3
Yesu viokidi Moyize
1 Diawu diodi bakhomba zinlongo, beno lutelo kuidi Nzambi mu baka kuku mu bima bi Diyilu, bika lutadidila Yesu mvuala ayi nganga Nzambi yi minu kioki tulembo samuni.
2 Niandi wuba wukuikama kuidi mutu wowo wumbieka banga bu bela Moyize mu nzo yimvimba yi Nzambi.
3 Bila Yesu wumono ti widi wufuana mu tambula nkembo viokila wowo wutambula Moyize. Banga kuandi ntungi wu nzo wuntambulanga nzitusu viokila nzo yika tungidi.
4 Bila kadika nzo yitungu kuidi mutu ; vayi Nzambi niandi wutunga bima bioso.
5 Mu diambu di Moyize, niandi wuba wukuikama mu nzo yi mvimba yi Nzambi banga kisadi mu diambu di telamanga kimbangi mu mambu momo mafueti samunu.
6 Vayi Klisto, niandi widi wukuikama banga Muana mu nzo yi Nzambi. Beto tuidi nzoꞌandi enati tunsimbidila nate tsukulu bufula ayi diana di ngolo diodi tueti ku kiniemisina.
Luvundulu mu diambu di bobo bawilukila Nzambi
7 Diawu, banga bueti tuba Pheve Yinlongo ti :
Enati lumbu kiaki luwilu mbembo andi
8 Lubika kitula mintima mieno banga matadi
banga bu lutinguna
mu lumbu ki phukumunu mu dikanga.
9 Mu lumbu kina bakulu beno batsoka
ayi bathota
ayi bamona mavanga mama mu tezo
ki makumaya ma mimvu.
10 Diawu ndifuemina buwombo tsungi yina ayi ndituba :
“Mintima miawu midi kaka mizimbala
ayi basia zaba zinzila ziama ko.”
11 Diawu ku tsi nganzi ama
ndilefa ndefi yayi :
Balendi kota ko mu luvundulu luama.
12 Diawu bakhomba, lukeba mu diambu mutu mu beno kabika ba ntima wumbimbi ayi wunkambu wilukilanga ; tala kedi tamba Nzambi yi moyo manima.
13 Vayi lulubasananga kadika lumbu beno na beno, bu tuidi ayi “lumbu kiaki” muingi mutu mu beno kabika vunuka mu masumu ayi kabika ba matingu.
14 Bila enati tunsimbidila nate kuna tsukulu diana diodi diba yeto vana thonono, buna tuidi mu kithuadi ayi Klisto.
15 Banga bu tubulu :
Enati lumbu kiaki luwilu mbembo andi,
lubika kitula mintima mieno banga matadi
banga bu lutinguna.
16 Buna banani bobo batinguna bu bawa mbemboꞌandi e ? Buna keti babo bobo Moyize katotula mu Ezipite e ?
17 Buna banani bobo Nzambi kafuemina mu makumaya ma mimvu e ? Buna keti batu bobo bavola masumu ayi bafua mu dikanga e ?
18 Buna kuidi banani Nzambi kalefila ndefi ti balendi kota ko mu luvundulu luandi e ? Buna keti bobo bamanga kuntumukina e ?
19 Buna tumueni ti basia nunga ko mu kota mu diambu di kambu kuawu ku minu.