BABYOR NI
AMOS
Murung’agen e Re Ke Babyor Ney
I Amos e bin som’on e profet nni yoloy e thin rok nga babyor, ni urngin e thin ni yog Got ngak ni nge weliy ngak e girdi’. Yugu aram rogon ni ir be’ u ba binaw u Judah, machane i machib ko ley ni lel’och e nam nu Israel ni gonap’an 750 e duw u m’on ndawori yib Kristus. Ngiyal’ nem e bfel’ rogon e nam nu Israel, machane me guy Amos ni kemus ni girdi’ ni pire’ ban’en rorad e bfel’ rogorad, ni bochan e yad be sasalap yad be fek ban’en rok e pi’ ni gafgow. De fel’ u wan’ Got e meybil nge pigpig nma tay yu Israel ngak, ni bochan e darir yul’yul’gad ngak. Me machib Amos nib elmirin ma der tuntun ni be yog ni bayi gechignag Got e girdi’ ko nam, me yog ngak e girdi’ ni ngar rin’ed e tin nib mat’aw ma ba yal’uw, ma aram e sana ra runguy Somol e girdi’ nike magech ni kab fos ko re nam ney.
Gathon e Re Ke Babyor Ney
Gechig ni yib nga daken e pi buguliyoror rok yu Israel 1:1—2:5
Gechig ni yib nga daken yu Israel 2:6—6:14
Lal ban’en ni pilyeg e changar ngan guy 7:1—9:15
1
1 Pi thin ney e thin rok Amos, ni ir reb e tagafaliy e saf ko binaw nu Tekoa. I Got e yib i pi’ e re bugithin ni ba’aray ngak Amos ni l’agruw e duw nga m’on ko fare durru’ fa ngiyal’nem ni Uzziah e pilung nu Judah, mi Jeroboam, nib mo’on ni fak Joash e pilung nu Israel.
2 Me ga’ar Amos,
“I SOMOL e tolul u Burey ni Zion;
be yib laman u Jerusalem ni bod lingan e dirra’.
Nap’an ni yodorom me yim’ e pan nma kay e gamanman,
ma pan nib galunglung ni bay u daken e Burey ni Karmel e pig nge mororoy.”
Pufthin rok Got nga daken e pi’in yad buguliyoror yu Israel
Syria
3 Be ga’ar SOMOL, “Girdi’ nu Damaskus e kar denen gad bayay nge bayay. Ri bay gu gechig nagrad, ya rib kireb e n’en ni kar ngongliyed ngak e girdi’ nu Gilead.
4 Bay gu pi’ e nifiy nge urfiy e naun rok Hazael ni Pilung, me urfiy e pi naun rok Benhadad ni Pilung ni ka ni ngongliy rogon ni fan ko mael.
5 Bay gu bilig e garog nu Damaskus mu gu chuweg e pi’in yad ma par u lan e Loway ni Aven nge en nma gagiyeg u Betheden. Ma girdi’ nu Syria e bay ni fekrad ni kar manged kalbus ko nam nu Kir.”
Filistia
6 Be ga’ar SOMOL, “Girdi’ nu Gaza e kar denen gad bayay nge bayay. Ri bay gu gechig nagrad, ya kar feked girdi’en reb e nam ni polo’ kar pi’ed nchuway’ ngak e girdi’ nu Edom ni ngar manged sib.
7 Ere bay gu pag e nifiy nga daken e pi yoror nu Gaza nge urfiy e pi naun ni ba’ riy ni kan ngongliy rogon ni fan ko mael.
8 Bay gu chuweg e pi’in yad be gagiyeg ko pi binaw nu Ashdod ngu Ashkelon. Bay gu gechignag e binaw nu Ekron, ma urngin piyu Filistia ni kar mageygad e bay ram’ad.”
Tyre
9 Be ga’ar SOMOL, “Girdi’ nu Tyre e kar denen gad bayay nge bayay, ni erfan nri bay gu gechig nagrad. Kar feked girdi’en ba nam ni polo’ ni kalbus ko nam nu Edom, ma dar ted u tagil’ fare m’ag ko tha’ nra ngongliyed ni nge par ni bfel’ thilrad.
10 Ere bay gu pag e nifiy nga daken e pi yoror nu Tyre nge urfiy e pi naun ni bay riy ni ka ni ngongliy rogon ni fan ko mael.”
Edom
11 Be ga’ar SOMOL, “Girdi’ nu Edom e kar denen gad bayay nge bayay, ere ri bay gu gechig nagrad. Kar lol’oged e girdi’ rorad ni piyu Israel, ni der kireban’rad ngorad. Dariy folan e damumuw rorad ni yug be par ni der m’ay.
12 Ere bay gu pag e nifiy nga daken yu Teman, nge urfiy e pi naun ni bay u Bozrah, ni kan ngongliy rogon ni fan ko mael.”
Ammon
13 Be ga’ar SOMOL, “Girdi’ nu Ammon e kar denen gad bayay nge bayay, erfan nri bay gu gechig nagrad. Ur cham gad ni nge yo’or e binaw rorad ma mus ko pi’in i bpin ni yad ba diyen u Gilead ma ur gochthiyed e yal rorad.
14 Ere bay gu tay e nifiy ko pi yoror nu Rabbah nge mo’oruf e pi naun ni bay riy ni ka ni ngongliy rogon ni fan ko mael. Bay un tolul ko rofen ni yibe mael, me achangiy fare cham ni gowa bang i yoko’.
15 Pilung rorad nge pi tolang rok e bay ni kalbus nagrad u wuru’ e nam rorad.”