LUFUA AYI MFULUKULU YESU
26
Bayendila Yesu manenga
(Malako 14.1-2 ; Luka 22.1-2 ; Yowani 11.47-53)
1 Yesu bu kamana tuba mambu mama, wukamba minlonguki miandi :
2 —Luzebi ti bilumbu biodi bisiedi muingi nyengo Pasika wutona ; buna bosi Muana Mutu wela yekolo mu vondo va dikulusi !
3 Buna bapfumu banganga Nzambi ayi bakulutu ba batu bakutakana ku nzo Kayife, pfumu yi banganga Nzambi ;
4 bawizana buevi bafueti kangila Yesu mu luvunu muingi bamvonda.
5 Vayi batuba :
—Tubika vanga buawu mu thangu yi nyengo muingi khindu yibika bua mu batu.
Badukudila Yesu malasi ku Betani
(Malako 14.3-9 ; Yowani 12.1-8)
6 Yesu bu kaba ku Betani ku nzo Simoni, mutu wowo wuba kimbevo ki buazi,
7 nketo wumosi wuyiza ayi bungu ki malasi ma thalu, wudukula mawu ku ntu wu Yesu mu thangu kaba va meza.
8 Vayi minlonguki mifuema bu mimona bobo ayi mituba :
—Bila mbi mbebosolo yi phila yoyo e ?
9 Nganu mboti mu sumbisa malasi beni mu thalu yiwombo ayi vana zimbongo beni kuidi minsukami.
10 Yesu bu kazaba mayindu mawu, wuba kamba :
—A mbi lulembo monisina nketo wawu phasi e ? Diambu kaphangidi didi diambu dimboti.
11 Minsukami mikala kuandi yeno mu zithangu zioso, vayi minu ndisi kuiza kalanga yeno ko.
12 Enati nketo wawu wundukudidi malasi mama mu nituꞌama, didi mu diambu di kubika nzikuluꞌama.
13 Bukiedika ndikulukamba ti muamo muela longo Nsamu Wumboti wawu va nza yimvimba, diambu divengi nketo wawu diela yolokolongo mu kuntebukilanga moyo.
Yuda wusumbisa Yesu
(Malako 14.10-11 ; Luka 22.3-6)
14 Bosi wumosi mu kumi mimvuala miandi miodi, dizina diandi Yuda Isikalioti, wuyenda kuidi bapfumu zi zinganga Nzambi,
15 wuba yuvula :
—Mbi lulenda kuphana enati ndilusumbisidi Yesu e ? Buna bantangila makumatatu ma bivanzi.
16 Tona muna thangu beni Yuda wutomba diluaku di kuba yekudila Yesu.
Yesu ayi minlonguki miandi badia pasika
(Malako 14.12-16 ; Luka 22.7-13)
17 Mu lumbu kitheti ki nyengo wu mapha makambu tulu luvi minlonguki miyiza kuidi Yesu ayi minyuvula :
—A kuevi tidi tuenda kubikila ndiwulu yi Pasika e ?
18 Wuba vutudila :
—Yendanu ku divula kuidi kingandi, buna lunkamba : “Nlongi kakembi : thanguꞌama yifikimini, ku nzoꞌaku ndindila Pasika ayi minlonguki miama.”
19 Minlonguki mivanga phila yi kambila Yesu. Mikubika Pasika.
(Malako 14.17-21 ; Luka 22.14 ; Yowani 13.21-30)
20 Mu thangu masika, Yesu wuvuanda va meza ayi kumi mimvuala miandi miodi.
21 Mu thangu baba ndia, Yesu wuba kamba :
—Bukiedika ndikulukamba : buna luididi vava mutu wumosi mu beno maka phakusa !
22 Baboso beka mona kiadi, wumosi-wumosi weka kunyuvula :
—Pfumu, buna minu e ?
23 Yesu wuba vutudila :
—Mutu wowo wumbuika koko kuandi va kimosi ayi minu mu dilonga buna niandi wukuphakusa.
24 Bila Muana Mutu wulembo yendi banga busonimina mu Masonoko mu diambu diandi. Vayi nga mabienga kuidi mutu wowo wumvakusa ! Nganu bufueni kuidi mutu beni mu kambu kuandi butuka !
25 Yuda, mutu wowo wukumvakusa, wuyuvula :
—A Nlongi ! Bati minu e !
Bosi Yesu wumvutudila :
—Nyinga, ngeyo tubidi buawu.
(Malako 14.22-25 ; Luka 22.15-20 ; 1 Kolinto 11.23-25)
26 Thangu baba ndia, Yesu wubonga dipha, wuvutula matondo, wudibukuna bosi wuvana minlonguki miandi, wuba kamba :
—Bonganu ludia, bila yayi yawu nituꞌama !
