BUKU YIMMUADI
Minkunga 42
Phuila yi Nzambi ndieti mona
Nkunga bana ba babakala ba Kole kuidi pfumu minyimbidi.
1 Boso bummoninanga disofi phuila yi nlangu,
buawu bobo muelꞌama wididi phuila yi ngeyo ;
Nzambi ama.
2 Muelꞌama wulembo moni phuila yi Nzambi,
Phuila yi Nzambi yi moyo.
Thangu mbi ndiela nkuenda ayi ndiela dengana Nzambi e ?
3 Matsuela mama mawu maba bidia biama
mu builu ayi muini bu babedi ku khambanga mu lumbu kimvimba :
“Kuevi kuidi Nzambi aku e ?”
4 Mambu momo ndieti tebukila moyo
banga minu ndintiamuna muelꞌama :
buevi ndibedi kuendilanga va kimosi
ayi nkangu wu batu, mu kuba diatisa mu ntanda
nate ku nzo Nzambi
mu biyoko bi khini ayi mu phutudulu yi matondo
va khatitsika batu bawombo badi mu nyengo.
5 Bila mbi vongidi bobo, a muelꞌama e ?
Bila mbi muelꞌama wulembo niongina
mu khati ama e ?
Tula diana diaku mu Nzambi bila ndiela kunzitisa diaka ;
Mvulusi ama ayi Nzambi ama.
6 Muelꞌama widi wuvonga mu khati nitu ama
Diawu ndiela kutebukilanga moyo
tona ku tsi yi Yolidani, ku zitsongi zi miongi
mi Elimoni ayi tona ku mongo wu Mizali.
7 Kiza kieta tela kiza kinkaka
mu khumbulu yi minlangu mu zithadi ziaku.
Mayo maku mamo mafioti ayi manneni ma mbukimini.
8 Mu muini, Yave wumfidisanga luzolo luandi
Mu builu nkungꞌandi widi va minu
lusambulu kuidi Nzambi yi luzingu luama.
9 Ndintuba kuidi Nzambi,
ditadi diama di ngolo :
“Bila mbi wunzimbikini e ?
Bila mbi mfueti diatilanga mu phasi,
yamusungu kuidi mbeni e ?”
10 Mimvesi miama milmbo moni phasi yi lufua ;
batu bobo bandendi bu balembo mfingi
bu beti ku khambanga mu lumbu kimvimba ti :
“Kuevi kuidi Nzambi aku e ?”
11 Bila mbi vongidi bobo, a muelꞌama e ?
Bila mbi wulembo niongina mu khati ama e ?
Tula diana diaku mu Nzambi
bila ndiela kunzitisa diaka ;
niandi Mvulusi ama ayi Nzambi ama.