25
1 “Fa’anra yan l’agruw ni’ u Israel nga tafen e puf oloboch ni ngan pithig e oloboch rorow, min turguy bagayow ni bfel’ e rok min turguy bagayow nib kireb e rok,
2 ma fa’anra nturguy ni fa’anem nib kireb e rok e ngan toy ma aram e fa’anem ni tapuf oloboch e nge yog ngak ni nge palpal nga but’ ngan toy. Ma urngin yay ni ngan toy e be yan u rogon gelngin e oloboch nike ngongliy.
3 Rayag ni ngan toy ni aningeg i ragag yay, machane dabi yo’or yay; ya ra yo’or mra tamra’ u fithik’ e girdi’.
4 “Dab mm’ag l’ugun ba garbaw ni ga be maruwel ngak be lufluf e grain.
Maruwel ni ngan rin’ ni fan ngak be’ nib mo’on ni walagey nike yim’
5 “Fa’anra par l’agruw i mo’on niyow walag u daken ta’bang i binaw me yim’ bagayow ndariy fak ni pumo’on, ma fare pin ni le’engin e dabi figirngiy be’ nga yugu reb e tabinaw, ya yalen e ba pumo’on ni walagen fa’anem nike yim’ e nge munfangich.
6 Bin som’on e pumo’on ni yow ra fakay e aram e nge par ni fak fare mo’on nike yim’, ya nge par e re tabnaw nem ni dabi math mit u Israel.
7 Ma fa’anra siyeg fare pumo’on ni walagen fa’anem nike yim’ ni nge munfangich, ma nge yan fare pin nga p’eowchen e pi’in yad be yog e thin ko fare binaw nge ga’ar, ‘Fare mo’on ni walagen figirngig nike yim’ e dabun ni nge rin’ e tin yalen ni nge rin’, dabun ni nggu diyen nigew reb e pumo’on nge par ni owchen walagen u fithik’ e girdi’ nu Israel.’
8 Ma aram e girdi’ ni yad be yog e thin ko fare binaw e ngar pininged fa’anem nge yib ngar welthingad ngak. Ma fa’anra ka be siyeg ndabi le’engiy fare pin,
9 ma fare pin rok walagen nike yim’ e nge yib ngak fare mo’on u p’eowchen e pi’in yad be yog e thin ko fare binaw, nge luf baraba’ e sus u ay fare mo’on me thuw nga owchen fare mo’on me ga’ar ngak, ‘Irera’ e n’en niyima rin’ ngak e re mo’on nra siyeg ni nge munfangich nge sum owchen walagen nike yim’.’
10 Ra tabnathin e tabnaw rok fare mo’on u Israel nga unog ni ‘fare tabnaw rok fare mo’on nni luf e sus rok.’
Ku boch e motochiyel
11 “Fa’anra be cham l’agruw i pumo’on me yib le’engin bagyow ni nge ayuweg figirngin me malle’ nga chunmean fa’anem ni yow be cham figirngin,
12 ma gimed ra th’ab rifrifen pa’ fare pin; ni dab nrunguy.
13 “Dab mu sasalapiy e thabthabel nge rogon i foleg ban’en.
14 Dab mu sasalapgad i foleg ban’en, ni nge ga’ fa nge achig.
15 Ngam marwelgad ko thabthabel nge fol nib paluw, ya nge yag nim pired nib n’uw napmed u lan fare nam ni bayi pi’ SOMOL ni Got romed ngomed.
16 Ya fanenikan SOMOL e girdi’ nma sasalap.
I tay SOMOL chiylen ni ngan thang e fan rok e pi Amalekite
17 “Dab mu paged talin e n’en ni rin’ e pi Amalekite ngomed u nap’an ni gimed be chuw u lan yu Egypt.
18 Dariy madgun Got u wun’rad, aram fan ni yad ra cham ngomed u wuryal ko fa ngiyal’ ni kam magaergad nike aw parowmed, mar thanged e pogofan rok e pi’ romed nike aw nga wuryal.
19 Ere nap’an ni bayi pi’ SOMOL ni Got romed fare nam ngomed, me gagiyegnag ni dabki bucheg e pi to’ogor romed ban’en romed, ni yug aram rogon ni yad ma par ni yad ba liyegmed, nopa’med ni gimed ra thang e pogofan rok e pi Amalekite ni yad gubin, ya ngar mathgad u wan’ e girdi’. Dab mu paged talin!