26
Pi matnag ko fare Tempel
1 Ba’aray e pi maruwel nni pi’ ngak pi Levite ni yad e ngu’ur matnaggad u Tempel. Fare ke girdi’ rok Korah e immoy be’ nib mo’on ni Mishelemiah riy ni fak Kore, ni be’ ko fare tabnaw rok Asaf.
2 Ni medlip e pagel ni fak, ni kan yarmiy fithingrad ni tabab ko en ni nganni’: Zekariah, Jediael, Zebadiah, Jathniel,
3 Elam, Jehohanan, nge Eliehoenai.
4 Obed Edom e ki fal’eg Got wa’athan nge fakay e pagel ni meruk, nni yarmiy fithingirad ni tabab ko en ni nganni’: Shemayah, Jehozabad, Joah, Sakar, Nethanel,
5 Ammiel, Issakar, nge Peullethai.
6-7 I Shemayah ni bin nganni’ e pagel ni fak Obed Edom e nel’ e pagel ni fak: Othni, Refael, Obed, Elzabad, Elihu, nge Semakiah. Pi pagel ney e rib ga’ farad u lan e karorad e girdi’ ni bochan e ba yo’or ban’en ni yad ba salap riy; ma galicha’ ni ba’aray i Elihu nge Shemayah e rib pag farow salap.
8 Tabnaw rok Obed Edom e ni mel’eg nel i ragag nge l’agruw e pumo’on riy nrayag e re gaf i maruwel ney rorad.
9 Tabnaw rok Meshelemiah e nni mel’eg ragag nge meruk e pumo’on riy nrayag e re gaf i maruwel ney rorad.
10 Hosah ni be’ ko fare ke girdi’ rok Marari e aningeg e pagel ni fak: Shimri (en ni chitamngin e tay e re mo’on ney ni ir e ngi i gagiyeg, ni yug aram rogon ni gathi ir e ba nganni’),
11 Hilkiah, Tebaliah, nge Zekariah. Ragag nge dalip fapi girdi’ u gubin ni chon e tabnaw rok Hosah nra manged e matnag u Tempel.
12 Pi matnag ko fare Tempel e nki’egrad nge l’agruw ulung, ni yu tabnaw, min pi’ e maruwel ngorad u lan e Tempel, ni bod ni i rin’ boch e Levi.
13 Ra reb e tabnew ni demturug ga’ngin miyad girengiy e pow nge m’ug ko bin bu uw e garog e ngar matanagiyed.
14 Shelemiah e yan i duwgil ni bin ngek e garog e nge matanagiy, me Zekariah nib mo’on ni fak, nib mo’on ni urngin ngiyal’ ma bmat’aw e fanow nma pi’.
15 Obed Edom e duwgil e bin yimuch e garog ni nge matanagiy, ma pi pagel ni fak e duwgil ni ngar matanagiyed e pi senggil ni yima cha’ar riy.
16 Shuppim nge Hosah e duwgil ni bin ngal e garog e ngar matanagiyew nge fare garog ni Shalleketh ni bay ko fare pa’ i wo’ u talang. Maruwel ko matnag e ni duwgiliy u dakaney nra be’ ma bay e ngiyal’ ni nge matnag.
17 U ba’ ni ngek e ra reb e rran ma nel’ e matnag riy, ba’ ni lel’och e aningeg, ma ba’ ni yimuch e ku aningeg. Aningeg e matnag ko pi senggil ni tafen e cha’ar ni gubin e rran, ni lal’agruw ni’ nga reb e senggil ni tafen e cha’ar.
18 Mu wean ko fare yoror ko ngal e bay aningeg e matnag riy u charen e kanawo’ ma l’agruw ngalan fare yoror.
19 Irera’ e pi maruwel ni fan ko matnag nni pi’ ngak fagal ke girdi’ rok Korah nge Merari.
Ku Boch e maruwel nu Tempel
20 Ma boch i yad fapi Levi e ba milfan e machaf u Tempel ngorad nge pi senggil ni yima cha’riy e pi tow’ath ni kan ognag ngak Got riy.
21 I Ladan ni reb fapi pagel ni fak Gershon, e ir e ga’ rok boch fa yu ulung i tabnaw, nib mu’un e tabnaw rok Jehiel ngay nib mo’on ni fak.
22 Ma ku l’agruw e pumo’on ni ku fak Ladan, i Zetham nge Joel, ni er e gali cha’ ni yow ma guy e machaf ko fare Tempel nge fare senggil ni yima cha’ar riy.
23 Mu kun pi’ e maruwel ngak e pi’in owchen Amram, Izhar, Hebron, nge Uzziel.
24 I Shebuel ni be’ ko fare ke girdi’ rok Gershom nib mo’on ni fak Moses, e ir e th’abi ga’ ko machaf u Tempel.
25 U daken Eliezer nib mo’on ni walagen Gershom ni girdi’en Shelomith. I Eliezer e be’ nib mo’on ni fak Rehabiah, nib mo’on ni fak Jeshiah, nib mo’on ni fak Joram, nib mo’on ni fak Zikri, nib mo’on ni fak Shelomith.
26 I Shelomith nge chon e tabnaw rok e yad ba ga’ ko gubin e tow’ath nike ognag David ni Pilung ngak Got, nge pi lolgen e tabnaw, nge pi’in yad ma yog e thin ko fa yuke girdi’, nge pi tolang ko salthaw.
27 Ra feked boch fa pin’en nlaged u fithik’ e mael ngar pi’ed ni ngan fanay u lan fare Tempel.
28 Shelomith nge tabnaw rok e yad e ga’ ko gubin ban’en ni kan pi’ ni ngan maruwel ngay u lan e Tempel, nib mu’un e pi tow’ath ngay ni fek Samuel ni profet i yib, nge tin ni pi’ Saul ni Pilung, nge Abner nib mo’on ni fak Ner, nge Joab nib mo’on ni fak Zeruyah.
Pi Maruwel rok boch piyu Levi
29 U fithik’ e pi’in owchen Izhar, nge Kenaniah nge pifak ni pumo’on e ni pi’ ngorad fare gaf i maruwel ni yad e ngu’ur gagiyeg niged e pi maruwel: ba milfan babyoren urngin ban’en ngorad ma yad ma puf oloboch rok e girdi’ nu Israel.
30 U fithik’ e pi’in owchen Hebron, me Hashabiah nge reb e bbiyu’ nge medlip mir’ay e girdi’ rok, e go’ yad bogi pumo’on nib cheag min ta’rad ni ngar gagiyeg niged gubin e tin nib l’ag rogon ko ngongolen e taliw nge tin ban’en nib l’ag rogon ko am.
31 Jeriah e ir e i yog e thin rok e pi’in owchen Hebron. U lan aningeg i ragag e duw ni i gagiyeg David ni Pilung, min tay ba mogow girdi’ u fithik’ pi girdi’en e pi’in owchen Hebron, min pir’eg bogi salthaw nriyad ba cheag ni yad e girdi’ ko re tabnaw ney ni yad ma par u Jazer u lan e gin nib milfan nga Gilead.
32 Me mel’eg David ni Pilung 2,700 e pi’in lolgen e pi tabnaw ko girdi’ rok Jeriah, nri yad ba cheag ngan tayrad ni yad e ngu’ur gagiyeg niged e pin’en nib l’ag rogon ko ngongolen e taliw nge am u lan yu Israel ko ngek ko fare lul’ ni Jordan u lan e nug rok Ruben, Gad, nge ba’ ni Ngek e Manasseh.