Minkunga 109
A Nzambi, kadi buela dingalala.
Nkunga Davidi kuidi pfumu minyimbidi.
1 A Nzambi, mutu wowo ndieti zitisa
bika dingalala.
2 Bila batu bambimbi ayi batu bansadilanga bukhita
bazibudi miunu miawu mu diambu diama.
Balembo tubi mu diambu diama mu ludimi lu luvunu.
3 Mu mambu ma kikhenene, banzungididi
ayi balembo nduanisa mu kambu bila.
4 Mu kikundi kiama, balembo mfundi
vayi minu ndidi mutu wu lusambulu.
5 Baphutudidi mambimbi mu mamboti
ayi bandendidi mu diambu di kikundi kiama.
6 Sobula mutu wumbimbi mu diambu kakba mbeni andi ;
bika mfundi katelama va koko kuandi ku lubakala.
7 Mu thangu kela samba, bika kaba monika mu nzimbala
ayi bika lusambulu luandi lumbedisa.
8 Bika bilumbu biandi bikituka bifioti.
Bika mutu wunkaka kabonga buangu kiandi ki kintuadisi.
9 Bika bana bandi baba bana basana ;
ayi nketo andi difuola.
10 Bika bana bandi baba mindiengidi mikuenda lombingi ;
bika baba kuka mu zinzo ziawu zitiolumuka.
11 Bika mutu wowo weti devisa kabonga bima bioso biobi kavuidi ;
bika banzenza baziona mu kingolo mimbutu mi kisalu kiandi.
12 Bika kubika ba mutu wulenda kumvangila mamboti
voti monina bana bandi basana kiadi.
13 Bika nkunꞌandi wulalakana ;
mazina mawu makubulu mu tsungi yinkuiza.
14 Bika mambimbi ma bakulu bandi matebukulungu moyo va ntuala Yave,
bika disumu di ngudi andi dibika kubulu.
15 Bika masumu mawu mazingila mu zithangu zioso va ntuala Yave
muingi kalalikisa thebukulu awu moyo va ntoto.
16 Bila kalendi yindula mu vanga mamboti ko,
vayi wuyamisa nsukami nate ku lufua ;
ayi nkua kiadi ayi mutu wuba ntima wukosakana.
17 Niandi wuzola singa ; bika yimbuila,
kamonanga khini ko mu lusakumunu
bika luawu luba thama ayi niandi
18 Wuvuata tsingulu banga nledi andi ;
yawu yikota mu khati nitu andi banga nlangu,
mu mimvesi miandi banga mafuta.
19 Bika yawu yikituka banga yunga kioki kakukifukila ;
banga nsinga luketo wowo keti vuata mu zithangu zioso.
20 Bika buawu bobo bubela mfutu wu Yave kuidi mimfundi miama ;
kuidi bobo bantubanga mambu mambimbi mu diambu diama.
21 Vayi ngeyo Yave, mutu wumvanganga mawu zodidi,
wuphangila mamboti mu diambu di dizina diaku ;
ka diambu ko mamboti ma luzolo luaku madi, bika wukhula.
22 Ndidi nkua kiadi ayi nsukami
ayi ntimꞌama widi wuluala mu minu.
23 Ndieka lalakana banga kitsusula va masika ;
bakhukidi banga makhoko.
24 Makuma mama malembo bulangama
mu kukifuisanga nzala mu diambu di lusambulu ;
nitu ama yidi yifioti ayi yikonda.
25 Minu ndieka diambu di mvuezolo kuidi mimfundi miama ;
bawu kumbona, balembo nikuna mintu miawu.
26 Wutsadisa, a Yave, Nzambi ama ;
wuphukisa boso buididi luzolo luaku.
27 Bika bazaba ti koko kuaku ;
ti ngeyo Yave wuvanga buawu.
28 Bawu balembo singi vayi ngeyo wela sakumuna.
Bu batelimini mu diambu di nuanisa, bela fua tsoni
vayi kisadi kiaku kiela mona khini.
29 Mimfundi miama milendi vuata nzitusu ko
ayi miela fukudulu tsoni banga yunga.
30 Mu munu ama, ndiela yayisa ngolo Yave ;
Mu nkangu wunneni wu batu, ndiela kunzitisa.
31 Bila niandi wuntelamanga va koko ku lubakala lu nsukami
mu diambu di vukisa luzingu luandi mu mioko mi bobo bakunzengilanga nkanu.