8
Yesu wudikila mili ya yi babakala
(Matayi 15.32-39)
1 Muna bilumbu beni, nkangu wu batu bawombo bakutakana. Sumbu basia ba kadi kidia ko, buna Yesu wutela minlonguki miandi ayi wuba kamba :
2 —Kiadi ndimmona nkangu wu batu baba. Bila bilumbu bitatu bavuandidi yama vava ayi basi kadi kidia ko.
3 Enati ndibavutudi ayi nzala mu zinzo ziawu buna maba bua dibutumu nzila bila bankaka thama babedi.
4 Minlonguki miandi mimvutudila :
—Va buangu kikambulu batu tuidi, buna kuevi tulenda bakila maphamafueni mu dikila nkangu wu batu wawu e ?
5 Yesu wuba yuvula :
—A mapha makua madi yeno e ?
6 Buna Yesu wutumina batu boso bavuanda va tsi ; wubonga tsambuadi di mapha beni, wuvutula matondo, wubukuna mawu ayi wuvana mawu minlongukimiandi ayi miawu mikabudila nkangu wu batu. Buawu bobo mivanga.
7 Baba ayi ndambu bina bi zimbizi zifioti zi nlangu. Bu basakumuna biawu wuvana minlonguki miandi muingi mikabudila batu.
8 Badia ayi bayukuta. Botota tsambudi di bipani mu bitini biobi bisiadidila.
9 Batu babo baba, nduka-nduka mili ya yi babakala. Bosi Yesu wuba vutula.
10 Muna thangu beni, Yesu wukota mu nlungu ayi minlonguki miandi, bayenda ku Dalimanuta.
Yesu ayi bapfumu zi zinganga Nzambi zi Bayuda
(Matayi 16.1-4)
11 Bafalisi bayiza ayi batona kumfindisa ziphaka. Banlomba dimbu kimosikiba ku Diyilu mu diambu di kuntambila ntambu.
12 Yesu wuvumina ayi wutuba :
—Bila mbi batu ba tsungi yayi bantombila dimbu e ? Bukiedika ndikulukamba tikadi dimbu kimosi balendi mona ko.
13 Wu babika, wukuma mu nlungu ayi wuyenda ku disimu dinkaka.
(Matayi 16.5-12)
14 Minlonguki mizimbakana nata mapha ; dipha dimosi kuandi kaka diba yawu muna nlungu.
15 Vayi wuba lubula :
—Lukeba ayi luzibula meso mu luvi lu Bafalisi ayi lu Elode !
16 Minlonguki miyuvusana miawu na miawu :
—Mu diambu tukambulu mapha diawu kantubila bobo !
17 Yesu wuzaba mayindu mawu ayi wuba yuvula :
—Bila mbi lulembo kukiyuvula beno na beno mu diambu lukambulu mapha e ? A beno, lusudikidi ko e ? Ayi lubakudi ko e ? Mintima mieno mikidi banga matadi e ?
18 Meso madi yeno vayi lukadi mona e ? Makutu madi yeno vayi lukadi wa e ? Lukadi buela tebuka moyo e ?
19 Bu ndibukuna mapha matanu mu diambu di mili tanu yi batu, bipani bikua lutota biobi biba biwala mu bitsadisila e ?
Bamvutudila :
—Kumi bibiodi.
20 Bu ndikabula tsambuadi di mapha mu diambu di mili ziya zi batu. A bipani bikua lutota biobi biba biwala mu bitsiadisila e ? Bamvutudila :
—Tsambuadi.
21 Buna wubuela diaka :
—Vayi nate buabu lusudikidi ko e ?
Yesu wubelusa phofo ku Betesayida
22 Bu batula ku Betesayida banata phofo kuidi Yesu, banleba muingi kansimba.
23 Yesu wusimba phofo beni mu koko, wunnata ku fula di buala, wulobula madita mu meso ma phofo beni ; wuntetika mioko ayi wunyuvula :
—Lembo moni kima e ?
24 Phofo wutala ayi wuvutula :
—Ndimmona batu, banga minti mindiata.
25 Yesu wubuela tetika mioko miandi mu meso ma phofo beni. Bosi Phofo weka mona ; wubeluka ayi wumona bumboti bima bioso.
26 Yesu wumvutula ku nzoꞌandi. Vayi wunkamba ti :
—Kadi kota ku buala.
YESU AYI MINLONGUKI MIANDI
Piela wutelimina Yesu kimbangi
(Matayi 16.13-20 ; Luka 9.18-21)
27 Yesu ayi minlonguki miandi miyenda mu mala ma Sezale mu Filipi. Mu nzila, wuyuvula minlonguki miandi :
—Batu beti tuba ti minu ndidi nani e ?
28 Bamvutudila :
—Bankaka widi Yowani Mbotiki ; bankaka widi Eli, ayi bankaka widiwumosi mu mimbikudi.
29 Buna wuba yuvula :
—Vayi beno veka lueta tuba ti minu ndidi nani e ?
Piela wumvutudila :
—Ngeyo widi Klisto.
30 Vayi wuba kandika babika yolukila diawu kadi kuidi mutu wumosi.
Yesu wuyolukila lufua luandi ayi mfulukulu andi
(Matayi 16.21-23 ; Luka 9.22)
31 Bosi wutona kuba longa ti Muana mutu kafueti mona ziphasi ziwombo, bila bakulutu, bapfumu zi zinganga Nzambi, minlongi mi mina, baboso bobobela kunloza ; bela kumvonda vayi bilumbu bitatu bu biela vioka, niandi wela fuluka.
32 Wuba kamba mambu moso mama mu kambu sueka kadi diambu. Buna Piela wunnata va ndambu ayi wutona kuntubidila.
33 Vayi Yesu wubaluka ayi wutala minlonguki miandi, weka ntubidila Piela mu kingolo ti :
—Satana ! Botuka va ndidi ! Bila mayindu maku masi ko ma Nzambi vayi ma kimutu.
Buevi bu landikinina Yesu
(Matayi 16.24-28 ; Luka 9.23-27)
34 Yesu wutumisa nkangu wu batu ayi minlonguki miandi, wuba kamba :
—Enati mutu tidi kundandakana buna kafueti kukizimbakana niandi veka vayi kabonga dikulusi diandi ayi kandandakana.
35 Bila woso tidi keba luzingu luandi wela luzimbisa, vayi woso wela luzimbisa mu diambu diama ayi mu diambu di Nsamu wumboti, wela luvukisa.
36 Enati mutu beki nza yimvimba vayi zimbisidi muelꞌandi, buna ndandu mbi kela baka e ?
37 Voti mu kima mbi mutu kalenda sombikisa muelꞌandi e ?
38 Bila woso mutu wukumfuila tsoni ayi wumfuila mambu mama tsoniva khatitsika tsungi yayi yi bankua kitsuza ayi yi bankua masumu, buna muana mutu mamvandi wela kumfuila tsoni mu thangu kela kuiza mu nkembo wu dise diandi va kimosi ayi zimbasi ziandi zinlongo.