7
Yesu wuyenda ku nyedngo wu zinzo zi kapu
1 Momo bu mavioka, Yesu wudiengila mu Ngalili, kasia zola vuanda mu Yuda ko, bila Byuda batomba ku mvonda.
2 Nyengo wu Bayuda, nyengo wu zinzo zi kapu, wuba nduka.
3 Buna bakhomba bandi zinkamba :
—Katuka vava, yenda ku Yuda muingi minlonguki miaku mimona mavanga momo wulembo vangi.
4 Bila kuisi ko mutu wumvanganga diambu mu kinsueki ayi tidi zabakana kuidi batu. Bu wulembo vangi mambu mama, wukimonisa ngeyo veka kuidi batu ba nza.
5 Bila bakhomba bandi mamvawu zisia kunwilukila ko.
6 Yesu wuba vutudila :
—Thanguꞌama yifueni ko vayi beno thangu eno yidi yimbote mu zithangu zioso.
7 Nza yilendi ku lulenda ko. Vayi minu yifueti kaka kundenda bu ndieti kuyitelimina kimbangi ti mavanga mandi madi mambimbi.
8 Diawu beno yendanu kueno ku nyengo beni. Minu ndisi nkuenda ko ku nyengo beni bila thangu ama yifueni ko.
9 Yesu wuvuanda ku Ngalili bu kamana kuba kamba mambu momo.
10 Bakhomba bandi bu bayenda ku nyengo, niandi mamvandi wuyenda mu kinsueki, mu kambu kukimonisa kuidi batu.
11 Bayuda bantomba ku nyengo bu batuba :
—Kuevi kuidi mutu wowo e ?
12 Maniunguta mawombo mabua mu diambu diandi va khatitsika nkangu wu batu. Batu bankaka batuba ti :
—Mutu wowo widi mutu wumboti.
Vayi batu bankaka batuba ti :
—Nana, batu kalembo vukumuna.
13 Vayi kadi mutu kasia baka kibakala ko mu ku nzonzila va meso ma batu, mu diambu di boma baba mona Bayuda.
14 Nyengo buna weka va khatitsika, Yesu wukota mu Nzo Nzambi ayi wulonga.
15 Bayuda basimina buwombo ayi batuba :
Buevi mutu wawu kazabidi masonuku bu didi ti niandi kasia longa ko e ?
16 Yesu wuba vutudila :
—Malongi mama masi mama veka ko vayi malongi ma mutu wowo wuthuma.
17 Woso tidi kuandi vanga luzolo lu Nzambi buna buedika wela zaba ti malongi ma ndieta longa kuidi Nzambi maba voti mu luzolo luama veka ndieta yolukila.
18 Mutu wunlonganga mu luzolo luandi veka, wuntombanga wandi nkembo. Vayi mutu wowo wuntombanga nkembo wu mutu wowo wuntuma, buna niandi mutu wukiedika ayi kuisi ko diambu di luvunu mu niandi.
19 Moyize kasia kuluvana mina ko e ? Vayi kadi mutu mu beno kakinzikanga Mina ko. Buna bila mbi luntomba kuphondila e ?
20 Nkangu wuvutula :
—Pheve yi mbimbi yidi yaku ! Nani tidi kuvonda e ?
21 Yesu wuba vutudila :
—Kumu kimosi ndivengi, vayi beno babo lulembo simina.
22 Moyize wuluvana muina wu zenganga nitu yi kibakala, (wusia ba muinꞌandi ko vayi wuba wu bakulu). Vayi beno lueti zenganga nitu yi kibakala mu lumbu ki saba.
23 Enati bakala zengusulu nitu yi kibakala mu lumbu ki saba mu diambu di bika bundula muina wu Moyize, buna bila mbi beno lufueti kumfuemina bu ndibelusa mbevo mu lumbu ki saba e ?
24 Diawu bikanu sambisa batu mu thalu yi zizi vayi lusambisa mu tsambusulu yi songa.
25 Basi Yelusalemi bankaka batuba :
—Niandi ko mutu wowo batidi vonda e ?
26 Vayi tala buabu wulembo longi mu kiphuanza vayi bakadi kunkanga kadi diambu dimosi. Mananga bapfumu zimueni ti bukiedika kuandi niandi Klisto e ?
