147
Ngan pining e sorok ngak Got ni Gubin ma Rayag Rok
1 Mu pining e sorok ngak SOMOL!
Rib manigil ni nganon’ tangin e sorok ngak e Got rodad;
rib fel’ ma ba mat’aw ni ngan pining e sorok ngak.
2 I SOMOL e be fal’eg rogon yu Jerusalem ni nge sulweg nga rogon;
be fulweg e girdi’ ni ur kalbusgad u bang.
3 Ma be golnag laniyan’ e pi’in ke kireban’rad
ma be taflaynag e maad’ad rorad.
4 Ir e ke duwgiliy urngin e t’uf
ma keyog fithingan reb nge reb.
5 Somol rodad e ba gel gelngin ma ba sorok;
ma gonop rok e dabiyag i foleg.
6 I Somol e ma ayweg e pi’in gafgow,
machane ma pirdi’iy e pi’in kireb nga but’.
7 Ngan tangnag e sorok ngak SOMOL;
min chubeg e musik ko harp ngak e Got rodad.
8 Ir e filath e manileng nga lanelang;
me pi’ e n’uw ni fan ko but’
me tugulnag e pan u daken e pi burey.
9 I pi’ gan e gamanman
ma ra pong pifak e raven me durwi’iyrad.
10 Gathi gelngin e os e ma felfelan’ ngay,
ma ku gathi salthaw nib muthan’ e ma felan’ ngay;
11 ya ma felan’ ngak e pi’in yad ma liyor ngak,
ni pi’in nib pagan’rad ko t’ufeg rok ni dabimus.
12 A Jerusalem, mu pining e sorok ngak SOMOL!
A Zion, mu pining e sorok ngak e Got rom!
13 I SOMOL e ma tay e yoror rom nib gel;
ma ir e ma fal’eg wa’athan e girdi’ rom.
14 Ir e ma tay e mathilin binaw rom nib gapas.
ma chum’er nigem ko tin th’abi fel’ e wheat.
15 Ma duwgiliy e n’en ni nge rin’ e fayleng,
ma n’en nma yog e kachingiyal’ nem me yodrom.
16 Ma filath e ayis ni bod e blangkit
me wereg e wa’angchal nike el ni ayis ni bod e fiyath.
17 Ma pi’ e ayis nib el nge aw ni bod e woyang;
dariy be’ nrayag ni nge libeg e garbeb nma pi’!
18 Ma nap’an nra non, me ranran e ayis;
me loeg e nifeng, me yan e ran ni lul’.
19 Ma pi’ e thin rok ngak e girdi’ rok,
ni pi fanow nge motochiyel rok ngak yu Israel.
20 De rin’ e ran’ey ni fan ngak yug boch e nam;
ni dar nanged e motochiyel rok.
Ke sorok SOMOL!