Minkunga 26
Bika wundungisa
Nkunga Davidi.
1 Wundungisa, a Yave, bila ndidiatila mu luzingu lukambulu tsembolo.
Nditula diana diama mu Yave mu kambu memata.
2 A Yave wumfiongunina, wumbeki,
fiongunina mayindu ma ntimꞌama ayi ntimꞌama.
3 Bila luzolo luaku luidi mu zithangu zioso ku ntualꞌama
ayi ndindiatanga mu zithangu zioso mu kiedika kiaku.
4 Ndivuandanga ko va kimosi ayi batu ba luvunu.
Ndifubakananga ko va kimosi ayi bankua mayuya.
5 Ndieti kakumukina lukutukunu lu batu bamvanganga mambimbi.
Ndivuandanga ko va kimosi ayi batu bambimbi.
6 Tsukudi mioko miama
mu monisa ti ndisi zaba diambu ko,
ayi ndiela zungidila ntalꞌaku, a Yave !
7 Mu yamikina minzitusu miaku mu mbembo yingolo
ayi mu diambu di yolukila mangitukulu maku moso.
8 Ndinzolanga nzo yoyi weti zingila ; a Yave
buangu kimvuandanga nkemboꞌaku.
9 Kadi botula muelꞌama va kimosi
ayi bankua masumu ayi luzingu luama va kimosi
ayi bantengulanga menga ma batu,
10 mu bobo badi mioko miyuku kubika zikhanu zimbimbi,
bobo mioko mi lubakala miwedi makaba ma kinsueki.
11 Vayi minu, ndieti diatila mu luzingu lukambu tsembolo ;
bika wukhula ayi wumbona kiadi.
12 Malu mama madi va ntoto wuyalumuka
mu lukhutukunu lunneni, ndiela zitisa Yave.