Minkunga 36
Mamboti ma Pfumu
Nkunga Davidi, kisadi ki Yave, kuidi pfumu minyimbidi.
1 Mambu ma Nzambi madi mu ntimꞌama
Mu mambu matedi disumu di mutu wumbimbi :
kuisi ko mambu ma kinzikila Nzambi va meso mandi.
2 Bila va meso mandi veka,
weti kukiniemisa buwombo mu bakula voti lenda masumu mandi.
3 Mambu ma munuꞌandi madi mambimbi ayi ma luvunu.
Wulembo kuandi buela ba nkua nduenga
ayi bueba vanga mamboti.
4 Bu kadi va mbukꞌandi,
wunyindulanga mambu mambimbi.
Weti kukiyekula niandi veka mu nzila yi masumu
kalozanga ko mambu mambimbi.
5 Luzolo luaku, a Yave, lueti tula nate ku diyilu
kikhuikizi kiaku nate mu matuti
6 Busonga buaku buidi banga miongo minda ;
zinzengolo ziaku zidi banga dibulu dinneni.
O Yave, ngeyo wunkebanga mutu ayi bulu.
7 Tala phila luzolo luaku lu ngolo lukambu thalu !
Luidi luzangulu ayi lukululu va khatitsika batu
bobo bansuaminanga ku tsi phozi yi mavevi maku.
8 Beti tula minyengo mu wombo di bima bi nzo aku
ayi ngeyo wukubanuikinanga mu nlangu
wu makhini maku.
9 Bila kuidi ngeyo kuidi tho yi luzingu.
Mu kiezila kiaku, tulembo moni kiezila.
10 Landakana vanga luzolo luaku kuidi bawu bazebi
ayi busonga buaku kuidi bawu badi mintima mi lulama.
11 Bika kulu ku nkua luniemo kubika kumbakidila ;
voti bika koko ku mutu wumbimbi kubika kuthinisa thama.
12 Tala phila yilembo buila bisadi bi mambu mambimbi ;
balumbulu va tsi ayi balendi buela telama ko.