Minkunga 59
Nzambi ama, wukhudi.
Nkunga Davidi kuidi pfumu minyimbidi “Kadi vonda” mu thangu Sawuli kafidisa batu bazungidila nzo Davidi mu diambu bamvonda.
1 Wukhula mu bambeni ziama, a Nzambi ;
wukhebi mu diambu bobo bamfuemini !
2 Wukhudi mu mimvangi mi mambimbi
ayi wuphukisa mu mintengudi mi menga.
3 Tala phila balambididi mu kuphingila.
Batu badi ngolo bandiendidi manenga
bika sia ti mu diambu di
nzimbala yama voti mu diambu di disumu diama, a Nzambi.
4 Kadi mbimbi ndisia vanga ko
vayi bakubimini mu kunduanisa
kotuka mu kutsadisa
tala phila ndikila.
5 A Yave, Nzambi nkua ngolo yoso,
Nzambi yi Iseli, kotuka mu tumbudila makanda moso ;
kadi mona kadi kiadi
kuidi bobo beti vanga mambimbi.
6 Bamvutukanga va masika,
beti lola banga zimbua ;
ayi beti zungidila divula.
7 Tala, momo balembo luki mu miunu miawu.
Bisabala bidi mu bididi biawu.
Ayi balembo tubi :
“Nani wulenda kutu wa e ?”
8 Vayi ngeyo, a Yave, wulenda basevi ;
wulembo sekinina makanda moso momo.
9 E ngolo ziama, kuidi ngeyo ndintala,
ngeyo, e Nzambi, widi tinunu kiama ki ngolo.
10 Nzambi ama, wukuphangilanga mamboti Nzambi ama yi luzolo
wela kundengana ; Nzambi wela diata va ntuala ama
ayi wela kumbonisa khini vadi bobo bakuthubidilanga.
11 Vayi kadi kuba vonda, a Yave, nkaku eto,
bila muna batu bama bela zimbakana.
Mu lulendo luaku, baba mindiengidi ayi wuba buisi.
12 Mu diambu di masumu ma muinu miawu,
mu diambu di mambu ma bididi biawu,
bika babuilama mu luniemo luawu.
Mu diambu di zitsingulu ayi luvunu beti totula,
13 Wuba lalikisa mu nganzi aku yi kikhesa ;
wuba lalikisa muingi babika buela monika
buna diela zabakana mu zitsuka zi ntoto
ti Nzambi wunyadila Yakobi.
14 Bamvutukanga va masika,
beti lola banga zimbua,
ayi beti zungidila divula.
15 Bandiengilanga mu diambu di bidia,
ayi enati bakadi yukuta,
buna banyamikinanga.
16 Vayi minu, ndiela yimbidila zingolo ziaku ;
muna nsuka, ndiela yimbidila luzolo luaku
bila ngeyo tinunu kiama kingolo
ayi suamunu mu zithangu zi ziphasi.
17 A ngeyo zingolo ziama,
ndinyimbila nzitusu mu diambu diaku ;
ngeyo Nzambi, ngeyo tinunu kiama kingolo ;
Nzambi ama yi luzolo.