Minkunga 34
Pfumu wukhula
Nkunga Davidi mu thangu kavuna lawuka va meso ma Abimeleki bu kankuka ayi Davidi wuyenda.
1 Ndiela yayisa Yave mu zithangu zioso ;
Nzitusu andi wela ba mu bididi biama mu kadika thangu.
2 Muelꞌama wela kiniemisa mu Yave.
Bika badi mu phasi bawa ayi bamona khini.
3 Kembisanu Yave va kimosi ayi minu,
bika tuyayisanu dizina diandi va kimosi,
4 Nditomba Yave, niandi wuphana mvutu
ayi niandi wukhula mu zitsisi ziama zioso.
5 Batu bobo batala kuidi niandi bakienzulu
ayi bizizi biawu bilendi mona tsoni nkutu ko.
6 Nsukami wawu wutela ;
ayi Yave wunwa ayi wuphukisa mu ziphasi ziandi zioso.
7 Mbasi Yave yinzungidilanga bobo bankinzikanga Yave
ayi wukubakulanga.
8 Lubimba ayi lutala ti Yave widi wumboti ;
Lusakumunu luidi kuidi mutu wowo wuntombanga suamunu mu niandi.
9 Lukinzika Yave beno banlongo bandi.
Bila bobo beti kunkinzika, balendi kambu kima ko.
10 Zikhosi zimvonganga
ayi zimfuanga nzala vayi bobo bantombanga Yave
balendi kambu kima ko.
11 Yizanu bana bama, lungua.
Ndiela ku lulonga buevi bu kinzikilanga Yave.
12 Nani mutu mu beno wunzolanga luzingu,
ayi tidi mona bilumbu biwombo bi mboti
13 Vengumuna ludimi luaku mu mambu mambimbi,
ayi bididi biaku mu tuba mambu ma luvunu.
14 Botuka mu mambimbi vayi vanga mamboti.
Tomba ndembama ayi landakana yawu.
15 Meso ma Yave mantalanga basonga
ayi makutu mandi madi mazibuka bu beti yamikina.
16 Yave wunsuekanga zizi kiandi
kuidi batu bamvanganga mambimbi
mu diambu babika buela tebukulu moyo va ntoto.
17 Batu basonga banyamikinanga ayi
Yave weti kuba wanga ayi wukubakulanga mu ziphasi ziawu zioso.
18 Yave widi wufikama vadi batu bobo
badi mintima mi kofakana.
Ayi wumvukisanga bobo badi pheve yidi mu kiadi kingolo.
19 Mutu wusonga wumbuilungu ziphasi ziwombo
vayi Yave wunkukulanga mu zizioso.
20 Niandi wunkebanga mimvesi miandi mioso
kadi wumosi wulendi keluka ko.
21 Mambu mambimbi mela vonda mutu wumbimbi ;
bobo beti lenda nkua busonga
bela bedoso.
22 Yave wunkulanga bisadi biandi,
ayi kadi wumosi mu babo bobo bansuaminanga mu niandi
kalendi bedoso ko.