusirya jijechiy, rirya̱ntya̱danumatiy mityatomuni̱ Ju̱denu.”
9-11 Su̱teda daryaju̱:
“Jiryemyunatyavay jantyajaya̱jada tuva̱chu̱sa̱miy daryaju̱yu vu̱yaju̱y nijya̱ca̱ ray, ridyiñu̱yada riva rivaayada jiyadaju̱. Ramuni̱tiy rañique̱yada ji̱ta riñijyu̱, ri̱teda variy: Ricyarayanumucha jijechimyu; ne riryupiryu̱y rañú̱va. Jadchiy ri̱tedara si̱tenu niquejada rañique̱yadamu: ¡Tama̱ rirya̱jay rajyiituyadamu, tama̱, mitya!”
12 Jiryi̱nu̱tyata̱ta ra̱jisiyu, ratyeryi̱veda, jiryeñuma vichasara tuva̱chu̱sa̱miy, jamirya jachityavay, jasicha̱ra̱ju̱tiy jirya̱jiintya sa̱jisiy Ju̱denu jnu̱ñuyu.
13 Jirya̱ma̱ vanu̱tya̱yu jasicha̱ra̱ju̱tiy sasa̱y Ju̱denu jnu̱yadaju̱ vu̱y, jiryeñuma suru̱chura jijechiy juuchuveda quivu̱yadata.
14 Vu̱ryityi jiriryi̱ surravay rabaryi̱jadasa̱ra̱ju̱ra simu tuva̱choda daryatiy vu̱jyo̱ta̱da tuva̱choda ta̱riy simu, vurya̱jmutya̱ vatajuu Crístusa̱ varirya vuryeyaru̱rya.
15 Jiryatiy ti̱ jteda:
“Jirya̱tiy tuva̱chu diyera saniquejada, ne jirya̱suru̱chura jijechiy nu̱tyu ta̱rijye̱myityi suru̱choda jivyara jachipiya̱jadamusirya jijechiy Ju̱denu jiyaro̱ju̱.”
16 ¿Muvyerya nique̱ñu̱yada Ju̱denu jiyaro̱ju̱, muvye? ¿Ne viy jivye nijya̱nvadye jiryatiy richipyateda Ejíptumusiy Muyisésibejsa̱?
17 Jadchintyi, ¿Muvye jsa̱ sanique̱ñu̱yada Ju̱denu daryaju̱yu vu̱yaju̱y vaatasa̱ra̱ju̱, muvye? ¿Ne viy rusa̱ day jiryatiy riño̱teda diibyimiy mityatomu, jiryatiy rijyuuchuveda sanijyu̱ daryaju̱?
18 Jadchintyi, ¿Muvyevyara su̱teda Ju̱denu si̱tenu niquejadata, muvyevya:
“Tama̱ jirya̱jay rajyiituyadamu, tama̱?”
¿Ne viy ruuva jiryatiy tuva̱chu̱sa̱midyeryi?
19 Vuryi̱nu̱y variy ramusiy: ne vana̱y rijeyada sajiituyadamu jiryatimyu̱ ne rityuva̱churu̱yada daryaju̱ simu.