13
Mael ni Tay Abijah ngak Jeroboam
(1 Kings 15:1–8)
1 U lan e duw ni gaman e ragag nge meruk ko gagiyeg rok Jeroboam ni Pilung nu Israel, me mang Abijah e pilung nu Judah,
2 me gagiyeg ni dalip e duw u Jerusalem. Chitiningin e Mikayah ni be’ ni bpin ni Uriel e chitamngin ni be’ ko fare binaw nu Gibeah.
Me yib i sum reb e mael u thilin Abijah nge Jeroboam.
3 Fek Abijah barba’ i salthaw ni yad aningeg mir’ay e bbiyu’, me yib Jeroboam ni togopluw ngak ni bay e salthaw rok ni yad meruk mir’ay e biyu’ u gubin.
4 Me mada’ fa gal raba’ i salthaw nga daken e ted ni go’ burey u Efraim. Me yan Abijah ni Pilung nga daken e burey ni Zemaraim fithingan me tolul ngak Jeroboam nge piyu Israel ni ga’ar: “Mmotoyilgad ngog!
5 Dam nanged ni SOMOL ni Got rok yu Israel, e ngongliy ba m’ag u thilrow David ndabi math bi’id, ni pi’ SOMOL ngak nge pi’in owchen ni yad e ngu’ur pilunggad u ga’ngin yu Israel ni dariy n’umngin nap’an?
6 Jeroboam nib mo’on ni fak Nebat e cheal nge togopluw ngak Solomon ni Pilung rok.
7 Me tomur riy me kunuy ba ulung i girdi’ ni kireb ndariy rogorad ngabang, miyad suruy Rehoboam nib mo’on ni fak Solomon nge fol u laniyan’rad, ya be’ ni kab pagel ma denang rogon ni nge siyegrad.
8 Ere chiney e gimed be yog ni ngam chamgad nib togopluw ngak e re lung ni pi’ SOMOL ngak e pi’in owchen David. Bay ba raba’ i salthaw romed nib ga’ ma kubay romed e pi ya’an fak e garbaw ni pumo’on ni gol ni ngongliy Jeroboam ni nge mang pi got romed.
9 Kam tulufed e prist rok SOMOL, nge pi’in owchen Aron, nge pi Levite. Ma kam mel’egged boch e prist ni bod nma rin’ yug boch e nam ka mu ted nga luwrad. Yug demturug be’ nra yib nike fek ba garbaw ni pumo’on fa medlip i saf mra yag ni nge tabgul ni bod e prist rok e pi got romed nir.
10 Ma gamad e kagmad be pigpig ngak SOMOL ni Got romad ma dawor gu paged. Prist nrabad rok Aron e kayad ma rin’ e maruwel rorad, ma pi Levite e tama’ayuw rorad.
11 Gubin e kakadbul nge blayal’ ma yad ma pi’ ngak e incense nge gamanman ni maligach ni yibe urfiy nika yu reb. Ma yad be pi’ e maligach ni flowa u daken ba tebel ni kan tabgulnag, ma gubin e blayal’ ma yad ma gal’ e magal u daken e pi tagil’ e magal nib gol. Gamad ma rin’ e n’en keyog SOMOL, machane gimed e kam digeyed SOMOL.
12 I Got ni ir e ma gagiyeg nagmad ma prist rok e yad ba’aray ni bay e rappa rorad, ni ka ra fal’eged rogorad ni ngar thoyed miyad piningmad ni nggu maelgad ngomed. Girdi’ nu Israel, dab mu chamgad nib togopluw ngak SOMOL ni Got rok e pi chitamngimed! Dabyag ni ngam gelgad!”
13 Rengiyal’ i n’em ma ke l’oeg Jeroboam yu raba’ fapi salthaw rok ni ngranod u keru’ e pi salthaw nu Judah ngar oggad ngorad, me par e tin kabay e salthaw rok Jeroboam ni ka ra sabaliyed e salthaw nu Judah.
14 Me chachangar piyu Judea miyad guy ni ka ni longobiyrad. Miyad tolulnag e ayuw ngak SOMOL, me thoy e prist fapi rappa.
15 Me tolul piyu Judea nib ga’ lamrad, me gafaliyrad Abijah miyad cham ngak piyu Israel; me gel Got ngak Jeroboam nge fare raba’ i salthaw nu Israel.
16 Me mil piyu Israel rok piyu Judea, me gelnag Got piyu Judea ngorad.
17 Abijah nge fare raba’ i salthaw rok e ra li’ed piyu Israel ngar waergad — baley u reb e million e salthaw ni th’abi cheag nu Israel nli’rad ngarm’ad.
18 Ma aram e girdi’ nu Judah e ka ra gelgad ngak piyu Israel, ni bochan e ra gifgad ngak SOMOL ni Got rok e pi chitamngirad.
19 Me tuluf Abijah fa raba’ i salthaw rok Jeroboam nge kol boch e pi binaw rok ni nge tafnay: yu Bethel, Jeshanah, Efron, nge yuchi binaw nib chugur ko pi binaw ney.
20 N’umngin nap’an ni i gagiyeg Abijah ma dakiyag ni sul gelngin Jeroboam nga rogon. Ma aram me cham SOMOL ngak nge li’ nge yim’.
21 Me Abijah e aram e ri gel boch gelngin. Ragag nge aningeg pi le’engin me fakay rliw’ nge l’agruw i pagel nge ragag nge nel’ e ppin.
22 Tin kabay ni murung’agen Abijah, ni tin i weliy nge tin i rin’ e ka ni yoloy ngalan nge babyor ni Chepin Iddo ni Profet.