50
1 Me yan i paraw Josef nga daken e chitamngin, ni be yor ma be faray owchen.
2 Me yog Josef ngak e pi togta ni yad ma maruwel u tan pa’ ni ngar ngongliyed rogon e chitamngin nge par ndabi kireb. Me rin’ fapi togta ni aram rogon,
3 ma aningeg i ragag e rran nra muruwliyed ni aram n’umngin nap’an ni yima muruwliy. Me par piyu Egypt ni medlip i ragag e rran ni yad be yornag.
4 Fa’ani m’ay e ngiyal’ ni nga ni yornag e chitamngin, me ga’ar Josef ngak e pi’in ni tolang ni yad bay nga tan pa’ Farao, “Wenig ngomed, mu feked e re bugithin ni ba’aray i yan ngak Farao ni nge lungumed:
5 Nap’an ni be n’en ni nge yim’ e chitamag, me yog ngog ni nggu micheg ngak nra gu wan gu k’eyag ngalan ba low ni ir e ker ni fan ngak ni bay ko nam nu Kanaan. Ere wenig ngom mu runguyeg nggu wan gu k’eyag e chitamag, nge mu’ mu gu sul.”
6 Me ga’ar Farao, “Mman, ngam k’eyag e chitamam, ni bod rogon nike yog ni ngam micheg ngak ni bay mu rin’.”
7 Ma aram me yan Josef i k’eyag e chitamngin. Ma urngin e girdi’ rok Farao nib tolang, nge pi’in nib tolang ko tapuf oloboch, nge urngin e girdi’ ni yad be yog e thin u Egypt nra uned ngak ngranod,
8 nge urngin girdi’en e tabinaw rok Josef, ni pi walagen ni pumo’on, nge girdi’en e tabinaw rok e chitamngin. Kemus ni bitir rorad ni kab achig, nge saf nge kaming, nge garbaw rorad e ra pired u lan e nug nu Goshen.
9 Pi pumo’on ni yad be yan u chariot nge pi pumo’on ni yad be yan u os e ku ra uned ngak; gathi balich e re girdi’ nem.
10 Fa’anra tawgad ko gin ni yima gunugunuy e grain riy u Atad, ni bay ko ngek ko lul’ ni Jordan, miyad dololoy’ u rom nib n’uw nap’an ni kari kireban’rad, me un Josef ngorad ngar mowaw niged e chitamngin ni medlip e rran.
11 Fa’ani par e girdi’ nu Kanaan ngar guyed e girdi’ ni yad be dololoy’ u Atad, me lungurad, “Ren’ey e dololoy’ nma tay piyu Egypt ko yam’.” Aram fan ntunguy fithingan e gin’em ni Abel Mizraim. Bay ko ngek ko lul’ ni Jordan.
12 Fapi pumo’on ni fak Jakob e rrin’ed ni bod rogon ni yog ngorad;
13 ra feked i yan nga Kanaan, miyad k’eyag u lan fare yiy ni bay u Makpelah, ni bay ko ngek u Mamre, ni chuw’iy Abraham ni chagiy ko fa gi binaw ni pi’ Efron ngak, ni reb e Hittite, ni fan e ngu’un gum’eyag riy.
14 Fa’ani mu’ Josef i k’eyag e chitamngin, me sul nga Egypt ni yad pi walagen ni pumo’on nge urngin e pi’in nra uned ngak ko gum’eyag.
Josef ni micheg ngak pi walagen ni pumo’on ndab kur rusgad ngak
15 Tomuren nike yim’ e chitamngirad me ga’ar fapi pumo’on ni walagen Josef, “Fa’anra ka be fanenikaydad Josef, ma ke finey ni nge fulweg ngodad taban urngin e kireb nda ngongliyed ngak, ma mang e ngad rin’ed?”
16 Ma aram miyad pi’ bbugithin nge yan ngak Josef ni lungurad, “Ba’aray bbugithin ni weliy e chitamam ngomad u m’on ndawori aw e fan rok ni ga’ar:
17 Mogned ngak Josef ni be lungug, ‘Gu be wenig ngom ni ngam n’ag fan u wun’um e tin nib kireb ni ngongliy pi walagem ngom.’ Ere wenig ngom, mu n’ag fan u wun’um e kireb ni gamad e pi tapigpig ko Got rok e chitamam e kug rin’ed.” Fa’an nog e re bugithin ney ngak Josef, me tabab Josef ko meyor.
18 Me yib pi walagen ni pumo’on ngarbad ra siro’gad ngak. Me lungurad, “Kugbad nga p’eowchem e chiney ni gamad e sib rom.”
19 Machane me ga’ar Josef ngorad, “Dab mu tamdag gad; ya dabiyag ni nggu teg nga luwan Got.
20 Mu puruy’ niged ni ngam ngongliyed e kireb ngog, machane me yib Got ngay nge pingeg nga daken e fel’ ni fan e nge ayuweg e pogofan rok e girdi’ ni pire’, ni pi’in ka yad bafos e bin daba’ e rran ni bochan e tin mu rin’ed ngog.
21 Ere dab kum rusgad. Ya bay gu ayuwegmed nge pifakmed.” Ara’ rogon ni micheg ngorad u fithik’ e thin nib munguy ni kun ngorad.
Josef ni yim’
22 Me par Josef u Egypt ni yad girdi’en e tabinaw rok e chitamngin; me yim’ ni 110 e duw yangren.
23 I par Josef nge guy e bitir rok Efraim nge bitir rok e bitir rok Efraim. Fa’an nni gargeleg pifak Makir, ni be’ nib mo’on ni fak Manasseh, me tayrad Josef ni yad girdi’en e tabinaw rok.
24 Me ga’ar ngak pi walagen ni pumo’on, “Ke chugur ni bay gum’, machane Got e rib muduwgil ni bay i ayuwegmed, me fekmed nga wuru’ e re nam ney me pow’iymed ko fare nam ni fa’ani micheg ngak Abraham nge Isak nge Jakob ni bayi pi’ ngorad.”
25 Ma aram me wenig Josef ngak fapi pumo’on ni fak Israel ni ngar micheged bbugithin ngak u mit Got. I ga’ar, “Mmicheged ngog nnap’an nra ayuwegmed Got u fithik’ e runguy rok ngomed, ma gimed ra fek e yil rog nge un ngomed.”
26 Ma aram me yim’ Josef nike gaman 110 e duw yangren. Mi ni fal’eg rogon u Egypt ni nge dabi kireb, min tay ngalan ba kahol.