BABYOR NI PI’ PAUL NGE YAN NGAK E GIRDI’ NU
FILIPPI
Babyor ni pi’ Paul nge yan ngak girdi’en e galesiya nu Filippi ni ir e bin som’on e galesiya ni sum u Europe u daken e maruwel rok Paul. Yu Filippi e bay u Macedonia, ni bangi nug nib milfan nga Roma. I yoloy Paul e re babyor ney ko ngiyal’ ni bay u kalbus ma be magafan’ ni bochan e be togopluw boch e girdi’ ngak, ni girdi’ ni ku yad ma weliy e thin rok Got, ma bochan e be motoyil boch girdi’en e galesiya ko machib nde riyul’. Yugu aram rogon ma i par Paul nib felfelan’ ni bochan e michan’ nge pagan’ rok ngak Kristus, ma ki pi’ e athamgil nga laniyan’ girdi’en Kristus ni fan e ngkur pired ni yad ba felfelan’.
I yol Paul ngak girdi’en e galesiya nu Filippi ni be pining e magaer ngorad ko fare tow’ath nra pi’ed ngak ni nge ayuweg ko gafgow rok. Ma ku be fonow nagrad ni ngar pired nike pagan’rad ni yugu aram rogon ni keb e gafgow ngak nge ngorad. Miki yog ngorad ni ngar pired nib sobut’an’rad ni bod Jesus, nge dabi gagiyeg nagrad e tolngan’ nge ufanthin. Be puguran ngorad ni ta’ab girdi’ ni kar ted Kristus e tow’ath rok Got ngorad ni bochan e be runguyrad, ni yag ngorad u daken e michan’ rorad ngak Kristus, ma gathi bochan e kar folgad ko Motochiyel rok Moses. Ya felfelan’ nge gapas e bay rok e pi’in kar ta’ab girdi’gad Kristus.
Ere pin’en ni ba ga’ fan ko re babyor ney e murung’agen e felfelan’ nge pagan’ nge athamgil laniyan’ rok girdi’en Kristus nge ta’ab girdi’ ni yad be tay u daken e michan’ rorad ngak, ma ku be dag e re babyor ney rogon nrib t’uf girdi’en e galesiya nu Filippi rok Paul.
Tin ni bay riy
Tabolngin 1:1–11
Rogon Paul ni bay u kalbus 1:12–26
Pangiy ni bfel’ u daken Kristus 1:27—2:18
N’en ni leamnag Paul ni nge rin’ Timothy nge Epafroditus 2:19–30
Fonow ni nga ni ayuw ko pi to’ogor nge sikeng ni yib rok mo’onyan’ 3:1—4:9
Paul nge pi tafager rok ni girdi’ nu Filippi 4:10–20
Tin tomur e thin 4:21–23
1
1 Re babyor ney e yib rok Paul nge Timothy, ni yow e tapigpig rok Kristus Jesus —
Ngak urngin e girdi’ rok Got ni yad be par u Filippi, nike mich Kristus Jesus u wun’rad, nge pi’in yad be tay murung’agen girdi’en e galesiya nge pi’in yad be ayuweg girdi’en e galesiya.
2 I Got ni Chitamangidad nge Somol Jesus Kristus e ngu’ur ayuwegew gimed ma yow be pi’ e gapas nga lanin’med.
Meybil ni tay Paul ni fan ngak e pi’in ngar poyed e gi babyor rok ney
3 Gubin yay ni gimed ra yib ngan’ug ma gu ma pining e magaer ngak e Got rog ni bochmed ni gimed urngin;
4 ma urngin yay ni gu ma pi’ e meybil romed ngak Got ma gu ma yibil u fithik’ e felfelan’,
5 ni bochan e kam ayuweged gag kam uned ngog i wereg rok e girdi’ i yan fare Thin Ni Bfel’ ko chirofen ni som’on ni mu rung’aged riy ke mada’ ko chiney.
6 Ere bmuduwgil u wun’ug ni Got ni ir e tabab i ngongliy e re maruwel ney ni bfel’ u fithik’ i lanin’med e bayi muruwliy i yan nge yan i mada’ ko Rofen ni nge mus riy, ni aram e Rofen ni nge sul Jesus riy.
7 Gubin ngiyal’ ni gimed be par u lanin’ug! Aram fan nib mat’aw ni ngu’ug leam nagmed ni aray rogon. Ya gimed gubin ni kam uned ngog nga mat’wug nike pi’ Got ngog, ni chiney ni gu bay u kalbus nge fa ngiyal’nem ndawor non’eg nga kalbus ni ug ayuweg fare Thin Ni Bfel’ ma gu be micheg nga laniyan’ e girdi’.
8 I Got e manang ni gu be yog e tin riyul’ ni fa’anra lungug e ri gimed urngin ni gimed ba t’uf rog ni ta’reb rogon ngarogon ni gimed ba t’uf rok Kristus.
9 Ere ba’aray e meybil rog ngak Got ni fan ngomed: gu be yibil ngak Got ni ngi i gel feni t’uf Got nge girdi’ romed i yan, mi gimed nang e bin riyul’ i fan e thin rok Got nge yag ni ngam nanged e tin nib mat’aw ko tin nde mat’aw,
10 nge yag ni ngam mel’eged e tin ni ir e ba th’abi fel’. Me yag ni um pired ni kam gilafgad nga orel ko urngin mit e kireb nge n’en ni yira yog e tagan riy ngomed ko Chirofen nra sul Kristus riy.
