5
1 Judíyuveda jaryetanu̱yada jiquebyimusiñi̱ ti̱qui vanu caserdótevyeda nutyityu̱ju̱, ribeyada variñi̱ sa̱tidye raniy Ju̱denu mo̱mu jityevay jiyadaju̱, jiryatiy su̱ntatya̱dara riche̱rya sanijyu̱, ru̱veda riy jasi̱veda sanijyu̱ntiy, nijya̱nvay juuchuveda murichirya.
2 Ni̱ni̱ datya̱da vichadeda samiryi datyi̱sa̱miy, caravye jarye rusa̱ju̱, jiryatiy ni̱ jarye vichasara jdiva̱jni̱ jijyuuchuvedivantiy.
3 Ramuni̱ sava̱ta̱da jnutatya̱da riy jasi̱veda jvachavay jijyuuchuveda jiyadaju̱, daryaday su̱ntatya̱da tavay juuchuveda jiyadaju̱ntiy.
4 Dantyamu̱y ne ti̱ jiryeda jidyiryamusirya jirya jvaayada, vinu jiryatiy sanatuchara Ju̱denu raju̱ni̱, nu̱tyu Arú̱batyi sanatuyada darya.
5 Daryaday Crístuntiy, ne sani va̱ta̱da caserdótevyeda nutyityu̱ju̱yu, savicha̱da ji̱ta Jesús raju̱ bachi̱ jijye̱myusiy ni̱tiy jteda siva:
“Jiñi rañi̱cha radyenu, radyetuyasiy diye ji.”
6 Daryantiy ratarya niquejadamu su̱teda:
“Jiñi jiñi̱cha caserdóte ju̱na̱reju̱ nu̱tyu savicha̱da Meruquisedécu jtyati̱ daryá.”
7 Savicha̱danumatiy Jesús nijya̱mi̱ vu̱ti̱ jiyu, satu̱choda sisa̱ Ju̱denu jijechiñu̱yadamu, jiryatiy sayasanta̱da jiche̱ñe̱ya̱jadatani̱, su̱na̱ya̱ja̱ta jarye risa̱ju̱, jiryatiy sadatya̱da Ju̱denura siva jantyuyada diiyadajisiy. Satuva̱choda ji̱ta Ju̱denu simu, jiryatiy sajachiñu̱yada siityejada jachityi̱ sivara.
8 Dañuma sani̱cha Ju̱denu denu, sadatya̱da paru̱cha̱rimyusirya siityera vichasa̱da.
9 Sadatyamu̱yadanumatiy ti̱ta̱ju̱ tara yimuju̱, savicha̱da variy ramusiy rirye̱ntyutya̱da ju̱desaramu ti̱ta̱ju̱ jiryatiy rityuva̱chusara simu diyesa̱ra̱ju̱.
10 Sadiryejada Ju̱denu daryaju̱ni̱:
“Jiñi jiñi̱cha caserdótevyeda nutyityu̱ nu̱tyu Meruquisedécu vicha̱da daryá.”
Jatyi vu̱rrachura Ju̱denu siityari̱sa̱da
11 Jasidyerya rajuura tu̱choda ranchiy jiryatiy surramusiy datyasarara, jiryatiy jiryeñi̱cha tu̱yupuryimyi nta jiryejechimyu.
12 Dañuma jiryeñi vicharu̱y nta datyanuvay, jiryevya̱ta diye sa̱ra̱ju̱ sa̱tidye datyanu ti̱ ju̱na̱y jiryentyirya Ju̱denu niquejada jo̱tarantiy. Jiryevya̱ta ji̱tara ji̱tya̱ja̱ jiryi̱ntu poyadaju̱, ne ja̱myi jmyi̱sara day.
13 Tapi ni̱tiy pochusara vinu ji̱tya̱ja̱tayu, ne vana̱y sa̱jmutya̱sarara vase datyadoda niquejada, jiryatiy sani̱cha nu̱tyu deradera yintumu day.
14 Jmyichara jiryatiy surrara, rani̱ ji̱ta ja̱myi jmyi̱sara day, jiryatiy datyavañuma yivaayadamusiryi, mirya jvaayada samirya day, miryara nicyara̱y.