27 Bosi wubonga mbungu, wuvutula matondo, wuba vana ayi wutuba :
—Bika lunuanu beno boso
28 bila mama mawu menga mama ma Nguizani madukulu mu diambu di ndemvokolo yi masumu ma batu bawombo.
29 Vayi ndikulukamba, kadi khumbu ndiela buela nua vinu tona buabu nate lumbu kioki ndiela nua vinu kimona va kimosi ayi beno mu Kipfumu ki Dise diama.
30 Buna bayimbila nkunga. Bosi bayenda ku mongo minti mi olive.
Yesu wusamuna ti Piela wela kuntunuka.
(Malako 14.27-31 ; Luka 22.33-34 ; Yowani 13.37-38)
31 Buna Yesu wuba kamba ti :
—Va builu buabu beno boso ma lumana zimbisa minu mu diambu diama. Bila disonama :
Ndiela vonda nsungi mamemi,
mamemi ma nkangu mela mana tiakana.
32 Vayi bu ndiela fuluka, ndiela kulutuamina ku Ngalili !
33 Piela wunkamba :
—A Pfumu ! Ka diambu ko baboso bela zimbisa minu mu diambu diaku, vayi minu ndilendi ko !
34 Yesu wuvutula :
—Tala, bukiedika ndikukamba : buabu kuandi va builu, simbu tsusu yikokula, buna zikhumbu zitatu si wuthunukina.
35 Piela wunkamba :
—Ka diambu ko fua ndifua yaku vayi ndilendi kutunuka ko !
Minlonguki mioso phila yimosi mitubila.
Yesu wusambila ku Ngetesemani
(Malako 14.32-42 ; Luka 22.39-46)
36 Yesu wuyenda ayi minlonguki miandi ku buangu bantedilanga Ngetesemani. Wuba kamba :
—Lukala vava, minu bu ndiedi ku sambila kuna !
37 Wunata Piela ayi bana buadi ba Zebede. Wutona mona kiadi ayi ntima phasi.
38 Bosi wuba kamba :
—Muelꞌama weka kiaki nate nduka mu fua. Lusiala vava vayi luleka nkielo va kimosi ayi minu.
39 Niandi wuyenda thama fioti, wufukama ayi wusambila.
—A Dise diama ! Enati baka bubela, bika kopo yayi yithatukila. Vayi bika bobo nzodidi vayi bobo ngeyo zodidi.
40 Bu kavutuka vaba minlonguki, wuyiza babata balembo leki tulu. Buna wukamba Piela :
—Buna lulendi nunga mu sambila yama va kimosi banza mu thangu yimosi ko e ?
41 Luleka nkielo ayi lusambila muingi luedi bua mu phukumunu. Bila pheve yidi ayi luzolo lu mboti vayi nitu yidi yilebakana.
42 Wuyenda diaka mu khumbu yinzole ayi wusambila :
—A Dise diama ! Enati kadi baka bubela ti kopo yayi yithatukila, vayi enati mfueti kuyinua buna bika luzolo luaku luvangama !
43 Bu kavutuka diaka ; wuyiza buela bata buna balekidi, bila meso matulu maba yawu.
44 Buna wusia babika ayi wuyenda sambila mu khumbu yintatu, ayi mambu mo mawu katuba.
45 Bu kavutuka vaba minlonguki ; buna wuba kamba :
—Lukidi leki ayi lulembo vundi e ? Thangu yifikimini ayi Muana Mutu yekolo mu mioko mi bankua masumu.
46 Telamanu, tuendanu Tala mutu wowo wukuphakula fikimini.
Bakanga Yesu
(Malako 14.43-50 ; Luka 22.47-53 ; Yowani 18.2-11)
47 Buna kamanisini ko yoluka, tala Yuda, wumosi mu kumi mimvuala miodi, wuyiza va kimosi ayi nkangu wu batu banata bisabala ayi zimbondo zi minti, batumu kuidi bapfumu zinganga Nzambi ayi kuidi bakulutu ba Bayuda.
48 Mutu wowo wuvakula Yesu, wuba vana dimbu kiaki :
—Woso mutu ndikuiza fifi besi, buna niandi lufueti kanga.
49 Buna niandi wufikama vaba Yesu ayi wutuba :
—Mboti nlongi. Bosi wumfifa besi.
50 Yesu wunkamba :
—A nkundi ama ! Vanga diwizidi ! Bosi bankaka bafikama, babuila Yesu ayi bankanga.
51 Vayi mutu wumosi mu bobo baba ayi Yesu wunonuna koko kuandi, wutotula sabala kiandi, wuzuba kisadi ki Pfumu yi banganga Nzambi ayi wunzenga dikutu.
52 Vayi Yesu wunkamba :
—Vutula sabala kiaku va buangu kiandi bila batu bantotulanga sabala, mu sabala bela vondolo.
