Minkunga 106
Enati tuisi bakuikama ko, vayi Nzambi widi kaka wukuikama.
1 Luzitisa Yave,
luvutudila Yave matondo bila widi wumboti,
luzolo luandi lunzingila mu zithangu zioso.
2 Nani wulenda yamikisa mavanga ma lulendo ma Yave ?
Voti samuna nzitusu andi woso e ?
3 Lusakumunu kuidi bobo basimbididi busonga ;
bobo beti vanga mambu ma lulama mu zithangu zioso.
4 Wuthebukila moyo, a Yave, mu thangu wumvangila batu baku mamboti
wiza wutsadisa mu thangu wela kubavukisa,
5 muingi ndibaka bu muena khini mu mamboti ma batu baku bobo wusobula ;
muingi ndibaka bukabudila khini ayi batu baku ;
ayi muingi ndifubakana va kimosi ayi kiuka kiaku mu kuvananga nzitusu.
6 Tuvola masumu banga buvodila madise meto ;
beto tuvanga mambimbi ayi mavanga mambimbi.
7 Thangu madise meto baba ku Ezipite,
basia ba ko kadi mayindu mu bikumu biaku ;
basia tebukila ko moyo woka ku mamboti maku
vayi baba bankua matingu va ndambu mbu,
va ndambu mbu wu mbuaki.
8 Vayi wuba vukisa mu diambu di nkembo wu dizina diandi
mu monisa lulendo luandi.
9 Wutemina mbu wu mbuaki, buna wawu wuyuma ;
wuba diatisa mu dibulu dinneni banga mu dikanga.
10 Wuba vukisa mu koko ku mutu wowo wu balenda ;
wuba kula mu koko ku bambeni.
11 Minlangu midiamisa bambeni ziawu ;
kadi wumosi kasia siala wumoyo ko.
12 Buna bawilukila zitsila ziandi
ayi bayimbila minzitusu miandi.
13 Vayi mu nsualu bavika zimbakana momo kavanga,
ayi basia tadidila zindongi ziandi ko.
14 Mu dikanga, bakiyekula mu zinzinunu ziawu ;
va buangu kikambulu batu, batota Nzambi.
15 Buna wuba vana biobi balomba ;
ayi wubafidisila ziphasi.
16 Bavangila Moyize kiphala ayi Aloni ku ka,
mutu wowo Yave kabieka nlongo.
17 Ntoto wuzibuka ayi wumina Datani ;
ayi wufuka dikabu di batu ba Abilami
18 Mbazu yilema va khatitsika batu baba kubakuka,
nlaki wu mbazu wuzinisa batu bambimbi.
19 Ku Holebi, bavanga muana ngombi ;
ayi babuongimina tumba kivangulu mu suitisa sengo.
20 Baviakisa nkembo awu mu mfikula yi ngombi yeti dia biti
21 Bazimbakana Nzambi, mutu wubavukisa,
mutu wuvanga mambu manneni mu Ezipite,
22 bikumu mu tsi Hami
ayi mambu ma tsisi va ndambu mbu wu mbuaki.
23 Buna wutuba ti wukana ku babunga ;
enati kambu Moyize, mutu andi wukasobula,
wutelama mu diambu di kuba sambildila va ntualꞌandi
mu diambu di kakidila miangu miandi mi ngolo muingi kabika ku babunga.
24 Buna balenza tsi yi makhini,
basia wilukila ko tsilꞌandi.
25 Baniunguta mu zinzo ziawu zi ngoto ;
ayi basia tumukina ko Yave.
26 Buna wuvumuna koko kuandi mu leva ndefi mu diambu diawu
ti wela kuba buisa mu dikanga ;
27 ti wela buisa nkunꞌawu va khatitsika makanda ;
ayi wela kuba sasikisa mu yenda ntoto.
28 Bakiyekula bawu veka kuidi Bali-Pewoli
ayi badia makaba matambuku kuidi zinzambi zikambulu moyo.
29 Basoka Yave muingi kafuema mu diambu di mavanga mawu mambimbi,
ayi nsongo wutotuka va khatitsikꞌawu.
30 Buna Pineyasi wutelama ayi wuvuata nsamu ;
buna nsongo wutumbu manisa.
31 Buna bantangila diawu banga busonga
mu zitsungi zinkuiza zikambulu tsukulu.
32 Ku minlangu mi Meliba, bafuemisa Yave ;
buna ziphasi zibuila Moyize mu diambu diawu.
33 Bila batinguna Pheve yi Nzambi
ayi mambu makambulu fuana matotukila mu bididi bi Moyize.
34 Basi bunga ko batu
boso bubela lutumunu lu Yave.
35 Vayi bafubakana ayi makanda mankaka
ayi balonguka kikhulu ki makanda beni.
36 Babuongimina bitumba biawu,
biawu bikituka ntambu kuidi bawu.
37 Batambika bana bawu bababakala
ayi babaketo kuidi ziphevi zimbimbi.
38 Batengula menga ma batu bakambulu zaba diambu ;
menga ma bana bawu bababakala ayi babaketo
mawu batambika kuidi bitumba bi Kana.
Buna ntoto wusumuka mu diambu di menga mawu.
39 Bakisumuna bawu veka mu momo bavanga,
mu mavanga mawu, ba ta kitsuza bawu veka.
40 Muaki Yave wufuemina batu bandi
ayi wukakumukina kiuka kiandi.
41 Wuba yekula kuidi makanda
ayi bobo baba lenda babayadila.
42 Bambeni bawu ziba yamisa
ayi batulu ku tsi lulendo luawu.
43 Zikhumbu ziwombo kaba kudila
vayi baba kaka bankua matingu
ayi bakibivisa mu masumu mawu.
44 Vayi wubela ziphasi ziawu mayindu
thangu kawa yamikina kuawu.
45 Mu bila kiawu, wutebukila nguizani andi moyo ;
ayi mu luzolo luandi lunneni wubalula lukanu.
46 Niandi wuvanga ti bamueno kiadi
kuidi bobo baba nata mu kivika.
47 Wutuvukisa, a Yave, Nzambi eto ;
ayi wutukutikisa tona ku makanda
muingi tubaka buvutudila dizina diaku dinlongo matondo
ayi nkembo mu nzitusu aku.
48 Yave kazitusu, Nzambi yi Iseli !
Mu zithangu zioso ayi mu mvu ka mvu.
Bika batu boso batuba : “Amen.”
Luzitisa Yave.