Minkunga 19
Zitsongolo zizole zi Nzambi
Nkunga Davidi kuidi pfumu minyimbidi.
1 Diyilu dieti samuna nkembo wu Nzambi
ayi matuti meti yamikisa kisalu ki mioko miandi.
2 Kadika Lumbu kinyamikisa mambu beni
kuidi lumbu kinkaka ;
ayi builu bumosi bueti ma zabikisa
kuidi builu bunkaka.
3 Kuisi ko mambu mayoluka voti mambu masadila ;
Kunkambu wakana zimbembo ziawu.
4 Zimbembo ziawu zieti wakana va ntoto wumvimba.
Mambu mawu beti yoluka
meti tula nate ku sukisina nza.
Ku diyilu katungila nzo yi ngoto
mu diambu di thangu :
5 Yawu yidi banga dibakala dikuela
dintotuka va ntuala vinga kiandi,
banga dikesa, dieti mona khini mu zawula thinu ;
6 Yintotukilanga ku tsongi yi Diyilu,
bosi ku tsongi yinkaka
kuawu kamanisinanga nzietolo andi.
Kuisiko kima kinsuamanga va ntuala diamu diandi.
7 Mina mi Yave midi mifuana,
mieti vananga diaka muela luzingu
Zinzengolo zi Yave zidi zi kiedika
Zinkitulanga mutu wu phamba mutu wu nduenga.
8 Minsiku mi Yave midi mi songa,
minyangidikanga ntima.
Zithumunu zi Yave zidi zivedila,
zinkienzulanga meso.
9 Kinzika Yave didi diambu di vedila,
dieti zingila mu zithangu zioso.
Zitsikudukusu zi Yave zilenda siwulu diana,
zizioso zidi zisonga va kimosi ;
10 Zilutidi thalu ayi nolo ;
ayi viokila zinolo ziwombo zivedila
zilutidi niosi mu lueki ;
zilutidi yoyi yinkumba mu bisila.
11 Mu ziawu mueti lubukila kisadi kiaku ;
mfutu wunneni widi mu kuzikebanga.
12 Nani wulenda sudika zinzimbala ziandi e ?
Lemvukila zinzimbala ziama zisuama.
13 Keba kisadi kiaku mu masumu mamvangimina mu luzolo ;
mabika ku ndiadila ;
buna ndiela ba wukambu tsembolo ;
wukambu zaba diambu mu masumu manneni.
14 Bika mambu ma munuꞌama ayi mayindu ma ntimꞌama
maba ma khini va ntualꞌaku
A Yave, ditadi diama ayi nkudi ama.