Minkunga 56
Kadi tsisi Nzambi bu kadi yeto
Nkunga Davidi kuidi pfumu minyimbidi ; kayimbidila mu “Dibembi di minti midi ku zitsi zi thama” mu thangu basi Filisti bankanga mu tsi Ngati.
1 Wumboni kiadi, A Nzambi
bila batu balembo ndandakana mu kingolo ;
mu lumbu kimvimba ; balembo luti buela kunduanisa
2 Mimvuezi miama milembo ndandakani mu lumbu kimvimba
Bawombo balembo nduanisa mu luniemo luawu.
3 Mu thangu ndimmona tsisi ;
ndiela tula diana diama mu ngeyo.
4 Mu Nzambi, mutu vuidi mambu ndieti zitisa
Mu Nzambi ndieti tula diana ;
ndilendi mona tsisi ko,
Mutu wowo wumfuanga, mbi kalenda kuphanga e ?
5 Mu lumbu kimvimba, beti balula mambu mama ;
balembo yindula mu zithangu zioso mu kumbonisa phasi.
6 Balembo kutakana ;
balembo suami
balembo fiongunina zithambi ziama,
mu nsualu-nsualu batidi bonga luzingu luama.
7 Balendi vukila kani mu kipholo kiawu kimosi ko e ?
Mu nganzi aku, a Nzambi, bedisa makanda
8 Sonika maniongo mama
Lunda matsuela mama mu khutu aku.
Masi ko mu lutangu luaku e ?
9 Buna bambeni ziela vutikisa ku mbusa
mu thangu ndiela tela mu tomba lusadusu.
Mu diadi diela zabila ti Nzambi widi ku ndambuꞌama.
10 Mu Nzambi mutu vuidi mambu ndieti zitisa
Mu Yave, mutu vuidi mambu ndieti zitisa.
11 Mu Nzambi nditula diana diama,
ndilendi mona tsisi ko ;
mutu mbi kalenda ku phanga e ?
12 Ndidi ku tsi zindefi ziaku, a Nzambi.
Ndiela tambika makaba ma phutudulu matondo kuidi ngeyo.
13 Bila ngeyo wukhula mu lufua,
ayi malu mama mu diambu mabika bumina thutu
muingi ndidiatilanga va ntuala Nzambi,
mu kiezila ki luzingu.