4
1 Me ere chiney e ka be par e thin ni yog Got ngodad ni ka rogon ni fa’ani ga’ar rayag ni ngdarod ngad uned ngak ko toffan. Ere ngad ayuwgad nge dab ni pir’eg bigimed nde yag rok ni nge yan ngak, nge un ko re toffan nem.
2 Ya kad rung’aged fare Thin Ni Bfel’ ni yib rok Got, ni bod rogon ni rung’ag fapi cha’nem. Rrung’aged e thin rok Got ma de fel’ rogorad ko re thin nem, ya fa’an rrung’aged ma da i michan’rad ngay.
3 Ere gadad e pi’in ke michan’dad ko thin rok e ngdarod ngak Got ngad uned ngak ko toffan. Ya ke yog ni ga’ar,
“Gu damumuw mu gu duwgiliy ni lungug:
Ri dab ra uned ngog ko toffan!”
I yog e re bugithin ney ni yugu aram rogon nike mu’nag e maruwel rok ni ka nap’an e sunumiy e fayleng.
4 Ba’aray e n’en ni murung’agen e bin medlip e rran ni bay u bayang u lan e babyor nib thothup ni be ga’ar, “Re rran ni man e medlip ngay e toffan Got u urngin e maruwel rok.”
5 Ere ku re bugithin ney e be weliy e babyor nib thothup ni be ga’ar: “Ri dab ra uned ngog ko toffan.”
6 Fapi cha’ ni yad e som’on nrung’aged e Thin Ni Bfel’ ni yib rok Got e da ranod ngak Got ngar uned ngak ko toffan ni bochan e de michan’rad ko thin rok Got. Machane bay yugu boch e girdi’ nrayag ni ngranod ngak Got ngar uned ngak ko toffan.
7 Ke yan i m’ug riy ni aram rogon ni bochan e ki duwgiliy Got reb e rran ni ir e kanog e “Daba’ ” ngay. Ke yo’or e duw nga tomuren me yog e re bugithin ney ni yog u l’ugun David, ni bod rogon ni fa’ani kem’ay i yog rok u lan e babyor nib thothup nike ga’ar,
“Fa’an gimed ra rung’ag laman Got e daba’,
ma dab mu gelniged lanin’med.”
8 Ya fa’an mang e fek Joshua fapi girdi’ ngar uned ngak Got ko toffan, ma dabki weliy Got nga tomuren murung’agen yugu reb e rran.
9 Machane rogon e chiney e kabay e toffan ni nge tay girdi’en Got ni bod e toffan ni tay Got ko re rran ni man e medlip ngay.
10 Ya en nra yan nge un ngak Got ko toffan e ra toffan ko maruwel rok, ni bod rogon Got ni toffan ko maruwel rok.
11 Ere ngad athamgiliyed ngad uned ngak Got ko toffan. Thingari dariy bagadad ni nge dabi fol ni bod ni rin’ fa piinem, nde yag nra uned ngak Got ko toffan.
12 Ya thin rok Got e ba fos ma bay gelngin nma maruwel. Ya kab m’uth ngabangi saydon ni ruw raba’ ma bm’uth. Ya ma yan nge yan i taw nga fithik’ i lanin’dad ko n’en ni gadad be leamnag, nge fithik’ e ul ul nge yil, ma ma pufthinnag e n’en ni yima yim’ ni bochan nge tin ni yima leamnag.
13 Dariy ban’en nrayag ni ngan mithag rok Got. Ya urngin ban’en ni kem’ay i sunumeg rok e be par u p’eowchen ndariy e upong u daken; mi ir e ri gadad ra weliy e pin’en ni ud rin’ed ngak.
Jesus ni ir fare Prist ni Th’abi Ga’
14 Ere ngad chichiiyed pa’dad ko michan’ rodad ni ir e gadad be weliy murung’agen. Ya bay e prist rodad ni fare Prist ni Th’abi Ga’ nike yan ngak Got — ni ir Jesus, ni Fak Got.
15 Re prist rodad nem ni fare Prist ni Th’abi Ga’ e gathi reb e prist ni dabi kireban’ ngodad nga fadad me’waer. Ya re prist rodad nem ni fare Prist ni Th’abi Ga’ e yib ngak urngin kanawo’en e pin’en nma waliy e girdi’ nge denen ni bod gadad, machane de denen.
16 Ere nge dab kud tamdaggad ngad bad nga tagil’ Got, ko gin ni bay e ayuw riy. Ya ireram e gin ni yira runguydad riy min ayuwegdad ko ngiyal’ ndabisiy ni ngar ni ayuwegdad.