30
Tin ni michmicheg SOMOL ko girdi’ rok
1 Fare SOMOL, ni Got nu Israel,
2 e ga’ar ngog, “Mu yoloy ngalan e babyor urngin e tin kugog ngom,
3 ya bay ba ngiyal’ ni bayi taw ngay ni nggu fulweg e girdi’ rog ni piyu Israel ngu Judah. Bay gu fulwegrad ko fare but’ ni gu pi’ ngak e pi chitamangirad kakrom, ma bay i milfan ngorad bayay. I Gag SOMOL e gu be non.”
4 I SOMOL e be yog ko girdi’ nu Israel ngu Judah ni be ga’ar,
5 “Ku gu rung’ag lungun e marus,
ni lungun e marus ma gathi gapas.
6 Ere mu tal e chiney ngam leam!
Rayag ni gargeleg be’ nib mo’on bbitir?
Ere ke di’in ni gu be guy ni gubin e pumo’on ni kar koled e yal rorad
ni bod e ppin ni nge gargel?
Ke di’in nike m’ay racha’en owchen gubin e girdi?
7 Yaran e gafgow e nge anog;
ni dariy reb e rran nrayag i ta’reb nag ngay —
ni aram e ngiyal’ ni nge ngochngochan’ e girdi’ rog,
machane yad ra fos.”
8 I SOMOL ni Gubin ma Rayag Rok e be ga’ar, “Ra taw ko rofen nem, ma bay gu t’ar fare mat’ ni bay u belel’gunrad mu gu chuweg e chen rorad, ma aram bay dab ku ra pired ni yad e sib ko girdi’ nu bang.
9 Ma bayi mang gag SOMOL, ni Got rorad e bay ur pigpig gad ngog, nge be’ ni owchen David ni ir e bay gu pilungnag.
10 “Girdi’ rog dab murus gad;
gimed e girdi’ nu Israel, dabi aw e marus nga yal romed.
Ya bay gu laegmed ko fare binaw nib palog,
fare binaw ni gimed ba kalbus riy.
Bay mu sulod nga tabnaw ngam pired u fithik’ e gapas;
bay um pired ni dariy ban’en ni ku ra buch romed, ma dariy be’ ni ku ra k’ar marus ngomed.
11 Bay gub ngomed nggu aywegmed.
Bay gu thirif urngin e nam u but’
ko yung i n’en ni gu werweregmed riy,
machane gimed e dab gu thang owchamed.
Dab gu pagmed ngam thay gad ko gechig;
machane gechig ni gu ra tay ngomed, e ba mat’aw rogon ni gu ra rin’.
I Gag SOMOL e gu be non.”
12 I SOMOL e be ga’ar ko girdi’ rok,
“Ma’ad’ad romed e dabi gol,
ma dabi fos.
13 Dariy be’ nra taliliy nagmed,
dariy falyen e pi malad romed,
ke math liben e gol u puluwonmed.
14 Urngin e pi fager romed ma kar paged talinmed;
ni dakrir fineyed gimed.
Ku gu og ngomed ni bod ba to’ogor;
gechig romed e ba gel
ni bochan e denen romed nib pire’
mab ga’ e kireb romed.
15 Mu talgad ko gun’gun’ u murung’agen e maad’ad romed;
ya dab mu golgad.
Kug gechig nagmed ni ara’rogon
ni bochan e bpire’ e denen romed
ma ba ga’ e kireb romed.
16 Machane chiney, e gubin e pi’in ra ful’ed gimed e bay ni ful’rad,
ma gubin e pi to’ogor romed e bay ni fekrad nga orel ni yad e kalbus.
Gubin e pi’in nu ur gafgow naged gimed e bay ni gafgow nagrad,
ma gubin e pi’in ur giliw niged gimed e bay kun yodrom nagrad.
17 Bay ggol nagmed bayay;
ma bay gu faseg e maad’ad u dowmed,
ya pi to’ogor romed e yad be ga’ar,
‘Zion e kan tharbeg;
ni dakriy be’ nma leamnag murung’agen.’
I Gag SOMOL e kugog e pi thin ney.”
18 Be ga’ar SOMOL,
“Bay gu fulweg e girdi’ rog ko fare but’ rorad
me yib e marnguy rog nga daken gubin e tabnaw;
Jerusalem e bay ku ni ubung bayay,
ma naun ko pilung riy e bay ku ni toy.
19 Girdi’ nma par u rom e bay ra tang niged e og magaer nge sorok;
ma bay ra tolul gad ngalang ko felfelan’.
Fal’eg wa’ath rog ngorad e ngar yo’or gad;
towa’ath rog ngorad e bay un tay farad.
20 Bay gu fulweg gelngin fare nam ni immoy kakrom
mu kug duwgiliy gelngin bayay;
Bay gu gechignag gubin e pi’in yad be gafgow nagrad.
21-22 Cha’ ni nge gagiyeg nagrad e be’ ko re nam rorad nem,
ma fare mo’on ni fak e pilung rorad e kabagyad.
Ra yib ngog ko ngiyal’ ni gu ra pining,
ya bu uw rogon be’ ni nge yib ni dawor ni pining?
Bay ra manged girdi’eg,
ma bay gu mang Got rorad.
I Gag SOMOL e kugog e pi thin ney.”
23-24 Damumuw rok SOMOL e ba yoko’, ni ba nifeng nib gel ni bay i cham u daken lolgen e pi’in kireb. Dabi tal nge taw ko ngiyal’ nike mu’nag e tin be finey. U langgin e pi rran ni bay finiyib e bayi nang e girdi’ rok riy fan e ran’ey ni bfel’ rogon.