3
Fanow ngak e pi’in pagel
1 Fakag, dab mu pag talin e machib rog ngom. Gubin ngiyal’ ni ngi i par u wun’um e n’en kugog ngom ni ngam rin’.
2 Machib rog e ra pi’ ngom e yafos nib n’uw ma bfel’ rogon.
3 Dab mu pithig pa’am ko yul’yul’ nge t’ufeg. Mu the’ row nga bilel’ugnam; mag yoloy nga lanin’um.
4 Fa’an ga ra rin’ ni arrogon, ma ga ra fel’ u wan’ Got nge girdi’.
5 Mu pagan’um ngak SOMOL u polo’ i lanin’um, ma ri dab mu toer ko tin ga be finey ni ga manang.
6 Ngu’um leamnag SOMOL u fithik’ urngin ban’en ni ga be rin’, me dag ngom e bin mat’aw e kanawo’.
7 Dab mu leamnag ni gur e ga ba gonop; ya ngu’um par ni bay madgun SOMOL u wan’um, ma ga pag i rin’ e kireb.
8 Fa’an ga ra rin’, ma ra yan i aw ni bod e falay ni bay angin nra golnag e yungin ke maad’ad u dowam me chuweg e amith rom.
9 Tin be yib ko woldug rom e ngam fek e tin th’abi fel’ riy ngam pi’ ngak SOMOL, ni aram e ga be tay fan.
10 Fa’an ga ra rin’, ma ra sug e grain u lan e pi naun rom ni kam toy ni tafen e grain, ma ra pire’ e wayin rom nge dabkum nang e gin ngam cha’riy ngay.
11 Fakag, fa’anra yal’uwegem SOMOL, ma ngar mu nang ni be ginangem.
12 Ya SOMOL e ma yal’uweg e pi’in yad ba t’uf rok, ni bod rogon ba matam nma yal’uweg bpagel ni fak nib t’uf rok.
13 Nge felan’ e en nike yag e gonop ngak, ya ke yib e tamilangan’ ngak.
14 Ya fel’ nma yib riy e bo’or ko fel’ nma yib ko silber; ba ga’ fan ngom ko gol.
15 Gonop e ka ba ga’ fan ko churwo’; dariy ban’en ni ga ba’adag nrayag ni ngam puluwnag ngay.
16 Gonop e ra n’uwnag nap’am ko biney e tamilang, ma ra yagnag ngom e fel’ rogon nge tayfan.
17 Gonop e ra i tayem ni ga bfelfelan’ ko biney e tamilang, mi i pow’iyem riy ndariy ban’en nra buch rom.
18 Pi’in nra ur pired ni yad ba gonop e yad ba felfelan’, ya gonop e ra pi’ e yafos ngorad, ni bod rogon ba ke gek’iy ni yug be k’uf.
19 I SOMOL e sunmiy e fayleng ko gonop rok;
ma llowan’ rok e ayliy lanelang riy ngagil’.
20 Gonop rok e k’aring e pi lul’ nge yan nlul’
nge manileng ni nge pi’ e n’uw nga fayleng.
21 Fakag, mu chichi’iy pa’am ko gonop rom nge nangan’. Dariy e ngiyal’ ngam pithig pa’am riy nge chuw rom.
22 Ra yib riy ngom ba yafos ni bfel’ ma ba felfelan’.
23 Ga ra yan ko kanawo’ rom ni dariy ban’en nra buch rom ma dariy e ngiyal’ nra tun em.
24 Ma dab mu rus ko ngiyal’ ni ga ra yan nga chob, ma ga mol ni n’umngin e nep’ nib mola’ram.
25 Ma dabi magfan’um ko riya’ nra yib nib tomgin, ni bod e tin ma yib ko pi’in kireb ni bod bang i lang.
26 I SOMOL e ra aywegem ni dabi buch ban’en rom. Ma dabi pagem ngam aw ko wup.
27 Demturug e ngiyal’ nrayag rom, ma ga pi’ e ayuw ko pi’in ke t’uf e ayuw rorad.
28 Dariy e ngiyal’ ni ngamog ko pi’in gimed ba buguliyoror ni nge son ngaf ni gabul ni fa’anra yag ni ngam aywegrad e ngiyal’nem.
29 Dariy ban’en ni ngam tanomnag ni nge gafgow e pi’in gimed bbuguliyoror riy; ya gimed ma par u ta’bang nib pagan’rad ngom.
30 Dab mu tugthingad bogni’ ni dariy rogon ni fa’anra dariy ban’en ni ka ra bucheged rom.
31 Dabi awan’um ko girdi’ nma’ngach ara mu leamnag ni ngam ngongol ni bod yad,
32 ya SOMOL e ba fananikan e girdi’ nma rin’ e kireb, machane ma fek e girdi’ nib mat’aw ngar manged tafger rok.
33 I SOMOL e ma tay e buch wa’athan nga daken e tabnaw rok e pi’in kireb, machane ma fal’eg wa’athan e pi tabnaw rok e pi’in mat’aw.
34 Dariy rogon e girdi’ ni ufanthin ngak, machane ma dag ngak e pi’in nib sobut’an ni yad ba t’uf rok.
35 Girdi’ nib gonop e bfel’ bugwarad, machane girdi’ nib pinat e ra mun daken e ma’fan ni yad bmata’.