Minkunga 6
Yave wutsadisa
Nkunga Davidi kuidi pfumu minyimbidi, wuyimbidila wawu mu ngitala yi nana di zitsinga.
1 A Yave, kadi kuthemina ku tsi nganzi aku
ayi kadi kuphana thumbudulu bu widi ku tsi miangu miaku mi ngolo.
2 Wumbona kiadi a Yave bila ndidi wulebakana,
A Yave wumbelusa bila mimvesi miama mieka nduka fua.
3 Muelꞌama wulembo yami,
Nate thangu mbi, a Yave, nate thangu mbi e ?
4 Vutikisa ntima, a Yave, wukhudi,
wuphukisa mu diambu di luzolo luaku lu ngolo.
5 Mutu kalendi kutebukila moyo ko niandi fua.
Ayi nani wela kuzitisa ku tsi bafua e ?
6 Mbemana vonga kuna ku kunga ;
builu bu mvimba ndieti bodisa mbukꞌama mu bidilu,
ndieti bodisa buangu ki ndieti leka mu matsuela.
7 Meso mama mabividi mu diambu di kiadi,
ayi manunini mu diambu di bobo beti kundenda.
8 Botukanu va ntualꞌama
beno boso lumvanganga mambu mambimbi.
Bila Yave wuwilu bidilu biama.
9 Yave wuwilu yamikina kuama mu diambu di kiadi
Yave kikinini lusambulu luama.
10 Bambeni ziama zioso baela fua tsoni
ayi bela ba boma-boma.
Bela vutikisa ku manima ayi bela fua tsoni mu nsualu.