Minkunga 111
Wuvanga matsiminanga
1 Luzitisa Yave !
Ndiela yayisa Yave mu ntimꞌama wumvimba,
mu dikabu di batu balulama ayi mu lukutukunu lu batu.
2 Mavanga ma Yave madi manneni,
meti yindulu kuidi bobo beti kumazola.
3 Mavanga mandi madi ma nkembo ayi ma nzitusu
ayi busonga buandi bunzingilanga mu zithangu zioso.
4 Niandi wuvanga ti matsiminanga mandi matebukulukungu moyo.
Yave widi nkua nlemvo ayi nkua kiadi.
5 Niandi weti vana bidia kuidi bobo beti kunkinzika ;
wuntebukilanga moyo Nguizani andi mu zithangu zioso.
6 Wumonisa batu bandi lulendo lu bisalu biandi ;
bu kaba vana mintoto mi makanda mankaka.
7 Bisalu bi mioko miandi bidi kikhuikizi ayi busonga ;
minsiku miandi mioso mifueni mu tudulu diana,
8 mikindusu mu zithangu zioso ayi mu kadika mvu ;
mivangulu mu kikhuikizi ayi mu bufuana.
9 Niandi wuvana khudulu kuidi batu bandi ;
niandi wutumina nguizani andi mu zithangu zioso.
Dizina diandi didi dinlongo ayi tsisi didi.
10 Kinzika Yave yawu thonono yi nduenga,
Babo bobo beti landakana minsiku miandi babeki diela dimboti.
Niandi vuidi nzitusu mu zithangu zioso.