Re ke Bible ney ni thin ni waab e nni pilyeg ni nge dag fan yu yil’ i thin ma gathi bbug nge bbug ko pi thin ko bin Kakrom e M’ag nni yoloy ko som’on ni Hebrew, ma ku errogon nni pilyeg ko pi thin ko bin Be’ech e M’ag nni yoloy ko som’on ni Greek. Fan ba yil’ e thin ni Hebrew fa Greek e ir e ni pilyeg ma gathi fan bbug nge bbug e thin. Yu bugithin ni un fanay e tin ba mom i nangfan ya thin ni yima yog e chiney.

Bochan ni yibe sap nga fan bayil’ e thin ma gathi yarmen min piliyeg, e aram fan ni kani dachuguy yuyil’ i thin (verses) nga ta’abang ni nge tamilang boch fan. Ni bod e: 2 Kronicles 4:7–8, 2 Kronicles 4:11–16.

Kanawo’en nni piliyeg e re ke Bible ney e kanog e Dynamic Equivalence ngay ni ta’ab kanawo’ ko rogon nni pilyeg e Good News Bible. Biney e kanawo’ e bthil nga reb ni kanog e Formal Correspondence ngay ni array e re kanawo’ nni fanay ngan pilyeg e King James Version nge Revised Standard Version.

Pi’in i piliyeg e pi thin ney, e u ra athamgiliyed ni nge be’eg e en nu Waab me yag ni guy rarogon e tafnay nge yalen e par ko girdi’ nu Bible. Ma bo’or yang riy e dariy ko thin ni Waab, ere kan fanay boch e thin ni Ngalis ni kan yoloy nib thil ya’an e yol riy. Ni bod e Circumcise Exodus 4:25; Eunuch. Levitikus 21:20, 2 Kings 20:18.

Ba yo’or e yu bugithin ney ni bay ko Glossary ni ga ra pir’eg nga tomur ko re ke babyor ney. Glossary e be yog fan e yu bugithin ni thingar ni nangfan me tamilangnag e thin nu Bible.

Ma ku bochan e nga nnangfan, ma fol u tomalngin, fa n’umngin fa ga’ngin ban’en ni Hebrew nge Greek e kan thilyeg ko pawn, ton, inch, fit, nge mayl, ntin yira nang fan u waab.

Fithingan Got ni Hebrew e Yahweh (YHWH) ni kan piliyeg ni SOMOL ko thin ni waab. Rogon ko yalen ni Hebrew e de mat’aw ni nga unog ngachalen Got, ere yad ma yog e ADONAI ni fan e Somol.

Bay mu piri’eg in e verse ni go’ numba riy e bay ma dariy e thin riy. Finni uneg e tiney e verse ngay ni nge tamilangnag fan e tin bay nga m’on riy e thin. Thin ni nge tamilangnag reb e verse ara bbugethin e yima tay aram nga but’ u reb e page nge reb. Aram e kanog e footnote ngay.

Bay yu bugithin ni kan namba nag. Ma ga ra changar nga tanggin reb e page ma ke yog fan fare bugithin. Ireray e footnote. Kan uneg ngay ni nge tamilang.

Section Heading e fithingan ba guruy u bakean e babyor ni be dag e n’en bay murung’agen nga tanggin. Biney e nge ayuweg e en ni be be’eg e Bible nge nang e tin nib ga’ fan ni bay riy. Ni bod e guruy ni ta’reb ko Genesis, ni Section Heading riy e “Murung’agen urngin ban’en ni sum.”

Bay boch e marang’ag u yu kean e babyor ni ku yira pir’eg u yu kean e babyor nu Bible. Tiney e kanog e Parallel Verses ngay ni bod ni bay ko Kean ni 2 Kronicles 1:1–12 Ku bay ko 1 Kings 3:1–15; Pi Parallel Verses ney e kan yoloy nga tanggin e Section Heading.

Ku bay e map ni be dag e gin bay e nam nge pi binaw riy nge fithingan bang nge bang u nap’an Jesus, ni yira pir’eg u tomur ko re ke babyor ney.