Minkunga 144
Batu baku badi mu khini
Nkunga Davidi.
1 Bika, nzitusu wuba kuidi Yave, ditadi diama ;
weti longa mioko miama mu nuana mvita
ayi minlembo miama mu nuana khindu.
2 Niandi Nzambi ama yi luzolo ayi tinunu kiama
niandi suamunu kiama kingolo ayi niandi nkuidi ama,
niandi nkaku ama ;
mu niandi ndieti suamina
ayi niandi wuntulanga batu ku tsi luyalu luama.
3 A Yave, buna mutu niandi nani muingi wumbelanga mayindu ;
muana mutu muingi wunyindulanga e ?
4 Mutu dedakani banga phemo ;
bilumbu biandi bidi banga kitsusula kimvioka.
5 Vasa diyilu diaku, a Yave, ayi kuluka ;
simba miongo muingi mitotula muisi.
6 Fidisa zitsiemo ku ntuala ayi sasikisa bambeni ziama.
Loza madionga maku ayi wuba zimbikisa.
7 Yalumuna koko kuaku bu widi ku yilu ;
wuphukisa ayi wukhula mu minlangu mi nguma
ayi mu mioko mi banzenza,
8 bobo miunu miwedi luvunu ;
bobo mioko mi lubakala mibeki mayuya.
9 Ndiela kuyimbidila nkunga wumona, a Nzambi.
Mu siku ki kumi di minsinga, kioki beti tedila Lila, ndiela bula miziki,
10 Kuidi mutu wowo wumvananga kuidi mintinu ndungunu,
mutu wowo wunkulanga kisadi kiaku Davidi mu sabala kimvondanga.
11 Wuphukisa ayi wukhula mu mioko mi banzenza ;
bobo miunu miwedi luvunu
bobo mioko mi lubakala mibeki mayuya.
12 Buna bana beto babakala,
mu bumuana buawu bela ba banga bikunusu binyundukanga bumboti.
Bana beto babaketo
bela ba banga makunzi mafikulu ;
mammonisanga kitoko ki buangu.
13 Bilundulu bieto biela ba biwala mu kadika ntindu wu bidia ;
minkangu mieto mi mamemi miela buelama ayi buelama mu zimili zi
zimili mu makumi ma zimili mu zitsola zieto.
14 Zingombi zieto zikheto ziela nata mfuna wungolo,
mavudu malendi ba ko mu bibaka bieto
kadi buela kuenda mu kivika,
yamikina ku ziphasi kulendi ba diaka ko mu zinzila zieto.
15 Lusakumunu kuidi batu bobo mambu mama meti vangama.
Lusakumunu kuidi batu bobo Yave kadidi Nzambi.