27 Vayi tuzebi mutu wowo ayi tunzebi kuevi kaba vayi Klisto bu kela kuiza, kadi mutu kasi zaba ko kuevi kela ba !
28 Muna nzo Nzambi, Yesu wuyamikina, bu kaba longa :
—Bukiedika luzebi minu ndidi nani ayi kuevi ndiba ! Ndisia kuizila mu luzolo luama veka ko vayi mutu wowo wuthuma niandi wukiedika ; beno luisi kunzaba ko.
29 Minu ndinzebi, bila kuidi niandi ndiba ayi niandi wuthuma.
30 Bazola kumbuila. Vayi kadi mutu kasia nunga ko mu kumbuila, bila thangu andi buna yifueni ko.
31 Batu bawombo mu bobo baba mu nkangu banwilukila ayi batuba :
—Klisto bu kela kuiza, wela vanga bikumu biwombo viokila biobi bilembu vangi mutu wawu e ?
32 Bafalisi bawa nkangu wu batu wuniunguta mambu momo mu diambu diandi. Diawu Bafalisi va kimosi ayi bapfumu zi zinganga Nzambi batumaminsungi mi Nzo Nzambi muingi mienda kangi Yesu.
33 Vayi Yesu wukamba :
—Ndikidi yeno diaka vava mu thangu yikhufi, bosi ndiela vutuka kuidi mutu wuthuma.
34 Buna luela kuthomba vayi lulendi kumbona ko. Koko ndiela ba, beno lulendi kuiza kuna ko.
35 Bayuda bakambasana bawu na bawu :
—Buna kuevi mutu wawu kela kuenda koko tulendi kummonina ko e ? Mananga tidi kuenda kuidi batu bobo bamuangana mu zitsi zi Bangeleki ayi tidi kuenda longi Bangeleki e ?
36 Buna buevi buididi tsundu yi mambu momo katubidi ti : “Luela kuthomba, vayi lulendi kumbona ko ayi koko ndiela ba beno lulendi kuiza kuna ko e ?”
Nlangu wu luzingu
37 Mu lumbu kitsuka ki nyengo, kiawu lumbu kinneni ki nyengo, Yesu wutelama vana ayi wuyamikina :
—Enati mutu phuila kadi buna bika kiza kuidi minu ayi kanua.
38 Banga bu dikisonimina : woso wukunguilukila, minlangu miwombo mi luzingu miela kumba mu niandi.
39 Wutubila bobo mu diambu di Pheve Yinlongo yela tambula batu babo bela kunwilukila. Mu thangu yina batu batambudi ko Pheve bila buna Yesu katambudi ko nkembo.
Batu bavasana mu diambu di Yesu
40 Batu bawombo mu nkangu bu bawa mambu momo, batuba :
—Kiedika mutu wawu mbikudi.
41 Vayi bankaka ti :
—Niandi Klisto.
Bankaka ti :
—Buna Klisto wulenda kuandi totukila mu Ngalili e ?
42 Tala, masonoko matubanga ko ti Klisto kafueti totukila mu nkuna Dividi ayi kafueti butukila ku Betelemi, buala bu Davidi e ?
43 —Nkangu wu batu wuvasuka mu diambu diandi.
44 Bankaka bazola kumbuila vayi kadi mutu kasia ku mbuidikisa ko.
Bapfumu zi Bayuda zimanga wilukila Yesu
45 Minsungi mi Nzo Nzambi mivutuka kuidi bapfumu zinganga Nzambi ayi Bafalisi ; bawu baba yuvula :
—Bila mbi luisi kuntuadila ko e ?
46 Minsungi mivutula :
—Kuisi ko mutu wumatuama yolukila banga buyolukidi mutu wowo !
47 Bafalisi baba yuvula :
—Buna beno mamveno luvunukini e ?
48 Vadi mutu wumosi mu bapfumu voti mu Bafalisi wuwilukidi mutu wowo e ?
49 Vayi nkangu wu batu bobo bakambulu zaba Mina, widi wusingu !
50 Buna mutu wumosi mu bawu, Nikodemi, mutu wowo wuyenda kuidi Yesu va builu, wuba kamba :
51 —A buevi, Mina mieto mieti zengila mutu nkanu mu kambu teka wa mutu beni ayi mu kambu teka zaba mambu mbi kavengi e ?
52 Bamvutudila :
—Ayi ngeyo mamvaku widi muisi Ngalili e ? Tanga mu Mina ayi yindula masonoko, buna ma wumona ti mbikudi kalendi totukila mu Ngalili ko.
[
53 Buna kadika mutu wuvutuka ku nzoꞌandi.