9
Got nge pi’in ke mel’egrad ni ngar manged girdi’en
1 N’en ni gu be yog e ba riyul’; i gag girdi’en Kristus ma dagur ban; ma lanin’ug ni fare Kan Nthothup e be gagiyegnag e ku be micheg ngog ni dagur ban.
2 Rib ga’ e kireban’ ni gu be tay, ma rib ga’ e amith ni bay u lan gum’ircha’eg nder chuw, ni bochan pi girdi’eg ni gamad ta’ab ufin nge ta’ab racha’!
3 Fa’an mang e ra gu pi’eg ngan gechig nigeg ma gamow dar Kristus ma aram miyad thap ngak Got ma kug rin’.
4 Yad e mel’egrad Got ni ngar manged girdi’en; me tayrad ni kar manged pifak me pi’ e fla’ab rok ngorad; me ngongliy e pi m’ag rok u thilrad nge ir me pi’ fare Motochiyel ngorad; bin riyul’ e pigpig nge meybil ngak Got e yad e bay rorad; ma ke micheg Got ngorad e tin ni bayi pi’ ngorad;
5 yad owchen e pi chitamangidad nu Israel, mi Kristus ni ngal’ nib girdi’ e bmu’un ko re racha’ nem. I Got ni ir e be gagiyegnag urngin ban’en e nganog e sorok ngak ndariy n’umngin nap’an! Amen.
6 Dagur yog ni tin nike yog Got ni bayi pi’ ngorad e daki pi’; ya gathi urngin e girdi’ nu Israel ni yad e pi’in ke mel’egrad Got ni ngar manged girdi’en.
7 Ma ku errogon ni gathi urngin e pi’in owchen Abraham ni yad pifak Got; ya ga’ar Got ngak Abraham, “Kemus ni pi’in owchen Isak e bay ni matha’eg ngorad ni fakam.”
8 Fan e ren’ey e bitir nni gargeleg nrogon ni yima gargeleg e bitir ko biney e tamilang e gathi yad pifak Got; machane pi bitir ni kan gargeleg nrogon ni yog Got e kani matha’eg ngorad ni yad e pi’in nriyul’ ni yad owchen Abraham.
9 Ya Got e micheg e pi thin ni ba’aray ni ga’ar: “Bay taw nga nap’an mu gu sul ma aram me gargeleg Sarah bochi pagel.”
10 Ma gathi kemus ara’; ya fa gali pumo’on ni fak Rebeka e ta’reb e chitamangirow, ni en ni chitamangidad ni er Isak.
11-12 Machane bochan ni mel’eg Got bagayow fa gali pumo’on ni nge yib fan ko tin ni be finey Got, ma aram me ga’ar Got ngak Rebeka, “En nib ilal e bayi pigpig ngak e en ni bitir.” I yog Got e re bugithin ney ndawor ni gargelegrow, ma dawor ra ngongliyew ban’en, ni ban’en ni bfel’ fa ban’en nib kireb; ere rogon ni turguy Got bagayow e bay rogon ko pong ni tay ngak, ma dariy rogon nga ban’en ni manga kar ngongliyew.
13 Ni bod ni be yog e babyor nib thothup ni be ga’ar, “Ba t’uf rog Jakob, machane kug fanenikay Esau.”
14 Ere mang e nga dogned? Nge lungudad e de mat’aw Got? Ri dangay!
15 Ya ga’ar ngak Moses, “Bay gu runguy e en ni gu be finey ni nggu runguy, ma bay taganan’ug ko en ni gu be finey ni nge taganan’ug ngak.”
16 Ere dariy rogon ko n’en ni ba’adag e girdi’ fa n’en ni yad be rin’, ya kemus ni yigo’o runguy rok Got e bay rogon ngay.
17 Ya ga’ar e babyor nib thothup ngak Farao, “Kug pilungnigem ni ba’aray fan, bochan e nggu maruwel ngom nge yag ni gu dag gelngig, min nang fithingag u fayleng ni polo’.”