11 Me par pangimed nriyul’ ni bfel’, ni kemus ni go’ Jesus Kristus e rayag ni nge muruwliy u fithik’ i lanin’med me yagnag ngomed, ni fan e nge gilnag buguwan Got me yin’ e sorok ngak Got.
Yira fol ku Kristus ma aram e yafos
12 Pi walageg, gub adag ni ngam nanged ni pin’en ni kug mada’nag e kari ayuweg i wereg fare Thin Ni Bfel’.
13 Me ere chiney e urngin e matanag u tafen e en ni pilung nge urngin e girdi’ ni yad bay u roy ni kar nanged ni kanon’eg nga kalbus ni bochan e gag reb e tapigpig rok Kristus.
14 Ma kalbus ni kug tay e ke gelnag e pagan’ rok yo’oren pi walagdad ni girdi’en Kristus ngak Somol, ni gubin ngiyal’ ma yad be machibnag fare thin rok Got ngak e girdi’ ndakurir tuntun gad ma dakurir tamdaggad.
15 Ma bay boch i yad ni be machibnag murung’agen Kristus ngak e girdi’ ya ke awan’rad ngog ma yad ba’adag ni ngar tugthingad ngak e pi’in ka’a gu machib nagrad, ma boch e girdi’ e yad be machibnag murung’agen Kristus ni bochan e bm’agan’rad ngay ni ngar ayuweged e girdi’.
16 Pi cha’ney e yad be machib ni aram rogon ni bochan e gub t’uf rorad, ya yad manang nike pi’ Got e maruwel ngog ni nggu micheg nib riyul’ fare Thin Ni Bfel’.
17 Ma boch e girdi’ e darir machib niged murung’agen Kristus ni bochan e rib m’agan’rad ngay, machane bochan e yad be finey ni manganog e sorok ngorad; ma yad be finey ni yad ra gelnag e kireban’ ngog ko ngiyal’ ni gu bay riy u kalbus.
18 Machane dariyfan! Ya gub felfelan’ ngay — yugu bochan e nge yag nni weliy murung’agen Kristus u gubin kanawo’en nrayag, ndemturug ko yibe rin’ u fithik’ e leam nde mat’aw ara u fithik’ e leam nib mat’aw. Ma bay ug par ni gub felfelan’,
19 ya gu manang ni bay ni pageg ni bochan e meybil romed nge ayuw ni be pi’ e Kan Nthothup.
20 Ya tin ni ku gum’ ni bochan nge n’en ni be l’agan’ug ngay e thangri dab gu pag e maruwel rog nge kireb, machane gubin ngiyal’ nri lan e re ngiyal’ i n’ey e thangri athamgil lanin’ug, ya nge yag ntay fan Kristus minog e sorok ngak ni bochag, ndemturug ko gu ra fos fa gu ra yim’.
21 Ya mang e yafos? Rogon nike mich u wun’ug e ngan par rok Kristus! Ma yam’ ni ngan tay e aram e win.
22 Machane fa’an rayag ni gu rin’ bo’or e maruwel ni ba ga’ fan ni fa’anra gu par ni gub fos, me ere da gu nang ko bin ngan e gub adag, ko nggum’ fa nggu fos.
23 Ya kug me’echthal u thilin, ya ri gub adag ni nggu chuw ko biney e tamilang nggu wan ngak Kristus, ni ir e ri kab gel e fel’ riy;
24 machane ri ka ba ga’ fan ngomed nra gu par ni gub fos.
25 Rib muduwgil u wun’ug ni aray rogon, ere gu manang ni bay gu par ndab gum’. Bay gu par romed ni gimed gubin nggu ayuwegmed ngam mon’oggad ma gimed be felfelan’ u fithik’ e michan’ romed ngak Kristus.
26 Ya nggu sul ngomed mi gimed felfelan’ ngam pininged e magaer ngak Kristus ni bochag.
27 Ere n’en nth’abi ga’ fan ni ngam rin’ed e nge par pangimed ni bod rogon ni be yog e thin rok Kristus, ya demturug ko ke yag fa de yag ni gub gguymed, machane mu gu rung’ag ni kam pired ni gimed bmuduwgil nta’a ban’en e gimed be nameg, ma gimed be athamgiliy u ta’ab yang ni ta’a ban’en e gimed be athpeg ni aram e nge mich u wan’ e girdi’ fare Thin Ni Bfel’.
28 Ri dab mu rusgad ngak e pi to’ogor romed; ma nge athamgil lanin’med ni gubin ngiyal’, ireray e ren’en nra micheg ngorad ni bay ra waergad, ma gimed e bay mu gelgad, ya Got e ir e bayi ayuwegmed ngam gelgad!
29 Ya ke mel’egmed Got ni ngam pigpiggad ngak Kristus, ni gathi kemus ni ngam pired nib mich u wun’med, machane ngku um gafgowgad ni fan ngak.
30 Ere chiney e rayag ni ngam uned ngog ngad athamgilgad, ni ir e ren’en ni um guyed gag ko som’on ni gu be athamgiliy e re gafgow nem, me ir e ku gu be athamgiliy, ni bod rogon ni gimed be rung’ag.