13
1-2 Gubin ni gimed be yog, ma go kug rung’ag.
Gu be nangfan ni gubin; gumnang urngin e tin gimed manang.
Gathi gimed ba llowan’ boch rog.
3 Machane Got e gu be tugthin ngak, gathi gimed;
gu ba’adag ni nggu malu’eg thingow Got u salpeg.
4 Gimed be upunguy fanamed minan’ ko mululufith l’ugun romed’;
gimed bod e togta ni dabiyag ni nge golnag be’.
5 Mu th’abed gulungmed, ma sana ra leamnag be’ ni gimed ba gonop!
6 Mmotoyilgad nggu weliy salpeg.
7 Mangfan ni gimed be ban?
Gimed be finey ma pi mululfith l’ugun romed nir e ra fel’ rogon Got riy?
8 Gimed be guy rogon ni ngam yororgad rok Got?
Gimed e nga mu pithiged e oloboch rok u kort?
9 Fa’anra fal’eg Got i yaliymed, ma gur, ra pir’eg ban’en ni bfel’?
Gimed be leamnag mra yag romed ni ngam ban niged Got ni bod ni gimed ma bannag e girdi’?
10 Yug errogon ni der m’ug ni gimed ba lanyan’,
machane ra puwan’ ngomed,
11 ma feni gel gelngin e gimed ra dugow ngay.
12 Pi thin romed e ba m’ayfan ni bod e awat;
pi tugthin romed e ba me’waer ni bod e thib’ nni ngongliy ko but’.
13 Dab ku mu nonad nggu non,
mu paged fan ngog e tin nra yib riy.
14 Ku gu duwgiliy u wun’ug ni nggu pagfan e pogofan rog.
15 Ke mulan’ug ko gubin, are fa’anra thang Got e fan rog ma ridi’in?
Nggu wan gu weliy lanin’ug ngak.
16 Ya yug dab nnang me ayuwegneg, ni bochan e kug pagfan e marus ku gu weliy lanin’ug ngak,
ya aram rogon ndriy be’ nib kireb nrayag ni nge sabliy Got.
17 Ere mmotoyilgad nggu weliy nib tamilang.
18 Kug fal’eg rogog ni nggu weliy lanin’ug,
ni bochan e gu manang ni bfel’ e rog.
19 Got, ka mub ni ngamog ni gag e guba kired?
Fa’anra er rogon, ma dakriy ban’en ni ngog, kefel’ nggum’.
20 Siro’ ngom, nggu ning l’agruw i ban’en ngom; ma fa’anra bm’ag u wun’um
ma dabkug guy rogon ni nggu mith rom;
21 mu tal i gechig nigeg, magtal i dili’yeg ko morus.
22 Got, mu non nsom’on, mu gu fulweg lungum.
Ara mu pageg nggu non, ma ga fulweg lungug.
23 Bogi mang e denen rog? Mang e pi kireb ni kug ngongliy?
Mang e ku gu rin’ ni ka ni oloboch ngog riy?
24 Mang ni ka mu fek owchem rog?
Mang ni ka mu teg ni gowa gu ba to’ogor?
25 Gimed be guy rogon ni ngam k’aringed e morus ngog? Ya gag e dariy rogog ngabang ya gu bod ba gaf i yuwan e gek’iy;
gimed be cham nga bochiyang i chabung.
26 Ka mu tay nga babyor urngin e kireb rog,
ni mus ko pin’en ni u gu rin’ ni ku gub pagel.
27 Ka mu chennag rifrifen eg;
ma ka mup’ owchem nga gubin yay ni gu ra yif’ eg,
mus nga luwan eg mag be fal’eg i yaliy.
28 Aram fan ni ku gu puth nga but’ ni bod e gek’iy nike gaen,
fa ba wuru’ e mad nike longuy e ngal.