69
Ba man ayuw
1 Got, mu ayuweg e pogofan rog!
Ke taw e ran nga tan l’ugunag.
2 Gu be nguchur i yan nga fithik’ e rungdu’ nib dub’ag,
ma dariy e but’ riy nib el;
gu bay u fithik’ e ran nib to’ar,
ni be chugur ni nge limoch nigeg e n’ew.
3 Ke m’ay gelngig ma ke amith k’angag
ko pong ni gu be tay ni man ayuw,
ma ke amith lan owcheg
i changarnag e ayuw rom.
4 Pi’in yad be fanenikayeg ndariy tapgin
e yad ba pire’ nga piyan lolugeg;
pi to’ogor rog e yad be lifith l’ugunrad nib togopluw ngog
yad ba gel ma yad ba’adag ni ngar li’edgag nggum’.
Kar gel niged yad ngog ni nggu pag ngorad bogi n’en ni gathi gu iring.
5 Got, denen rog e de mith u p’eowchem;
ga manang fanag balyang!
6 Dab mpageg ngug girengiy e tamra’ nga daken e pi’in gur e yad be toer ngom,
i gur SOMOL ni Got ni Gubin ma Rayag Rom ni Th’abi Tolang!
Dab mu pageg nggu girengiy e may’fan nga daken e pi’in yad ma meybil ngom,
I gur Got nu Israel!
7 Thin nib tagan e yibe yog ngog ni bocham,
ma kug mathrow ko tamra’.
8 Kug bod ba milekag ngak pi girdi’eg,
gowa gu be’ u bang ngak e girdi’ ko tabnaw rog.
9 Rogon feni pasigan’ug ni nggu tiyan’ug ko Tempel rom e be gak’ u lan ngorongoreg ni bod ba nifiy;
thin ni kireb ni yibe yog ngom e be kun ngog.
10 Ra gu pag e abich ni bochan e nge sobut’anug u p’eowchem,
me yog e girdi’ e thin nib tagan ngog;
11 mra gu chuw nga madan e tayam’,
miyad moning nigeg.
12 Yad be weliy murung’ageg u kanawo’ i yan,
ma pi tamu’un rrum e yad be tunguy e tang ni murung’ageg.
13 Machane gag e bay gu meybil ngom, i gur SOMOL;
Got, mu fulweg taban e meybil rog ko ngiyal’ ni kam turguy
ni bochan ga’ngin e t’ufeg rom’,
ya gab yul’yul’ ko tin ka mu micheg ni ga ra ayuwegey.
14 Mu ayuwegneg nge dab kug nguchur nga fithik’ e rungdu’;
mu yororiyeg rok e pi to’ogor rog,
ma ga ayuwegneg nge dab gu ligil nga’ar.
15 Dab mpag e ran nge yib i thareyeg;
dab mpageg nggu limoch u ar,
ara mpageg nggu wan nga low ko yam’.
16 SOMOL, mu fulweg taban e meybil u fanam gol ko fare t’ufeg rom ni dabimus;
mu changar ngog u fithik’ gelngin e runguy rom ni ba ga’!
17 Dab mmithegem rok e tapigpig rom;
ku gu par nga fithik’ e oloboch nib gel, mu fulweg taban e meybil rog e chiney!
18 Moy ngog ngam ayuwegneg;
mu lagneg u pa’ e pi to’ogor rog.
19 Ga manang rogon e thin nib kireb ni yibe yog ngog,
nga rogon ni yibe tamra’ nigeg ma yibe darifan nigeg;
ga be guy urngin e to’ogor rog.
20 Thin ni kireb ni yibe yog ngog e ke kireban’ug ngay,
ma kug par ndabiyag ni gu ayuwegneg.
Kug finey ni mang e runguyeg be’, ma dariy be’ nike runguyeg;
ara be’ ni nge fal’eg lanin’ug, ma da gur pir’eg be’ nra rin’.
21 Ra gum’ ko bilig, ma yub e yad ra pi’ ngog;
mra gum’ ko belel, miyad pi’ e mugnin ni nggu unum.
22 Pi mur ni yad be tay e mang e yigi kireb nagrad;
pi madnom ni yad be tay e mang e yigi mang ba wup ngorad!
23 Mu gagiyeg nagrad ngar ma’ewgad;
mu gagiyegnag e niw u keru’rad nge par ni gubin ngiyal’ ma bwaer!
24 Mu pu’og e damumuw rom nge dakenrad;
damumuw rom nib gel e nge kolrad!
25 Mang e yugun n’ag e yungi n’en ni yad ma par riy nge par ni dakriy be’ riy;
mang e par e pi tent rorad ni ndakuriy be’ riy ni kabfos!
26 Yad be gafgownag e pi’in kam gechignag;
yad be weliy murung’agen e gafgow ni be tay e pi’in kam maad’ad ngorad.
27 Mu tay urngin e denen rorad u wun’um;
dab mu unegrad nga fithik’ e pi’in ka mu mat’aw nagrad ngom.
28 Mu thang fithingrad u babyoren e yafos;
dab mu unegrad nga babyoren e tirom e girdi’.
29 Ku gum’ ko amith nge ngochngochan’;
A Got, mu chuwegeg u fithik’ ngam mat’aw nigeg!
30 Bay gu tang ni gu be pining e sorok ngak Got;
bay ug pining e magaer ngak ni aram e gu be weliy murung’agen nga feni sorok.
31 Ren’ey e kabfel’ u wan’ SOMOL ko bin ni ngan pi’ ba garbaw ngak ni maligach,
kabfel’ ko bin ni ngan pi’ ba garbaw ngak ni kemus ga’ngin.
32 Ra guy e pi’in ni gafgow ni aray rogon miyad felfelan’;
mra pi’ e athamgil nga laniyan’ e pi’in yad ma meybil ngak Got.
33 SOMOL e ma motoyil ngak e pi’in kar gafgowgad,
ma der ma pag talin e tirok e girdi’ ni bay u kalbus.
34 Tharmiy nge fayleng, day nge pin’en nib fos ni bay riy,
mu pininged e sorok ngak Got!
35 Bayi chuweg yu Zion u pa’ e pi to’ogor rok,
me ngongliy rogon e binaw nu Judah bayay,
girdi’ rok e bay ra pired u rom ngar tafned fare binaw.
36 Pi’in owchen e pi tapigpig rok e bay ni thum’nag ngorad,
ma pi’in yad be par nib t’uf Got rorad e bay ra pired riy.