Minkunga 118
Mamboti mandi madi mu zithangu zioso
1 Luvutudila Yave matondo bila niandi widi wumboti ;
luzolo luandi lunzingilanga mu zithangu zioso.
2 Bika Iseli katuba :
luzolo luandi lunzingilanga mu zithangu zioso.
3 Bika nzo yi Aloni yituba :
luzolo luandi lunzingilanga mu zithangu zioso.
4 Bika bobo beti kinzika Yave batuba ;
luzolo luandi lunzingilanga mu zithangu zioso.
5 Ku tsi ziphasi ziama, ndiyamikina kuidi Yave,
ayi wuphana mvutu bu kaphuandisa mu kiphuanza.
6 Yave widi ku ndambuꞌama, ndilendi mona tsisi ko.
Buna mutu mbi kalenda ku phanga e ?
7 Yave widi ku ndambuꞌama, niandi nsadisi ama ;
buna ndiela nunga mu tala bambeni ziama.
8 Bulutidi mboti mu suaminanga mu Yave
viokila mu tula diana mu mutu.
9 Bulutidi mboti mu suaminanga mu Yave
viokila mu tula diana mu bana ba mintinu.
10 Makanda moso manzungidila
vayi mu dizina di Yave, ndilembo babungi.
11 Mawu manzungidila, ku ndambu ka ndambu
vayi mu dizina di Yave, ndilembo babungi.
12 Mawu manzungidila banga ziniosi,
vayi zifuidi mu nsualu banga zitsendi zinlema mbazu ;
mu dizina di Yave, ndilembo babungi
13 Bandunguna ku mbusa muingi ndibua
vayi Yave wutsadisa.
14 Yave niandi zingolo ziama ayi nkungꞌama ;
niandi wuyika phulusu ama.
15 Yamikina ku khini ayi ku ndungunu kulembo wakana
mu zinzo zi ngoto zi batu basonga :
koko ku lubakala ku Yave kuvanga mambu ma lulendo.
16 Koko ku lubakala ku Yave kuidi ku zangama ngolo ;
koko ku lubakala ku Yave kuvanga mambu ma lulendo.
17 Ndilendi fua ko vayi ndiela zinga
ayi ndiela yamikisa momo Yave kavanga.
18 Yave wuphana thumbudulu mu kingolo ;
vayi kasia kundiekula ko mu lufua.
19 Nzibudila mielo mi busonga,
ndiela kota ayi ndiela vutudila Yave matondo.
20 Wawu, wawu muelo wu Yave,
vawu basonga bafueti kotila.
21 Ndiela kuvutudila matondo
bila ngeyo wuphana mvutu wuyika phulusu ama.
22 Ditadi diloza mintungi diyika
ditadi dilutidi mfunu va fuma ki nzo.
23 Yave wuvanga diambu diodi
ayi didi diambu ditsiminanga va meso meto.
24 Kiaki kiawu lumbu kivanga Yave,
bika tumona khini ayi tuyangalala mu lumbu beni.
25 A Yave, wutuvukisa !
A Yave, wutusadisa tuluta kuenda ku ntuala.
26 Bika kasakumunu mutu wowo wunkuizila mu dizina di Yave ;
tona ku nzo Yave, tulembo kulusakumuna.
27 Yave niandi Nzambi ayi niandi wutukienzula ;
ayi mangiemvo mu mioko, lukota mu ntanda ;
nate ku ziphoka zi diziku dimvikulungu makabu.
28 Ngeyo Nzambi ama ayi ndiela kuvutudila matondo.
Ngeyo Nzambi ama ayi ndiela kuyayisa.
29 Luvutudila Yave matondo bila niandi widi wumboti,
bila luzolo luandi lunzingilanga mu zithangu zioso.