53 Ngeyo wumbanza ti ndilendi lomba kuidi Dise diama ayi vana vawu niandi kalendi ko kumfidisila zimbasi viokila kumi ayi lengio biodi ko e ?
54 Vayi buna buevi bulenda dedikinina mambu masonama mu Minkanda meti tuba ti buawu bobo mambu beni mafueti vangimina e ?
55 Muna thangu yina Yesu wutuba kuidi nkangu wu batu :
—Ndieka dovula muingi luiza khangi ayi zimbedi ayi zimbondo zi minti mu mioko ? Keti bilumbu bioso ndibedi longanga mu Nzo Nzambi vayi lusi kukhanga ko.
56 Vayi mambu moso mama mavangimini mu diambu di dedikisa masonoko ma mimbikudi.
Basambisa Yesu va ntuala lukutukunu lu minyadi
(Malako 14.53-65 ; Luka 22.54-55,63-71 ; Yowani 18.12-14,19-23)
57 Batu bobo bakanga Yesu, bannata kuidi Kayife, pfumu banganga Nzambi. Kuna ku kutakana minlongi mi Mina ayi bakulutu ba batu.
58 Vayi Piela wunlandakana kuna manina nate ku luphangu lu pfumu banganga Nzambi, wukota ku khati luphangu ayi wuvuanda va kimosi ayi minsungi mu diambu kamona kani buevi bukuiza manisina mambu beni.
59 Bapfumu banganga Nzambi ayi batu boso ba lukutukunu lu minyadi batomba kimbangi ki luvunu mu diambu di Yesu muingi babaka bila ki kumvondisila.
60 Ka diambu ko bambangi ba luvunu bawombo bayiza, vayi zisia kumbaka bila ko. Ku nzimunina kuyiza batu buadi,
61 bakamba :
—Mutu wawu niandi wukamba ti : “Minu ndenda tiolumuna Nzo Nzambi ayi kuyitungila mu bilumbu bitatu !”
62 Buna Pfumu yi banganga Nzambi wutelama, wuyuvula Yesu :
—Kadi diambu wukadi vutula e ? Kimbangi mbi kioki batu baba balembo kutelimina e ?
63 Yesu kasia vutula kadi diambu ko. Pfumu banganga Nzambi wunkamba :
—Ndikulomba mu dizina di Nzambi yi moyo, wutukambi ti ngeyo klisto, Muana Nzambi.
64 Yesu wumvutudila :
—Nyinga ! Banga kuandi butubidi. Buela diaka ndikulukamba : tona buabu luela mona Muana Mutu vuendi va koko ku lubakala lu mutu wowo lutidi lulendo ayi wunkuizila va matuti ma diyilu.
65 Buna Pfumu banganga Nzambi wukanzuna minledi ayi wukamba :
—vuezidi Nzambi ! Bila mbi tufueti buela tombila diaka bambangi ? Luwilu beno veka phila kavuezidi Nzambi.
66 Beno buevi lumbanzila e ? Bavutula :
—Fueni kuandi mu vondo !
67 Mbadi banlobudila madita ku busu ayi banzuba zikhomi. Bankaka banzuba zimbata ayi bankamba :
68 —A Klisto, wutubikudila ayi wutukambi nani wubetidi e ?
Piela wutunuka Yesu
(Malako 14.66-72 ; Luka 22.56-62 ; Yowani 18.15-18,25-27)
69 Piela wuba wuvuanda ku nganda, mu khati luphangu, kisadi kimosi ki nketo kiyiza ayi kinkamba :
—Mamvaku bedingi ayi Yesu, muisi Ngalili !
70 Vayi Piela wutunuka kuandi va meso ma batu boso :
—Ndisi zaba ko mambu momo wuntuba !
71 Bu kaba kuenda ku ndambu muelo wu luphangu, kuna nketo wunkaka wummona ayi wukamba batu bobo baba vana :
—E e beno, lutala mutu wowo bedingi ayi Yesu muisi Nazaleti !
72 Piela wubuela tunuka diaka ayi wuleva ndefi ti :
—Bukiedika ndisi zaba ko mutu wowo !
73 Buela kala fioti batu bobo baba vana bayiza vaba Piela ayi bankamba :
—Bukiedika ti ngeyo widi wumosi mu batu bobo bila thubulu aku yilembo fundi.
74 Piela wutona leva ndefi ayi wu kitombila tsingulu :
—Ndisi zaba ko mutu wowo ! Muna thangu beni tsusu yikokudi.
75 Buna Piela wutebukila mambu momo Yesu kakamba ti : “Simbu tsusu yinkokula, buna ngeyo si wuthunukina mu zikhumbu zitatu.” Buna wutotuka ku nganda ayi wudila buwombo.