11
Thin ni yib i weliy Peter ngak girdi’en e galesiya u Jerusalem
1 Pi apostel nge pi’in walagey ni girdi’en Kristus u gubin yang u Judea e rrung’aged ni pi’in gathi yad piyu Israel e ku errogon nike yag ngorad fare Thin rok Got.
2 Fa’ani yan Peter nga Jerusalem, me cheal e pi’in nba’aram ni yad ba’adag ni ngkun maad’adnag e pi’in gathi yad piyu Israel ngar thibthib niged Peter ni lungurad,
3 “I gur e mman nga tafen e pi’in ndawor ni maad’ad ngorad ni girdi’ ni gathi yad piyu Israel, ma ku mu’un ngorad ko abich!”
4 Ma aram me weliy Peter ngorad murung’agen urngin e tin i rin’, ni tabab u tabolngin ni ga’ar,
5 “Gu be meybil u lan e binaw nu Joppa, mi ni piliyeg e changar rog. Mu gguy ban’en ni be yib u lang i yib nga but’ ni bod ya’an bangi mad ni ba ga’ yang ni kan nguchuruy u tharmiy nga but’ u aningeg i tabthungen, me yib i tal nga to’obeg.
6 Mu gu changar ngalan mu gguy e gamanman nib mongmor ni aningeg raba’ i ay, nge gamanman ni malboch, nge gamanman nma sirgig u but’ i yan, nge arche’ ni malboch.
7 Mu gu rung’ag ba lam ni be ga’ar ngog, ‘Peter, mu sak’iy ngam li’ ngam longuy!’
8 Machane me lungug, ‘Somol, dabiyag ni nggu rin’! Ya dariy ban’en nike yog e Motochiyel nib tagan ni ngan longuy ara ggan nde be’ech nrogon ni bay ko Motochiyel ni ka’a yan ngalan l’ugunag.’
9 Miki non fare lam bayay u tharmiy ni ga’ar, ‘Dariy ban’en ni ngam leamnag nde be’ech, ni fa’anra keyog Got nike be’ech.’
10 Ren’em e yodorom ni dalip yay, ma aram min girengiy fare n’em ngan fulweg nga tharmiy.
11 Ka chingiyal’ nem me taw dalip i pumo’on ko fare naun ni gu be par riy ni ka nol’oegrad u Cesarea ni ngarbad ra guyed gag.
12 Me yog fare Kan Nthothup ngog ni nge dab ku ug maruwar u wun’ug ko nggu un ngorad fa dangay. Ma nel’ i girdi’ ni ba’aray ni walagdad ma girdi’en Kristus e ku errogon nra uned ngog nggu warod nga Cesarea, ma gamad gubin ni gu warod ngalan e naun rok Kornelius.
13 Me yog Kornelius ngomad rogon nike guy ba engel u naun rok ni yib i par nib sak’iy, me ga’ar ngak Kornelius, ‘Mol’oeg be’ nga Joppa nge yan i pining be’ nib mo’on ni Simon fithingan, ni ku yima pining Peter ngak.
14 Ya ir e bayi weliy boch e thin ngom ni aram e re thin ni bayi thapegem ngak Got nge urngin e girdi’ nu tabinaw rom.’
15 Ma fa’an gu tabab ko welthin, me yib fare Kan Nthothup nga dakenrad ni bod rogon ni yib nga dakendad ko som’on.
16 Ma aram me yib ngan’ug fapi thin ni yog Somol ni ga’ar, ‘I John e i tawfe ko ran, machane gimed e bay ni tawfe nagmed ko fare Kan Nthothup.’
17 Ere ke yib i m’ug nib tamilang nike pi’ Got ngak e pi’in gathi yad piyu Israel fare tow’ath ni fa’ani pi’ ngodad ko fa ngiyal’nem ni fa’ani mich Somol Jesus Kristus u wun’dad; ere gag mini’ ni ngug guy rogon ni nggu taleg Got!”
18 Fa’an rrung’aged e re bugithin ney, miyad tal ndakur thibthib niged Peter miyad pining e magaer nge sorok ngak Got ni be lungurad, “Ere ku errogon nike bing Got e wo’ ngak e pi’in gathi yad piyu Israel ni ngar kolgad ngan’rad ngar pi’ed keru’rad ko denen miyad fos!”
Girdi’en e galesiya nu Antiok
19 Pi’in nib mich Jesus u wun’rad e ra weargad ni bochan fare gafgow ntay ngorad ko fa ngiyal’nem nthang e fan rok Stefen riy. Boch i yad e yan nge mada’ nga Fonicia nge nga Cyprus, nge nga Antiok, ni kemus ni piyu Israel e yad be weliy murung’agen Jesus ngorad i yan.
20 Machane boch e pi’in ke mich Jesus u wun’rad, ni pi’in pumo’on nrabad u Cyprus ngu Cyrene, e ranod nga Antiok mu ku ra weliyed e Thin rok Got ngak e pi Gentile ni aram e yad be machibnag ngorad fare Thin Ni Bfel’ ni murung’agen Jesus.
21 Ma be yodorom ma bay gelngin Somol ni be un ngorad, ma bo’or e girdi’ ni mich Jesus u wun’rad ngar piggad ngar manged girdi’en Somol.
22 Me yan murung’agen e re bugithin ney nge mada’ ngak girdi’en e galesiya nu Jerusalem, ma aram miyad l’oeg Barnabas nge yan nga Antiok.
23 Fa’ani taw me guy rogon nike ayuweg Got fapi girdi’, me felan’ me tay ir ngorad ni yad gubin ni ngu’ur pired ni yad ba yul’yul’ ma yad bmuduwgil ngak Somol u polo’ i lanin’rad.
24 Ma cha’nem i Barnabas e be’ ni bfel’ nib sug ko fare Kan Nthothup ma ba pagan’ ngak Jesus. Ma bo’or e girdi’ nra manged girdi’en Somol.
25 Me yan Barnabas nga Tarsus ni nge changarnag Saul.
26 Ma fa’ani pir’eg, me fek ngarbow nga Antiok. Ma reb e duw ni ur mu’ulunggad girdi’en e galesiya u rom ngu’ur machib nigew e girdi’ ni pire’. U rom u Antiok e ir e som’on nni pining girdi’en Kristus ngak e pi’in ke mich Jesus u wun’rad.
27 Gonap’an e re ngiyal’ i n’em e yan boch e profet u Jerusalem nga Antiok.
28 Ma bay bagayad, ni Agabus fithingan, ni sak’iy ngalang me yi’iynag u gelngin fare Kan Nthothup ni bay ba uyongol ni aram e nge yib nga gubin yang u fayleng. (Me yib e re uyongol nem ko fa ngiyal’nem ni Klaudias e Emperor u Roma.)
29 Pi’in gachalpen Jesus e ra turguyed ni nge bagayad me pi’ urngin e tin nrayag rok ngar ayuweged e pi’in walagrad ni girdi’en Kristus ni yad be par u Judea.
30 Ma aram miyad rin’ ni aram rogon, miyad pi’ e re salpiy nem ngak Barnabas nge Saul ngar fekew i yan ngar pi’ew ngak e pi’in pi’ilal ko galesiya.