16
Job
1-2 Kug mu’ i rung’ag e tinir e thin;
ayuw ni gimed be pi’ e go’ gafgow e bay riy.
3 Ngam welthingad i yan ndab kum talgad bi’id?
Gubin ngiyal’ ma der aw e thin u puluwomed nga but’?
4 Fa’an mang e gimedgag ma gag e gimed,
mra yag ni nggog urngin e tin gimed be yog.
Rayag ni nggu gochum u fithik’ e gonop
mug welthin ngomed ngam limochgad nga lungug.
5 Rayag ni nggu pi’ e athamgil nga lanin’med ko fonow
ma dab gu tal ko welthin nge fel’ lanin’med.
6 Machane dariy ban’en ni gu ra yog nra yib angin,
ma gu ra th’ab gulungag ngug par ma dabi gapas e amith rog.
7 Got, kam m’aynag gelngig;
kam pag chon e tabnaw rog ka ni thang e fan rorad.
8 Ka mu achathaliyeg; i gur e to’ogor rog.
Ku gu par ni go’ biyach nge yil,
ma ke leamnag e girdi’ ni ireram e pow riy nib buch e rog.
9 Ke popofeg Got nga but u fithik’ e damumuw;
be gatfiy lanmit ngog u fithik’ e fanenikan.
10 Be girig e girdi’ ngog;
kar longobiyedgag ni yad be batnag owcheg.
11 Ke pi’eg Got ngalan pa’ e girdi’ ni kireb.
12 Ug par u fithik’ e gapas,
machane me malle’ Got nga k’ongag
nge pirdi’iyeg nggu masengseng.
Ke teg Got ni be folmun ngog
13 be pag e gan e gat’ing ngog u gubin raba’ —
ni be kurufeg e pi gan e gat’ing nem gu be maad’ad riy;
ma dariyfan ni aram rogon ya bochu’uw ni nge runguyeg ma dariy.
14 Ke maad’ad ngog u bayay ngu bayay;
be cham ngog ni bod ba salthaw nike man lolgen ko damumuw.
15 Gu be mowaw ni ku gun’ e mad nni ngongliy ko tutuw,
ni ku gu par u roy u fithik’ e ab ni ku gu waer.
16 Ku gu yor gu yor ke row owcheg,
ma ke thow lan owcheg nike burog,
17 machane dawor gu gad pa’ag ngak be’ ni nge buch e rog riy,
ma meybil rog ngak Got e ri sum u ngorngoreg.
18 Fayleng, dab mu mithag e pi kireb ni ka ni rin’ ngog!
Ma dab mu thang lungug ni gu be ning e tin nib yal’uw!
19 Bay be’ u tharmiy
nra fol ngog nge n’uf e rog.
20 Pi fager rog e karbarba’ nigedgag’;
lan owcheg e be map’ e lu’ riy ngak Got.
21 Gu ba’adag ni nge wenig nigeg be’ ngak Got,
ni bod be’ ni be wenignag ba fager rok.
22 Ya be yan e duw u dakenag e chiney,
ma aram e gu be yan ko fare kanawo’ ni dab ku gu sul.