29
Jerusalem ni bayi gafgow
1 Altar rok Got, Jerusalem e ke gafgow! Fare binaw ni i par David riy e ke gafgow! Ra yib reb e duw ara l’agruw nge thumur ni bmu’un e pi mur nge madnom riy ngay
2 ma aram e bayi girengiy Got e riya’ nga daken fare binaw ni yima yog ni “Altar rok Got.” Ma bay un yor ma yibe dololoy’ riy, ma fare binaw ni ga’ngin e ra bod ba altar nike upong ko racha’.
3 Got e bayi longbiy fare binaw nge cham ngay nge kol.
4 Yu Jerusalem e bay i bod ba kan ni be athamgil ni nge non u tan e but’, ni ba lam ni de matabgol ni be yib u fithik’ e ab ngalang.
5 Jerusalem, gubin e girdi’ nu bang ni yad be cham ngom e bay ra’ uned ko nifeng ni bod e fiyath, ma yu raba’ i salthaw rorad nib kandaguwen e bay ra changaggad ni bod e chabung. Nib tomgin ni yad ra gin ngay
6 ma SOMOL ni Gubin ma Rayag Rok e bayi lagmed u fithik’ e yoko’ ni be chob e dirra’ riy nib almarin nge durru’. Bayi pi’ e yoko’ ni bay e nifeng riy nib gel nge nifiy ni be gabulbul e daramram riy;
7 ma urngin e yu raba’ i salthaw ko pi nam ni yad be cham ko fare binaw ni altar rok Got e gubin e talin e cham rorad nge talin e maruwel ni bayi m’ay ngabang ni bod ba lik’ay, bod ban’en ni yib nga lanin’uy ni nep’.
8 Urngin e nam ni ka ra mokungad ni ngar chamgad nga Jerusalem e ri bod be’ nike yim’ ko mak’iy me lik’aynag ni be abich me od ni kari yim’ ni mak’iy, fa be’ nike yim’ ko balel me lik’aynag ni be unum e ran me od nib mlik lan ka’ngan.
Pi ginaeng nni fekyathin
9 Mu pi’ nga daken ngam par ni gab pinat’! Mu pi’ nga daken ngam par ni gab ma’ew! Mu chingaw’ ni dariy e wayin! Mu tuturpeal ni dawor mu unum ta’reb e wa’angchal e rrum.
10 I SOMOL e ke k’ar chuchuw ngom, ni be n’en ni ngam mol ni dabki od oram. Fapi profet e ngar manged owchen e girdi’, machane Got e ke ning owchrad.
11 Gubin fan e tin ke yi’iynag e pi profet e bayi par nib mith fan rom; bod bang i babyor ni yima bachiy ni kanning. Ma fa’an ga ra fek i yan ngak be’ ni manang rogon e pow babyor ngamog ngak ni nge be’eg ngom, mra yog ngom ni dabiyag ni bochan e kanning ko hang.
12 Ma fa’an ga ra pi’ ngak be’ ndabiyag ni nge be’eg e babyor magog ngak ni nge be’eg ngom, ma ra yog ngom ni de nang rogon.
13 Ke ga’ar SOMOL, “Pi girdi’ ney e yad be yog ni yad be liyor ngog, machane thin rorad e bm’ay fan, ya lanin’rad e basap ngabang. Pigpig ni yad be tay ko raba’ i taliw rorad ney e dariy rogon ya kemus ni motochiyel ko girdi’ nge yalen rorad, ni aram e tin ke mit ngorad yakar filed ke mit ngorad ni churu’.
14 Ere bay gu gineangrad ko dumow rog bayay nge bayay. Pi’in yad ba gonop e ra yan i par ni yad bbalyang, me m’ay fan urngin e llowan’ rorad.”
Lagan’ ko tin bayib e rran
15 Ke riya’ e pi’in yad ma mithag rok SOMOL e tin ni ka ra tanom niged ni ngar rin’ed! Ma yad be ngongol nib mith ma yad be leamnag ndariy be’ ni be guyrad ara manang e n’en ni yad be ngongliy.
16 Ka ra tibuliyed gubin ban’en. Bin ngan e ba ga’ fan, facha’ nma ma’ th’ib ara fare gi but’ nth’ib? Rayag rok ban’en ni gur e mu ngongliy ni nge ga’ar ngom, “Gathi gur e mu ngongliyeg.” Ara ga’ar, “I gur e damur nang ko mang e ga be rin’.”
17 Dabki n’uw nap’an ma fare loway nu Lebanon e bayi par ni bangi flang ko woldug, ma fare gi flang ko woldug e bay ki sul nge buchwo’ i gek’iy bayay.
18 Ra taw ko rofen nem, ma pi’in yad bbiling e yad ra rung’ag e tin yibe be’eg u babyor nib ga’ lunguy, ma pi’in ma’ew ni ur pired u fithik’ e lumor e ra mab owcharad ngar guyed ban’en.
19 Pi’in gafgow nge pi’in sobutan’ e yad ra pir’eg fare felfelan’ bayay nma pi’ SOMOL, ni fare Got nib thothup nu Israel.
20 Aram e tomur rok pi’in ur gafgow niged boch e girdi’ ma yad be dariy fannag Got. Urngin e pi tadenen ni bay ni thang owcharad.
21 Ra thang Got e pi’in yad ma gathibthibnag boch e girdi’, nge pi’in ma taleg e gechig ni dabi aw ko pi’in kireb, nge pi’in yad ma lufith l’ugunrad ni nge m’ing e thin nga daken e pi’in bfel’ e rok.
22 Ere chiney e SOMOL, ni Got rok piyu Israel, ni ayuweg Abraham ko gafgow, e be ga’ar, “Girdi’ rog, dab ku mu pired nib m’ay famed, ma dabki awat owchamed ko tamra’ bingyal’.
23 Nap’an ni gimed ra guy e pi bitir ni bay gu pi’ ngomed, ma aram e bayi paluw u wan’med ni Gag fare Got rok yu Israel nthothup. Bay um pired ni gimed be liyor ngog ni kugmang ba manigil u wan’med.
24 Girdi’ ni balyang e bay ra nanged fan ban’en, ma gubin e pi’in gubin ngiyal’ ma yad be gun’gun’ e yad ra felfelan’ ni ngar filed ban’en.”