24
1 Ngiyal’ nem e kenang Balaam ni ba’adag SOMOL ni nge fal’eg wa’athan yu Israel, ma aram ma daki yan ni nge mada’nag SOMOL ni bod fa yu yanem. Me sap nga daken e ted ni desert
2 me guy piyu Israel ni kar n’ufed e Tent rorad nra reb e ganong ma ke par nga bang. Me gagiyegnag fare kan nthothup rok Got Balaam,
3 me weliy e re yi’iy ni ba’aray:
“Thin rok Balaam ni fak Beor,
thin rok fa’anem ni kan bing owchen,
4 mrayag ni nge rung’ag e n’en ni be yog Got;
nni piliyeg e changar rok me guy e tin
nike dag Got ngak, ni Got ni Gubin ma Rayag Rok.
5 Rib fel’ e pi Tent rok yu Israel,
6 ni bod yu thal i gek’iy ni palm nib k’af,
ara yungi woldug ni bay u to’oben e lul,
ni bod e gek’iy ni aloes ni SOMOL e ke yung,
ara gek’iy ni cedar ni bay u to’oben e ran.
7 Pire’ e n’uw nra aw ko nam rorad,
miyad yung awochngin e woldug rorad ko milay’ nike aw e n’uw ngay.
Pilung rorad e ra ga’ buguwan ngak Agag,
ma gagiyeg ni ngi i tay e bay i ga’ i yan.
8 Got e fekrad nga wuru’ yu Egypt;
me cham ni fan ngorad ni bod rogon ba garbaw ni pumo’on ni damumuw.
Yad ma ful’ e pi to’ogor rorad,
miyad bilbilig yilrad, miyad tet’ar gan e gat’ing rorad.
9 Yu Israel e bod ba layon nib gel;
ra be mol ma dariy be’ nra ga’aran’ ni nge pug.
En nra fal’eg wa’athan yu Israel e ra fel’ wa’athan,
ma en nra bucheg wa’athan yu Israel e ra buch wa’athan.”
10 Me unguy Balak e tug ni kari damumuw me ga’ar ngak Balaam, “Kug piningem ni ngam yibil ngam bucheg wa’athan e pi to’ogor rog, machane nga dalip yay ni kam fal’eg wa’athrad.
11 Ere mu sul nga tafnam! Kug micheg ngom ni bay gu pi’ puluwom nib tolang, ma SOMOL e de pagem ni ngam rin’ e tin ku gu ning ngom, are dab ni pi’ puluwom.”
12 Me fulweg Balaam ni ga’ar, “Gog ngak fa picha’ ni mol’oegrad ngarbad ngog,
13 ni mus ni fa’an ga ra pi’ ngog urngin e silber nge gol ni bay u tabinaw rom, ma SOMOL ku ir e gu ra fol rok. N’en ni kug weliy e rrogon nike yog ngog.”
Bin tomur e yi’iy rok Balaam
14 Me ga’ar Balaam ngak Balak, “Chiney e nggu sul ngak e tirog e girdi’, machane som’on e nggog ngom e n’en ni bayi rin’ e girdi’ nu Israel ngak e girdi’ rom ko tin bay yib e rran.”
15 Ma aram me yog e re yi’iy ni ba’aray:
“Thin rok Balaam ni fak Beor,
thin rok fa’anem ni kan bing owchen,
16 nrayag ni nge rung’ag e n’en ni be yog Got,
ma en ni Th’abi Tolang e ma pi’ ngak e tin nge nang; ni piliyeg e changar rok me guy e tin
nike dag Got ngak, ni Got ni Gubin ma Rayag Rok.
17 Kug guy e tin bay nga m’on e rran,
ma kug guy yu Israel.
Ba’ ba pilung ni bod ba t’uf ni ba ga’ ram’en ni bayi sum rorad.
Rogon ba t’uf ni ba ga’ ram’en e aram rogon ni bayi yib rok yu Israel.
Bayi li’ e pi’in yad ma yog e thin rok yu Moab,
me thirif u but’ urngin e pi’in yad ba uf ma yad ma togopluw.
18 Bayi gel ngak e pi to’ogor rok u Edom
me tafnay e nam rorad,
me par yu Israel ni be gel i yan.
19 Yu Israel e bay i yot’yot’rad nga but’
me thang owchen e pi’in yad ra magey.”
20 Mi ni piliyeg e changar rok Balaam me guy piyu Amalek me weliy e re yi’iy ni ba’aray:
“Yu Amalek e immoy ni ir e ba th’abi gel u fithik’ e pi nam,
machane bayi taw ko tomur min thirif u but’.”
21 Mi ni piliyeg e changar rok me guy e pi Kenite me weliy e re yi’iy ni ba’aray:
“Gin ni gimed be par riy e bfel’ rogon ni gowa dabi buch ban’en romed,
ni bod ba tafen e arche’ ni bay u thilin e war nib tolang,
22 machane gimed e pi Kenite e bay ni thirifmed u but’
ko ngiyal’ ni bayi fekmed yu Assyria ni kam manged kalbus.”
23 Me weliy Balaam e re yi’iy ni ba’aray:
“Mini’ e pi girdi’ nem ni yad be mu’ulung ko lel’och?
24 Salthaw e bay ra afgad nga barkow u Cyprus ngarbad ni mael;
bay ra koled yu Assyria nge yu Eber,
machane bay nthang owcherad.”
25 Me sul Balaam nga tafen, me yan Balak.