6
Jeriko ni Waer
Ma kan ning e garog ko binaw nu Jeriko nrib fel’ rogon, ni fan e nge dabiyag ni yib piyu Israel ngalan. Ma dariy be’ ni ku rayag ni nge yan ngalan e re binaw nem ara yan nga wuru’. Me ga’ar SOMOL ngak Joshua, “Mu telim! Yu Jeriko nge pilung riy nge pi salthaw ni bay riy ndarir rusgad e nggu pi’ nga pa’am. Ngam marod e salthaw rom ngam liyeged e re binaw nem u lan nel’ e rran, nra reb e rran ma ta’ab yay. Ma medlip e prist, nra bagayad ma be fek reb e yabul ni gagey rok e saf ni pumo’on ngranod ni yad be m’on ma be lek fare Kahol ko M’ag rok SOMOL keru’rad. Ma chirofen ni nge gaman e medlip ngay e ngam marod e salthaw rom ngam liyeged e re binaw nem ni medlip yay, ni be thoy e pi prist e pi yabul nem ni gagey ko saf ni pumo’on. Ma ngar thoyed bayay nib n’uw nap’an. Ma nap’an ni gimed ra rung’ag, ma gubin e girdi’ ni ngar tolulgad ni ba ga’ lamrad, ma bayi puth e yoror ko fare binaw. Ma aram e ga’ngin fa raba’ i salthaw ni ngar thelapgad ngalan fare binaw.” Me pining Joshua fapi prist, nge weliy ngorad ni ga’ar, “Mfeked fare Kahol ko M’ag; me yan medlip i gimed nga m’on riy, ni yad be fek e yabul ni gagey ko saf ni pumo’on.” Me ga’ar ngak e girdi’, “Mmarod ngan yan! Mmarod ngu’um liyeged fare binaw, ni bay e pi salthaw nga m’on ko fare Kahol ko M’ag rok SOMOL.”
Ma aram mi ni yan ni bay fa medlip i prist nga m’on ko fare Kahol ko M’ag rok SOMOL, ni yad be thoy fapi yabul ni gagey ko saf ni pumo’on, ni bod rogon nike yog Joshua ngorad ni ngar rin’ed.
Ma fapi salthaw e yad bay nga m’on rok fapi prist, ma be thoy fapi prist e yabul ni gagey ko saf ni pumo’on, me yib e matanag u tomur ni be lek keru’ fare Kahol ko M’ag. Mranod ni yibe thoy fapi yabul. 10 Ma aram e keyog Joshua ngak e girdi’ ndab ra tolulgad, ma dab ra nonod nge mada’ ko ngiyal’ ni bay fini yog. 11 Me l’oeg e pi prist ni kar feked fare Kahol ko M’ag ngranod ra liyeged fare binaw ta’ab yay. Miyad sul ko gin be par yu Israel riy ngar molod e nep’ nem u rom.
12 Me od Joshua nri kab kadbul u reb e rran riy, me fek e pi prist fare Kahol ko M’ag. 13 Me yan fa medlip i prist ni kar feked fa medlip i yabul ni gagey ko saf ni pumo’on ngranod ni yad be m’on, ma yad be thoy. Ma be yan e pi salthaw ni yad ba m’on rorad, me yib e matanag nga tomur ko fare Kahol ko M’ag. Ma yugu be thow fapi yabul ni gagey ko saf ni pumo’on. 14 Me chirofen ni migid miyad yan ngar liyeged fare binaw bayay, miyad sul ko gin be par piyu Israel riy. Nel’ e rran nra yodoromgad.
15 Me chirofen ni gaman e medlip ngay miyad od ni be puf e woch ngranod ngu’ur liyeged fare binaw ni medlip yay ni ku aram rogon. Kemus ni rofen nem e ranod ra liyeged e re binaw nem ni medlip yay. 16 Ma nap’an ni gaman e medlip yay ni kar liyeged nga tomuren nike thoy fapi prist fapi yabul, me ga’ar Joshua ngak fapi girdi’, “Mu tolulgad! I SOMOL e ke pi’ e re binaw ney ngomed. 17 Re binaw nem nge urngin ban’en ni bay riy e kan turguy ni ngan kirebnag ni nge mang ba maligach ngak SOMOL. Kemus ni fare pin i Rahab nma chuway’ ngak, nge girdi’en e tabinaw rok e dab ni bit’ ngorad, ni bochan e mithag fa gali mol’og rodad. 18 Machane gimed e ngam ted gimed u orel ko n’en ni bay ni kirebnag. Fa’an gimed ra fek ban’en ni kan turguy ni ngan kirebnag, ma gimed ra girengiy e gafgow nge riya’ ko gin be par piyu Israel riy. 19 Ma urngin ban’en nni ngongliy ko silber, nge gol, nge bronze, nge wasey e ngan tay ni fan ngak SOMOL, ngan tay ngalan e tamachibgil rok SOMOL.” 20 Me thoy fapi prist fapi yabul. Ma nap’an ni rung’ag e girdi’ lingan, miyad tolul ni ba ga’ lamrad, me muchubu’ fare yoror nga but’ nib liyeg fare binaw. Me wethap ga’ngin fa raba’ i salthaw ngalan fare binaw nranod nib k’iy kanawo’rad ngar koled. 21 Miyad li’ urngin e girdi’ u lan fare binaw ko saydon rorad, ni pumo’on nge ppin, ni pi’in ni bfel’ yangren nge pi’in kar pilibthirgad. Ma ku er rogon e garbaw nge saf nge dongki nra li’ed.
22 Me ga’ar Joshua ngak fa gali pumo’on ni fa’an ranow ndamit, “Marow nga tafen fare pin nma chuway’ ngak, ngam nonow ngak nge girdi’ nu tabinaw rok ngarbad nga wean, ni bod rogon ni mmichegew ngak.” 23 Ma aram miyow yan ngar piningew Rahab ngeb nga wean, nike un e chitamngin ngak nge chitiningin, nge pi walagen ni pumo’on, nge tin kabay e girdi’ ni girdi’en e tabinaw rok. Min fekrad ni yad gubin, ni girdi’ nu tabinaw nge pi sib rorad, min ta’rad nga wuru’ e gin be par piyu Israel riy. 24 Miyad tay e nifiy ko fare binaw ngar urfiyed nge urngin ban’en ni bay u lan, ma kemus ni pin’en nni ngongliy ko gol, nge silber, nge bronze, nge wasey e da ni urfiy, ya ra feked ngar ted nga tamachibgil rok SOMOL. 25 Machane me ayuweg Joshua e pogofan rok Rahab ni be’ ni bpin nma chuway’ ngak nge urngin e girdi’ rok, ni bochan e mithag fa gali mol’og ni l’ogrow Joshua nga ranow nga Jeriko ni damit. Ma pi’in owchen Rahab e ka aram e ra pired rok piyu Israel ke mada’ ko bin daba’ e rran.
26 Me ning Joshua chiylen ngak e girdi’ e ngiyal’nem ni ga’ar, “En nra guy rogon ni nge fulweg e re binaw nu Jeriko ney nga rogon e ra bucheg SOMOL wa’athan.
En nra tabab i muruwliy e ra yim’ e
bin th’abi ilal i fak ni pumo’on;
ma en nra ubung e garog riy e ra
yim’ e bin th’abi bitir i fak.”+
27 Ere SOMOL e i par rok Joshua, me gilbuguwan u daken e re nam nem ni ga’ngin.
+ 6:26 1 Ki 16:34