18 Ere Got e ma runguy e en ni be finey ni nge runguy, mma gelnag laniyan’ e en ni be finey ni nge gelnag laniyan’!
Damumuw nge runguy rok Got
19 Ma bayi bigimed me ga’ar ngog, “Fa’an mang e errogon, mra di’in me pir’eg Got thibngin be’? Yi mini’ e rayag ni nge taleg ir ko tin nike finey Got?”
20 Machane gur mini’ ni ngam fulweg lungun Got, yi gur e kemus ni gab girdi’? Ba rume’ nni ngongliy ko but’ e der ma ga’ar ngak e en ni ngongliy, “Mangfan ni mu ngongliyeg ni aray rogog?”
21 Bmuduwgil ni en nma ngongliy e rume’ ko but’ e bay mat’wun ni nge maruwel ko fa gi but’ nrogon ni be finey, ni nge ngongliy l’agruw i rume’ ko fa gi but’, nreb e yima fanay ko tin ni ba ga’ fan ban’en, ma reb e yima fanay ko tin gathi ba ga’ fan ban’en.
22 Ere ta’reb rogon e ren’ey ko n’en nike rin’ Got. Be finey ni nge dag e damumuw rok ya nge dag gelngin ngan guy. Ere rib gumaen’ ni be k’adan’ rok e pi’in yad be k’ar damumuw ngak ni bay tapgin ni nge kirebnagrad.
23 Ma ku be finey ni nge dag e fla’ab rok ni ba ga’ nike pu’og nga dakendad e pi’in be runguydad, ni pi arodad nike ngongliy rogorad ni nge yag e fla’ab rok ngorad.
24 Ya gadad e pi’in ke piningdad, ni gathi kemus ni yigo’o fithik’ piyu Israel e ke piningdad riy, ya ku errogon ni ku ke piningdad u fithik’ e pi’in gathi yad piyu Israel.
25 Ya ba’aray e n’en ni be yog u lan e babyor nib thothup ko Hosea ni be ga’ar:
“Pi’in gathi girdi’ rog
e bay gu piningrad ni yad e Girdi’ Rog,
ma re nam nda i t’uf rog,
e bay gu pining nike T’uf Rog.
26 Ma gin’en ni lunguy ngorad riy, ‘Gathi gimed e girdi’ rog,’
e ireram e gin ni bay ni piningrad riy ni yad pifak Got ni be par nib fos.”
27 Mi Isaiah e yog murung’agen yu Israel ni ga’ar: “Yugu ra yo’or yu Israel ngar boded urngin e yan’ ni bay u charen e day, machane ri in i yad e ra thap ngak Got;
28 yi Somol e ba gur nra mu’nag e tin nike finey ni nge rin’ u fayleng ni polo’.”
29 Ni bod rogon ni ka’a yog Isaiah ni ga’ar, “Somol ni Gubin ma Rayag Rok, e fa’an mang e de tay boch e girdi’ ni owchen pi chitamangidad ngar pired ma kad boded yu Sodom nge yu Gomorrah.”
Yu Israel nge fare Thin Ni Bfel’
30 Ere mang e nga dogned? Nga dogned ni pi’in gathi yad piyu Israel ni bogni’ nda ur guyed rogon ni ngar mat’awniged yad ngak Got e mat’awnagrad Got ngak u daken e michan’ rorad ngak Jesus Kristus;
31 ma pi’in ke mel’egrad Got e ur gayed ba motochiyel, ni ir e nge mat’awnagrad ngak Got, ma dar pir’eged.
32 Ni mangfan? Ni bochan e n’en nrin’ed e dar toer gad ko mich ni nge mich Jesus Kristus u wun’uy machane ra toer gad ko ngongol rorad. Ke tun ayrad ko fare malang ni “malangen e tun ay”
33 ni ir e be weliy e babyor nib thothup murung’agen ni be ga’ar:
“Mu guyed, kug tay ngalan yu Zion ba malang
ni bay i tun ay e girdi’ ngay,
ba war ni ngar dol’gad ngay.
Machane en nra michan’ ngak e dabi m’ingan’.”