Minkunga 40
Phulusu yi Nzambi yi kisadi kiandi
Nkunga Davidi kuidi pfumu minyimbidi.
1 Ndieti tadidila Yave mu mvibudulu.
Niandi wubaluka kuidi minu
ayi wuwa yamikina kuama.
2 Niandi wuthampula mu dibulu di tsisi,
mu khati nyamba wu ngolo.
Wutula malu mama va ditadi,
wuphana buangu kikinda kioki ndilenda telama.
3 Niandi wutula nkunga wumona va munu ama ;
nkunga wu zitisila Nzambi eto,
Batu bawombo bela mona ayi bela mona tsisi ;
ayi bela tula diana diawu mu Yave.
4 Lusakumunu kuidi mutu wunkitulanga Yave diana diandi ;
ayi wunkambu talanga bankua luniemo
kuidi bobo beti baluka kuidi zinzambi zi luvunu.
5 A Yave, Nzambi ama, ngeyo wuvanga matsiminanga mawombo ;
ayi bima biobi wukubika mu diambu dieto.
Kuisiko mutu wulenda kutangila biawu.
Enati thidi ku mayolukila ayi ku matubila ;
mawu mawokidi ngolo muingi ndimasamuna.
6 Makaba ma vonda ayi makaba matambuku ;
ngeyo wumanga mawu ;
Ngeyo wutobula matu mama.
Makaba mayoko ayi makaba mu diambu di masumu,
ngeyo wusia malomba ko.
7 Buna ndituba :
“ndilembo yizi ; didi disonama mu diambu diama
mu buku ti :
8 Minu thidi vanga luzolo luaku ; a Nzambi ama,
Mina miaku midi mu ntimꞌama.”
9 Ndinyamikisa busonga buaku mu lukutukunu lunneni.
Ndisia zibika bididi biama ko.
Banga kuandi buzebi, a Yave.
10 Ndisi sueka ko busonga buaku mu ntimꞌama.
Ndiyolukila kikhuikizi kiaku
ayi phulusu aku.
Ndisia sueka ko luzolo luaku
ayi kiedika kiaku mu lukutukunu lunneni.
11 Kadi zimbakana kumbonanga kiadi, a Yave.
Bika Luzolo luaku ayi kiedika kiaku
bikhebanga mu zithangu zioso.
12 Bila ziphasi ziwombo zikambu zabakana
thalu zinzungididi.
Masumu mama mambakidila,
ayi ndikadi mona.
Maviokidi zitsuki ziama zi ntu mu thalu.
Ayi ntimꞌama wulembo vongi mu minu.
13 Yangalala, a Yave, mu kuphukisa
A Yave, yiza nsualu mu kutsadisa.
14 Bika babo bobo bantomba baka luzingu luama ;
bafua tsoni ayi baba dio kombolo
bika babo bammonanga khini mu mbivusu ama baba dio kombolo.
15 Bika babo bobo bantubanga kuidi minu :
“A, a…” bamona tsisi mu diambu di zitsoni ziawu veka
16 Vayi bika babo bobo bakutombanga bayangalala,
ayi bamona khini mu ngeyo.
Bika babo banzolanga phulusu aku batuba mu zithangu zioso :
“Bika Yave kayayusu.”
17 Vayi minu, ndidi mu kiadi ayi nsukami,
bika Yave kambanzila.
Ngeyo nsadisi ama ayi nkudi ama.
Nzambi ama, kadi zingila.