Minkunga 30
Ngeyo wuphutudila luzingu
Nkunga Davidi kayimbidila mu mbiekolo nzo Nzambi.
1 Ndiela kuyayisa, a Yave
bila ngeyo wuthotula mu dibulu didi thipula
Wusia tia ko ti bambeni ziama zimona khini
mu diambu diama.
2 A Yave, Nzambi ama, ngeyo nditela mu diambu di lusadusu
ayi ngeyo wumbelusa.
3 Yave, ngeyo wuthotula mu tsi bafua,
ngeyo wuthanina muingi ndibika tibuka mu dibulu.
4 Luyimbidila Yave beno banlongo bandi ;
Zitisanu dizina diandi di nlongo.
5 Bila nganzi andi yizingilanga mu ndambu thangu kaka.
Vayi nlemvo andi wunzinganga mu zithangu zioso ;
bidilu bilenda kuiza va builu ;
vayi khini yinkuizanga va nsuka.
6 Bu ndiba mu luvovomo, ndituba :
“Ndilendi nikunu ko”
7 A Yave, mu nlemvo aku,
ngeyo wukindisa mongoꞌama…
vayi bu wusueka zizi kiaku buna minu ndimona boma.
8 Kuidi ngeyo, a Yave, nditela mbila.
Kuidi Yave ndiyamikina mu diambu di lusadusu
9 “Ndandu mbi yidi mu mbivusu ama, minu kuluka mu dibulu e ?
Mbungi-mbungi yilenda kuzitisa e ?
Voti yilenda yamikina kikhuikizi kiaku e ?
10 A Yave wa, wumboni kiadi,
A yave, bika wuba lusadusu luama.”
11 Ngeyo wuviakisa bidilu biama makinu,
wunianguna tsaku ama ayi wuphuika khini.
12 Muingi ntimꞌama wuyimbidila minkunga
ayi wubika ba dio sui.
A Yave, Nzambi ama, ndiela ku vutudilanga mu zithangu zioso.