Minkunga 66
Bika Nzambi wutukula kazitusu
Nkunga kuidi pfumu minyimbidi.
1 Ntoto wumvimba, yamikinanu mu khini kuidi Nzambi,
2 Yimbilanu nkembo wu dizina diandi.
Kitulanu nzitusu andi nzitusu wu nkembo !
3 Kambanu Nzambi : mavanga maku tsisi madi !
Lulendo luaku luidi lunneni
diawu bambeni ziaku zilembo kukikulula.
4 Ntoto wumvimba weti komvama va ntualꞌaku
ayi bela yimbila minzitusu kuidi ngeyo ;
bela yimbila minzitusu kuidi dizina diaku.
5 Yizanu, lutala momo Nzambi kavanga.
Mavanga madi tsisi madi kuidi batu.
6 Wukitula mbu ntoto wuyuma ;
basabukila nlangu wunneni mu malu :
Yizanu tumona khini mu niandi.
7 Wunyadilanga mu lulendo luandi
mu zithangu zioso ;
Meso mandi mantalanga makanda ;
bika bankua matingu babika kumfuemina.
8 Zitisanu Nzambi eto, a batu
bika biyoko bi nzitusu andi biwakana ngolo.
9 Niandi wutanini luzingu lueto
ayi wukeba malu meto mabika sialumuka.
10 Bila ngeyo, a Nzambi, wutumeka
ngeyo wutuvedisa banga palata.
11 Wutukotisa mu nloko,
ngeyo wutula mimfuna mu luketo lueto.
12 Ngeyo wutala ti batu batudiatidila mu mintu mieto ;
beto tukota ku mbazu ayi mu nlangu,
vayi wutunata ku buangu kidi bima biwombo.
13 Ndiela kuiza mu nzo aku ayi makaba mayoko ;
ayi dukisa zindefi ziama kuidi ngeyo.
14 Zindefi ziozi bididi biama bivanina tsila
ayi ziosi ziyolukila munu ama
mu thangu ndiba mu phasi.
15 Ndiela tambika bibulu bi mafuta kuidi ngeyo
ayi makaba ma mamemi ma mbakala ;
ndiela tambika zingombi ayi zikhombo zimbakala.
16 Yizanu, ayi ludimba beno boso lueti kinzika Nzambi
bika ndilukamba momo kavengi mu diambu diama.
17 Ndiyamikina kuidi niandi mu munu ama,
nzitusu andi wuba mu ludimi luama.
18 Enati ndiyayisa masumu mu ntimꞌama,
nganu Yave kasia diamba ko.
19 Vayi bukiedika Nzambi wudimba
ayi wuwa mbembo ama mu lusambulu.
20 Nzitusu wuba kuidi Nzambi,
niandi kasia loza ko lusambulu luama ;
voti kasia botula ko luzolo luandi mu minu.